¹ Ndangkong ɓit paat mǝn Hananiya wu a ndaawang wuyoon gǝ pak daskagam, gǝ me wu ɓoot ɓǝlǝp sǝm muup a Tartilus mǝ mwaan nnǝgǝn. Jya mǝ pam Bulus ntagam gwopna. ² Bulus ɗar ntagam gwopna, mǝn Tartilus pam nyi yen, "Miskagam Felis wukǝgǝt nogot, a nsa waa ngǝ mǝ kat tugatchagap yi, gǝyil gǝmu ɗong a nsa ɓoot ɓǝlang gǝgǝ; ³ a waa nnyi mǝ lap bii wu gǝ fu chan yi gǝ tookpya. ⁴ A nyit gǝ gǝ tong npeen veet mou, langkom gǝ gǝ kǝlǝng an yi gǝ bǝzung wuret. ⁵ Mǝ naa mǝ kat dagwuo nhǝ a nsham, a nsa nyi Yahudawa gǝ mǝ ruang sut yi gǝyil dau. A nyi a wu langtagam wu gǝ mǝ kwaar kaa muop mou hǝ ⁶ Nyi gǝwar dam lǝwap wuyoon, mǝn mǝ yaa nyi. ⁷ . ⁸ Ya gǝ nang fu muup ɓǝ gǝ kǝlǝng jepe wu mǝ laa kaa muup nhǝ." ⁹ Gogot Yahudawa mǝ lap gǝdǝr muup mǝ yen ɓǝlǝp wu nyi laa hǝ a naduk. ¹⁰ Shi wu gwopna pǝn pee ɗewar Bulus laa ɓǝlǝp yi, mǝn Bulus lap yen, "A naa a kat gǝ chin yii nɓǝl gǝ fu sheep gǝyil nhǝ, a nsa nyi gǝ a yakshii san yi ngǝ gǝ tookpya. ¹¹ Ya gǝǝ man nkwǝt mwaan gǝnǝ nUrishalima npe wap Naan maa yii sarkaavǝl mou. ¹² Muop nhǝ, mǝ kat an nlǝwap wuyoon mǝn a ɓagalshik gǝ mǝgwuo mou, a ɗen kwal gǝnaar gurum wukǝrgǝi nlǝwap gǝ gǝfǝr mou. ¹³ Bii wu mǝ pam an gǝkaa hǝ, gǝ mǝ ɓoot fu nyin ngǝ mou. ¹⁴ A ɗem ntagam gǝ, War ndung muop mǝ yong shi chung hǝ, an fu wap Naan mǝ-ndaamu a gǝwar nanyi. An a wu ɗarɓal gǝkaa byitǝt gǝ biiyil mǝlaa-ɓǝlǝpnaan. ¹⁵ A gǝ ɗen en nNaan kabi muop hǝ, nkwǝt gurum wukǝr gǝ wubyas dip gǝ mǝ yigil ntugun. ¹⁶ A waa nnyi an fu zwat ɗewar a ɗen bǝzung nǝ yi gǝme ntagam Naan gǝ gurum. ¹⁷ Ndangkong yii nɓǝl, mǝn a waa a wul ɗewar a epɓǝt gǝyil gǝnǝ yi gǝ shagal. ¹⁸ A chin kam mǝn pak Yahudawa wu mǝ tugat nAsiya mǝ kat an nɗǝgǝn lǝwap wuyoon fu zugum san; an gǝnaar gurum wukǝrgǝi ɗǝ a kot yi fu jagar mou. ¹⁹ Ɗong ɗyin daas muop nanyi mǝ nkwǝt ntagam gǝ, ɗǝ a chin wubis ɓǝ mǝ laa. ²⁰ Ɗǝ mǝ nlaa nkwǝt a chin wubis nlǝwap mou ɓǝ mǝ laa wubis wu a chin ntagam gǝwur daskagam nung Yahuawa ²¹ a ep ɗǝgǝl nǝ a laa ɓǝlǝp a gǝme a yen, "A ɗarɗok npe sheep ntagam gǝ a nsa ɓǝlǝp yigil ntugun mǝdiɗǝm.'" ²² Lat mǝn Felis wu man jepe gwet gǝkaa War nanyi, ɗen ɓit gǝ ɓǝlǝp nanyi. Yen, "Lisiyas ntong nUrishalima nsam ɓǝ a gap shik gǝgǝ." ²³ Mǝn laa gǝ wu-ntagam mǝlekɗyel kangkaa Bulus, ɗe mǝ nyit mǝshaar muup jya mǝ kwat weel afe yi. ²⁴ Ɓit fat mak vǝl mǝn Felis wul gǝpe gǝme gǝ mat muup Drusila, lareep Yahudawa, mǝn taklep mǝ jya gǝ Bulus mǝn kǝlǝng ɓǝlǝp pǝn-naduk nYesu Kristi nfu muup. ²⁵ Mǝn shi wu Bulus laa ɓagalshik gǝnyi byiwukǝr, gǝ yashik, gǝ sheep Naan mǝn Felis yagal lugut mǝn yen, "Mwaan dat ɗǝng. A kat yit nǝ ɓǝ a lep dǝrgǝ." ²⁶ Gǝ laa mou ɓǝ yong Bulus laa ɓǝlǝp gǝnyi naa kat ya gǝ pǝn shagal njin ²⁷ Yii vǝl ɗyilǝng mǝn Porkiyus Festus waa gwopna ndangkong Felis. Felis tangkop Yahudawa mǝ ɗem yi nyi mǝn nyit Bulus nsar mǝkangpe.