¹ Mǝjepnaa daas gǝ ndaanǝ muop, gu lǝngkom gu gu kǝlǝng ɓǝlǝp pǝt-gǝ-shik gǝnyi yi." ² Gurum mǝ kǝlǝng laa lǝfu gǝ ɗǝgǝl Yahudawa mǝn mǝ ɗok kit. Men yen, ³ "An a gurum Yahudawa, mǝ laa an a gǝfǝr Tarsus nɗǝgǝn Kilikiya, a Gamaliyel shee an npeen. ̀ Mǝshee an gǝ byitǝt ndaamu muop. An gǝ rǝgǝt dǝr Naan kabi wu gun gǝnyi chinyi hǝ. ⁴ Dok a twang War wagap mǝn a tuo gurum, a ɗyan daas nau gǝ surǝp a ɗǝk nlǝɓal, ⁵ kabi wu ndaawang wukakǝgǝt gǝ gogot daskagam mǝ man hǝ. Dok bii a lap byiyil-lep fumuup dǝr mǝjepnǝgǝn wu nDamaskus, mwaan a ɗyan muop a wawul gǝmuop nUrishalima ɗewar mǝ nogol muop yi. ⁶ Dok an gǝwar mwaan nDamaskus,em a rǝ dat, mǝn mǝbi chin, nfuus-gǝnaar mǝn pee yagal saan yaa an waat. ⁷ A pal n-yil mǝn a kǝlǝng ɗǝgǝl mǝgwuo yen, 'Shawulu, Shawulu, a nah gǝ fu twang an yi?' ⁸ Mǝn a lap a yen, 'Gǝ a wuɗang yi Miskagam?' Mǝn laa gǝ an yen, 'An a Yesu gurum Nazaret wu gǝ fu twang hǝ.' ⁹ Muop wu gǝme gǝ an hǝ mǝ naa wus wu saanpee nanyi, ɗe mǝ mangkang shi ɗǝgǝl gwuo wu laa ɓǝlǝp gǝ an hǝ mou. ¹⁰ Mǝn a yen, "Ɗe gǝ a chin a na yi Miskagam?' Mǝn Miskagam laa gǝ an yen, 'Yagal gǝ mwaan nDamaskus; mwaan gǝ rǝ ɓǝ mǝ laa bii wu gǝǝ chin hǝ.' ¹¹ Wus wu dok ɗar n-yit nǝ hǝ, ɗem naapee shinǝ mou, mǝn gurum muop wudok mǝn gǝpe gǝme hǝ mǝ yaa sarnǝ mǝn mǝ ruo nDamaskus. ¹² A nnǝgǝn mǝn a kat me dagwuo, sǝm muup a Hananiya, nyi a wu ɗarɓal nkaa byitǝt; Yahudawa muop wu nnǝgǝn bii mǝ laa wuret kaa muup badǝn. ¹³ Ji ɗar dǝrnǝ mǝn yen, 'Emnaa Shawulu, ɗagat yit gǝ naapee yi.' Dat kam mǝn a naa nyi. ¹⁴ Lat mǝn laa gǝ an yen, 'A Naan mǝ ndaamu shang gǝ ɗewar gǝ man bii wu-nɓǝt muup yi, gǝ Dagwu Wukǝr, npe ɗǝ gǝ kǝlǝng ɗǝgǝl muup yi n-fu muup. ¹⁵ Nsa a gǝ gǝ waa wutwamshik kaa muup ntagam gurum kǝ ɓǝlǝp wu gǝ naa mǝn gǝ kǝlǝng hǝ. ¹⁶ Gǝɗes hǝ gǝ fu kang a mǝ? Yagal mǝ kǝn gǝ ɗǝ mǝ vang wubis gǝgǝ yi nɗǝgǝn sǝm muup.' ¹⁷ Waa ji a wul nUrishalima, an fu ɗang Naan dat nlǝwap wuyoon, mǝn a naa mǝbi nkaafung. ¹⁸ A naa nyi fu laa gǝ an yen, 'Yagal bǝr gǝ nyit Urishalima nsa gǝ mǝ lap twamshik gǝgǝ nɗem nnǝgǝn mou.' ¹⁹ A yen, "Miskagam, muop gǝkaashak mǝ man nkwǝt an dok a mwaanɗok shi lǝwap-lǝwap a yak muop wu mǝ pǝn naduk ngǝ a nas mǝn a ɗǝk muop nlǝɓal. ²⁰ Dok mǝ tǝ Istifanus a gǝyit nǝ, mǝn dok ɗongɓǝt nǝ; a an dok a kang gǝ byaat muop wu me zwam nyi tǝ shi pang hǝ.' ²¹ Mǝn laa gǝ an yen, 'Mwaan dat, nsa gǝ a lep gǝ dǝr Mǝjong.'" ²² Mǝ lǝngkom muop kǝlǝng nyi laa nau lat. Mǝn mǝ aar ɗǝgǝl muop mǝ yen, "Gu vak gǝ bii nakam, ɗong nyin nkwǝt nkagam mou." ²³ Muop fu aar ɗǝgǝl muop, mǝ tagat byaat kulǝp, mǝ ǝgǝt orong fuu gǝtǝng, ²⁴ mǝn long mǝlekɗyel pǝnfu mǝ jya gǝ Bulus gǝkǝnpe. Pǝnfu nmuop nang ɗǝgǝl muup gǝ nas. Chin kam ɗewar man bii wu saa muop fu aar ɗǝgǝl kaa muup yi. ²⁵ Mǝ ɓugat nyi lat shi teng mǝn Bulus nang fu long mǝlekɗyel wu ɗarɗok dukduk hǝ yen, "Ɗong ɗyin gu nas gurum Rom nǝ mǝ nsheep nyi a?" ²⁶ Dagwuo kǝlǝng kam mǝn mwaan gǝ laa gǝ wuyoon gǝfe yen, "Gǝ dǝr chin a mǝ kam yi? Dagwuo nhǝ a gurum Rom." ²⁷ Long mǝlekɗyel nanyi mwaan gǝ nang yen, "Lat gǝ an, gǝ a gurum Rom a?" Bulus lap yen, "A kam hǝ" ²⁸ Long mǝlekɗyel nanyi yen, "Dok a kwat shagal gaban shee mǝ lap an nRom." Bulus yen, "Mǝ laa an a nRom." ²⁹ Gurum wudok yong gǝ mǝ nang ɗǝgǝl Bulus hǝ mǝ yigil nyit pee nanyi bǝr. Long mǝlekɗyel yagal lugut nsa naa kat ji ɓugat Bulus wu a gurum Rom hǝ. ³⁰ Ɓit ɗaar ɓang mǝn long mǝlekɗyel ɗemwkop man pampe wu Yahudawa muop gǝnyi gǝkaa Bulus. Lat mǝn pǝnfu nmuop wut Bulus, mǝn yong ndaawang wunan gǝ gǝwur daskagam mǝ tugat. Mǝn mang Bulus sam ɗen gǝnaar muop.