1 Mǝ nyit muop lat mǝn mǝ ruo nchii am mǝ mwaan gǝfǝr Kos, ɗaar mǝ fat mǝn mǝ ruo gǝfǝr Rodes mǝn mǝ ɗyilǝng mǝ mwaan gǝfǝr Batara. 2 Mǝ kat chii am wu gǝ gapɗel mwaan nFinikiya mǝn mǝ ruo nnǝgǝn. 3 Mǝ naa gǝyil Siprus dat mǝn mǝ nyit nyi gǝsar dakul, mǝn mǝ ɗyilǝng mǝ mwaan nSiriya mǝn ji mǝ lat nTaya; chii am nanyi dok gǝtap gǝ sam lee a nnǝgǝn. 4 Ndangkong mǝ kat jepgǝdǝr, mǝn mǝ tugat nnǝgǝn ɓit pogovǝl. Mǝrip laa gǝ muop nkwǝt nua gǝ nyit Bulus mwaan nUrishalima mou. 5 Ɓit tugat gǝmu nnǝgǝn lat, mǝn mǝ mwaan-mwaan gǝmu. Muop nau gǝ jep gǝ surǝp mǝ takdǝr mu fat gǝnyi ndangkong gǝfǝr nanyi. Lat mǝn mǝ dugam fukong, mǝ ɗangnaan, 6 mǝn mǝ kwap sun gǝ muop. Mǝ ruo nchii am, ɗe muop mǝ wak yaa shilǝ. 7 Mǝ tugun chii gǝyil Taya jya mǝ ruo gǝyil Tolamiyas. Mǝ nang mǝjepnǝgǝn, mǝn mǝ chin ɓit gǝme nnǝgǝn gǝmuop. 8 Ɓit ɓang mǝn mǝ nyit pee nanyi mǝ mwaan gǝyil Kaisariya. Mǝ ruo lǝ Filib wu shakɓǝlǝp Naan, wudok nyi gǝnaar muop wu pogovǝl hǝ; mǝn mǝ tugat shiɓǝt muup. 9 Dagwuo nanyi gǝ jǝraapduan feer wu gǝ mǝ laa wu-nɓǝtnaan hǝ. 10 Mǝ chin pak ɓit dat nnǝgǝn mǝn me wulaawu-nɓǝtnaan, sǝm muup a Agabus, tong gǝyil Yahudiya sam yi. 11 Ji dǝr mu mǝn ji mang zaal Bulus. Ɓugat sarshik gǝ kwakshik gǝnyi mǝn yen, "A kam, Mǝrip Wuret laa yen 'Yahudawa Urishalima gǝ mǝ ɓugat wupin zaal nhǝ a kam, gǝ mǝ pǝn nyi ntak gǝsar Mǝjong.'" 12 Mǝ kǝlǝng lǝfu nhǝ mǝn, mǝn gǝ gurum wu nnǝgǝn hǝ, mǝ ɗuak Bulus ya nmwaan gǝyil Urishalima mou. 13 Bulus lap yen, "Gun fu chin a mǝ kam yi, gun fu wal ɗǝ gu dam took nǝ ya? A mang gwe nbǝzung nǝ, gǝ mǝ bǝɓugat an dat mou, mǝ tǝ an nsa sǝm Miskagam Yesu." 14 Mǝ naa mǝ kat Bulus nyang gwe mǝn mǝ nyit wal mǝn mǝ yen, "Mang Naan chin bii wu took muop ɗem." 15 Ndangkong ɓit muop nanyi mǝn mǝ kok lau amu mǝ mwaan nUrishalima. 16 Pak gurum Kaisariya mǝ mwaan gǝdǝr mu. Muop nanyi mǝ wul gǝ me dagwuo sǝm muup a Manason, a gurum Siprus wu dok waa lagǝdǝr ɗagat ntagam, wu yong gǝtugat gǝshak. 17 Jya mǝ ruo nUrishalima mǝn mǝjepnǝgǝn mǝ kaat mǝn gǝ tookpya. 18 Ɗaar mǝ fat mǝn Bulus mwaan gǝpe gǝme gǝmǝn dǝr Yakubu, daskagam dok dip nnǝgǝn. 19 Tǝl muop lǝ gǝshak lat mǝn yakdang bii wu Naan chin gǝnaar Mǝjong gǝmek-gǝmek, nnǝgǝn ɓǝlang gǝfe hǝh. 20 Mǝ kǝlǝng kam mǝn mǝ pyap Naan mǝn mǝ laa gǝnyi mǝ yen, "Gǝ naa mou, emnǝgǝnmu, Yahudawa gwet mǝ pǝn naduk. Bǝzung muop mang npe mǝ kang byitǝt yi. 21 Mǝ kǝlǝng ɓǝlǝp kaa gǝ, nkwǝt gǝ shee Yahudawa gǝ Mǝjong mǝ nyit war Musa, gǝ laa gǝ muop mǝ nook kwapdǝp jepmuop mǝn mǝ nook was wusǝgǝr. 