¹ Bulus langyit kǝr naa gǝwur dsakagam tugatɗok mǝn yen, "Mǝjepnaa, an jet a langɗok gǝdǝr Naan gǝ bǝzungnǝ gǝme waaji rǝ ɓit wu chinyi." ² Ndaawang wukakǝgǝt, sǝm muup a Hananiya hǝ sat nmuop wu mǝ ɗyamɗok dukduk hǝ mǝ chit gǝfu muup. ³ Mǝn Bulus laa gǝnyi yen, "Naan gǝ chit gǝ, gǝ wu a gǝ ɗong a gǝɓang dat. Ge tongɗok npe sheep an shi byitǝt, mǝn sat nmuop mǝ chit an, bii wu byitǝt dǝn a?" ⁴ Muop wu mǝ ɗyamɗok hǝ mǝ yen, "Gǝ agaa ndaawang wukakǝgǝt nung Naan kam a?" ⁵ Bulus yen, "A man kan nyi a ndaawang wukakǝgǝt mou mǝjǝpnaa. Nsa mǝ ran ɗen gwe nkwǝt, Gǝ laa wubis kǝ wunaakaa gurum agǝ mou." ⁶ Bulus naa kat pak muop gǝwur daskagam nanyi a Sadukiyawa ɗe pak a Farisiyawa mǝn laa ɓǝlǝp ɓǝɓal gǝnaar muop, yen, "Mǝjepna, an a gurum Farisiyawa, laa nɓǝt Farisiyawa. A tongɗok npe ɗǝ mǝ sheep an yi a nsa a ɗen en nǝ kaa yigil ntugun mǝdiɗǝm." ⁷ Laa dat kam mǝn ɓagalshik yagal gǝkang Farisiyawa muop gǝ Sadukiyawa mǝn gurum mǝ gap ɗǝgǝn shak. ⁸ Nsa Sadukiyawa mǝ yen mǝbi kwǝt kabi yagal ntugun, gǝ mǝwong, gǝ mǝrip mou, Farisiyawa muop zak mǝ ɗem. ⁹ Lat mǝn jagar taa, pak mǝpyan biiyil ngan Farisiyawa muop mǝ yigil ɗyam mǝn mǝ yen, "Mǝ naa mǝbi wubis nɓǝlǝp dagwuo nmou. Ɗe nkwǝt a mǝrip ko mǝwong nlaa ɓǝlǝp gǝnyi ɓǝ a nah?" ¹⁰ Ɓagalshik fyer mǝn long mǝlekɗyel yagal lugut yi mǝ ntee Bulus mǝn lang lep sam mǝ mang nyi mwaan gǝnyi gǝkǝnpe. ¹¹ Wawul nlǝpar mǝn Miskagam ji ɗaar n-eskogop muup mǝn yen, "Gǝ yagal lugut mou, kabi wu gǝ twamshik kaanǝ nUrishalima hǝ, mwaann gǝ chin a kam zak nRom." ¹² Ɓit ɓang mǝn pak Yahudawa mǝ mang fudu sǝsǝ mǝ twarfu shak gǝtap gǝ du sǝsǝ mǝn du sua am ɗagat nǝ du tǝ Bulus mou. ¹³ Daas dok mǝ maa yagurumvǝl wu mǝ kul ɓǝlǝp nanyi. ¹⁴ Mǝ mwaan dǝr ndaawang wunan gǝ pak daskagam mǝ yen, "Mǝ mang fumu nkwǝt zhiirii gǝ lang kaa mu kat mǝ sǝsǝ ɗagat nǝ mǝ tǝ Bulus. ¹⁵ A waa nnyi, gǝwur dasakagam gu laa gǝ long mǝlekɗyel sam gǝnyi tongku gun a npe sheep nyi. Mǝn gǝ mǝ tǝ nyi ɗǝng shee nrǝ npeen." ¹⁶ Laa emnǝgǝn Bulus wumat kǝlǝng nkwǝt mǝ lǝnɗok gǝ mǝ fogot Bulus yi, mǝn