22 Ɗe mǝ chin a nah? Gǝ mǝ kǝlǝng wul gǝgǝ a lengwaar. 23 A waa nnyi, chin bii wu mǝ laa gǝgǝ. Mǝn gǝ daas feer wu mǝ twarfu du hǝ. 24 Kwat muop ɗǝ mǝ zugum gǝ yi, ɓǝ mǝ kwaar kaa du. A kam ɓǝ gurum mǝ man kan ɓǝlǝp wu dok mǝ kǝlǝng kaagǝ hǝ, a wurum. Ɓǝ mǝ naa mǝ kat gǝ zak fu kang byitǝt. 25 Nung Mǝjong muop wu mǝ pǝn naduk hǝ, mǝ yil gwe nmuop gǝtap nua nyigit bii wu mǝ tok naatoon gǝnyi hǝ, gǝ tǝgǝm, gǝ lua wu mǝ magar took hǝ, gǝ ɓwaar." 26 Lat mǝn Bulus kok daas muop nanyi, ɗaar mǝ fat mǝn zugum shik gǝpe gǝme gǝ muop mǝn rǝ yaa nlǝwap wuyoon, mǝn dwam ɓit zugumshik ɗe waa gǝ rǝ a par ɓit wu mǝ pǝn bii wap gǝsǝm muop dip. 27 Ɓit pogovǝl nanyi gǝwar lat, mǝn pak Yahudawa mǝ tugat gǝyil Asiya sam mǝ naa Bulus nɗǝgǝn lǝwap wuyoon, mǝn mǝ ɗen jagar gǝnaar gurum wukǝrgǝi, mǝn mǝ yaa Bulus. 28 Mǝ ɓwap wuwagar mǝ yen, "Daas Izraila, gǝ tǝp mǝn. A dagwuo hǝ fu sheepee gǝ jepe wu gǝ dam gurum, gǝ byitǝt, gǝ lǝwap wuyoon. A kam dat mou, chin kok gurum Hellinawa jya mǝ dam pee wusǝsaar nhǝ." 29 Mǝ laa kam a nsa dok mǝ naa Trofimus dagwuo Afisa gǝpe gǝme gǝ Bulus mǝn mǝ ɗye kat kwǝt Bulus mang nyi mwaan nɗǝgǝn nlǝwap wuyoon gǝnyi. 30 Lat mǝn gǝfǝr nanyi yagal kal mǝn gurum mǝ suo jya mǝ yaa Bulus. Mǝ del nyi mwaan nlǝwap wuyoon gǝnyi, mǝn mǝ agat fulǝ bǝr. 31 Muop npe tǝ nyi dat mǝn long mǝpin kangpe muop kǝlǝng gǝtap kwal yagal nUrishalima. 32 Bǝr mǝn kok mǝlek gǝ long mǝlek mǝn mǝ suo sam dǝr gurum wukǝrgǝi. Gurum mǝ naa long mǝlek gǝ mǝlek, mǝn mǝ nook nas Bulus. 33 Lat mǝn long mǝlek nanyi mwaan gǝ yaa Bulus mǝn sat nmuop mǝ ɗyan nyi shi kwanyok. Lat mǝn nang ɗǝgǝl Bulus gǝ bii wu chin hǝ. 34 Pak gurum gǝnaar muop wukǝrgǝi mǝ laa ɓǝlǝp dat vuu. Lat mǝn long mǝlekɗyel naa kat yi gǝ ji ɗarshi mǝbi mou mǝn sat muop mǝ mang Bulus ruo nkǝrang gǝnyi. 35 Jya mǝ wul npe kaa gǝtǝng, mǝn mǝlekɗyel nanyi mǝ mang nyi nsa kwal. 36 Nsa gurum wukǝrgǝi dok mǝ yigil lǝngǝdǝr fu eer ɗǝgǝl mǝ yen, "Gu baa gǝnyi." 37 Muop gǝwaar mwaan gǝ Bulus nkǝrang mǝn laa gǝ long mǝlekɗyel yen, "A laa mǝbi gǝgǝ a?" Dagwuo lap yǝn "Gǝ ɓoot ɗǝgǝl Hellinawa a? 38 Kan gǝ a dagwuo Masar wudok rwangpe mǝn pǝt gǝ 'Mǝtuope' waadǝr gǝgǝr gǝ muop hǝ mou mǝ?" 39 Bulus lap yen, "An a mǝgwuo Yahudawa wu tong gǝfǝr Tarsus nɗǝgǝn Kilikiya. An a gurum gǝfǝr wuyoon. A ɗang gǝ, shen pee n-an a laa lǝfu yi gǝ gurum muop." 40 Dagwuo shenpe nnyi mǝn yagal ɗar gǝɓeng mǝn ep sar npe laa lǝfu yi. Gurum mǝ ɗok kit ɗewar mǝ kǝlǝng nyi yi, mǝn laa ɓǝlǝp gǝmuop gǝ ɗǝgǝl Yahudawa. Yen,