mwaan gǝ laa gǝnyi. ¹⁷ Bulus yong me wulekɗyel mǝn yen, "Mwaan gǝ laaswaal nhǝ dǝr long agu, nyi gǝ lǝfu npe laa." ¹⁸ Wulekɗyel nanyi mwaan gǝ laaswaal nanyi mǝn yen "Bulus yong an a ji laaswaal nhǝ dǝr gǝ. Nyi gǝ bii wu gǝ laa gǝgǝ." ¹⁹ Long mǝlekɗyel nanyi dǝl nyi gǝ esgogop mǝn yen, "Gǝ a bii me wu gǝ laa gǝ an yi?" ²⁰ Laasswaal nanyi yen, "Yahudawa mǝ mang fu shak nkwǝt ɓit nɓang ɓǝ mǝ laa gǝgǝ gǝ sam gǝ Bulus tongku gǝ du nang a ɓǝlǝp kǝr fu muup yi. ²¹ Naa ya gǝ ɗem mou, nsa daas mǝ maa yagurumvǝl mǝ turǝpɗok fu kang pǝt gǝfe. Mǝ twarfu shak nkwǝt gǝ du sǝsǝ ɗagat nǝ du tǝ Bulus mou. Gǝdǝt nhǝ muop fu kang a lapɗem gǝgǝ dat." ²² Lat mǝn long mǝlekɗyel nyit laaswaal nanyi waa ndangkong laa gǝnyi yen "Gǝ laa gǝ mǝgwuo nkwǝt gǝ laa ɓǝlǝp nhǝ gǝ an mou." ²³ Lat mǝn yong mǝnan mǝlekɗyel vǝl mǝn yen, "Gu kok mǝlekɗyel ɗaa vǝl npe mwaan gǝyil Kaisariya yi. Kok mǝrap bǝsǝng yagurumkun gǝfu sar, gǝ mǝkop ɗaa vǝl. Gu yigil nkangǝɓit." ²⁴ Pǝnfu nmuop mǝ tang bǝsǝng wu Bulus gǝ rap hǝ, mǝn mǝ mwaan gǝnyi dǝr gwopna Felis. ²⁶ "Klodiyus Lisiyas nang gǝ Gwopna Felis wukǝgǝt. ²⁷ Yahudawa mǝ yaa dagwuo nhǝ npe tǝ mǝn a rǝ kaa muop gǝ mǝlekɗyel gǝnǝ mǝn mǝ ɗuan nyi nsar muop, nsa a man kan nyi a gurum Rom. ²⁸ Dok a tangkop a man bii wu saa mǝ pam nyi yi mǝn a mang nyi a mwaan gǝnyi dǝr gǝwur daskagam gǝmuop. ²⁹ A kǝlǝng muop fu pam nyi a gǝkaa byitǝt gǝmuop, a mǝbi wu mak tǝ nyi ko mǝ ɓal nyi mou. ³⁰ Lat mǝn a man nkwǝt muop fu kul a mǝbi kaa dagwuo nanyi, a nsa kam a lep yi gǝnyi bǝr ngǝ. A laa gǝ mǝ pam nyi muop jya mǝ laa weel gemuop gǝgǝ. Lat." ³¹ Lat mǝn mǝlekɗyel mǝ kǝlǝng ɓǝlǝp gǝmuop. Mǝ mang nyi nlǝpar mwaan dǝr Antipatris. ³² Ɗaar mǝ fat mǝn mǝlekɗyel gwet mǝ nyit mǝpyan bǝsǝng mwaan gǝnyi, ɗe muop mǝ wak. ³³ Mǝpyan bǝsǝng mǝ ruo gǝyil Kaisariya mǝn mǝ pǝn byiyil-lep nanyi nau gǝ Bulus ngwopna. ³⁴ Gwopna bil byiyil-lep nanyi mǝn nang gan gǝyil wu Bulus tong nnǝgǝn hǝ. Man nkwǝt tong a gǝyil Kilikiya ³⁵ mǝn yen, "Mǝ pam gǝ mǝ nwul ɓǝ a kǝlǝng ɓǝlǝp agǝ." Mǝ sat nmuop mǝ ɗen nyi lǝ long Hiridus.