¹ Ndangkong kwal nanyi mǝn Bulus lep dǝr jepgǝdǝr kwaskwak muop lat mǝn yagal waalap nMakidoniya. ² Kwaskwak gurum Naan muop nnǝgǝn lat mǝn mwaan gǝyil Hellinawa. ³ Chin tar kún nnǝgǝn. Nyi dǝr mwaan nSiriya mǝn kat Yahudawa mǝ lǝng gwak nnyi mǝn waa ge gǝnook yaa nMakidoniya. ⁴ Muop wu mǝ takdǝr muup mwaan gǝ mǝ ruo gǝyil Asiya hǝ a Sopata laa Pirus gurum Beriya; Aristakus gǝ Sekundus muop nau a gurum Tasalonika; gǝ Gayus gurum Derbe; gǝ Timoti, gǝ Tikikus gǝ Trofimus gurum Asiya. ⁵ Daas muop nanyi mǝ yaa war nmǝn mwaan gǝ mǝ kang mǝn gǝyil Truwas. ⁶ Ndangkong ɓit Gapɗel mǝn mǝ nyit Filipi mǝ ruo nchii am, mǝ chin ɓit paat mǝn mǝ ruo nTruwas. Mǝ tugat nnǝgǝn ɓit pogovǝl. ⁷ Par ɓit wupel nnǝgǝn shiimuos, mǝ wul mǝ tugat dǝr tarap nawe, mǝn Bulus laa ɓǝlǝp gǝ muop wu mǝpen naduk. Laa ɓǝlǝp ba pee mwaan gǝ chagat niy gǝkaa, nsa naa kat ɓit nɓang ɓǝ ji nyit pee nanyi. ⁸ Dok til-ngong gwet nɗǝgǝn lǝ wu mǝ tugat nnǝgǝn hǝ. ⁹ Mǝ laaswaal sǝm muup a Yutikus tong ɗok fufung mǝn saam tǝ nyi. Bulus laa ɓǝlǝp ɗem lat mou mǝn dagwar pǝttaa ngǝnookpee mǝn muut; mǝ mang nyi a kum dat. ¹⁰ Mǝn Bulus sam kat nyi, mǝn ɓuǝt shik kaa lalaa nanyi mǝn ogom nyi. Mǝn yen, "Gu weel zak mou, nsa nyi nkagam." ¹¹ Lat mǝn kaa yaa gǝ mǝleng shizak mǝn tarap nawe mǝn sǝ. Chin laa ɓǝlǝp veet, wul nkangǝɓit mǝn nyit muop. ¹² Mǝ mang lalaa nanyi nkagam mǝn took muop pya. ¹³ Mǝn gǝ kaasun mǝ mwaan ɗekaa Bulus nɗǝgǝn chii am mwaan mǝ ruo nAsos npe ɗewar mǝ mang nyi yi nchii. Nyang yen gǝ ji mwaan a gǝwar. ¹⁴ Mǝ kat sun nAsos mǝn mǝ mang nyi nɗǝgǝn chii am mǝ mwaan nMitilini. ¹⁵ Lat mǝn mǝ yigil nɗǝgǝn chii am, mǝ chin ɓit gǝme mǝn mǝ ruo ngan mǝpe wu batyit naa gǝchungpe n-am Kiyos. Ɗaar mǝ gǝchungpe n-am Samos, ndangkong ɓit gǝme mǝn mǝ ruo gǝfǝr Militus. ¹⁶ Bulus dok ɗel shi Afisa ya ba nung muut ndǝm nAsiya; nsa dok nyi bǝr-bǝr ɗewar, ɗyin ɗem-a-kat ɓǝ, rǝ nUrishalima npe ɓit Pentikos. ¹⁷ Nyi nnǝgǝn nMilitus mǝn tak lep mǝ yong daskagam gǝwur gurum Naan muop nAfisa. ¹⁸ Jya mǝ wul mǝn laa gǝmuop yen, "Gun gǝ kaasuk gu man par ɓit wu a wul nAsiya hǝ, bii mǝ tugat a tong gǝgun. ¹⁹ A wap Naan nɗǝgǝn kaaleen gǝ namwaa nsa tǝgǝrchiin wu a sua shi gwak wu Yahudawa mǝ lǝng n-an hǝ. ²⁰ Gu man a sok mǝbi fugu wu gǝ kyen gun mou. A sheepee gǝnaar gurum dar, gǝ shilǝ-shilǝ; ²¹ a twamshik ntagam Yahudawa muop gǝ Hellinawa gǝkaa bat lap ɓǝlǝp Naan gǝ pǝn-naduk nɗǝgǝn Miskagam amu Yesu. ²² Gu naa gǝdet nhǝ an gǝwar mwaan nUrishalima, Mǝrip Naan laa gǝ an kam, a man bii wu gǝ kat an nnǝgǝn mou; ²³ Mǝrip Wuret laa gǝ an nkwǝt pee wu a rǝ hǝ ɓǝ kwanyok gǝ tǝgǝrchiin muop fu kang an. ²⁴ Mǝn a naa a kat tenglang gǝnǝ a mǝbi dǝr nǝ mou, ɗyin a yak gǝsǝ mǝn a chin ɓǝlang wu Yesu pǝn an hǝ mwaan a rǝ nogot, mǝn a twamshik kǝ langship gǝ chinɗong Naan. ²⁵ A man nkwǝt gun dip wu a shakɓǝlǝp yil-long gǝnaar gu, she gu naa an shizak mou. ²⁶ An fu laa gǝgun chinyi nkwǝt sar nǝ paat, an gǝ zhirii mǝgwuo nkaanǝ mou. ²⁷ Nsa a sok mǝbi fugu wu Naan ɗemkop mou. ²⁸ A waa nnyi gu kangsuk, tung tǝm wu Mǝrip Wuret ɗǝk nsar gu hǝ. Gu lǝng en gu gutap gǝwur gurum Naan wu Yesu kwatkaa shi tǝgǝm gǝfe hǝ. ²⁹ A man wagap a nyit gun nlat ɓǝ as-laar gǝ mǝ ruo gǝnaar gu, mǝn gǝ mǝ nyit tung tǝm nanyi muop. ³⁰ A man pak gurum gǝnaar gu gǝ mǝ yigil nbat naduk nsǝp ɗewar mǝ nwagar jepgǝdǝr yi nwak nǝmuop gǝnyi. ³¹ A waa nnyi, gu lǝng en gu grǝt. Gu man nkwǝt a chin yii kún gǝnaar gu an fu shee gun gǝ namwaa n-yitnǝ, nlǝpar gǝ fuus. ³² Gǝɗes hǝ a nyit gun gǝsar Naan gǝ ɓǝlǝp chinɗong wu gu fyar nɗǝgǝn gǝfe. A nyi gǝ pǝn byiteerkop ngun gǝnaar muop wusǝsaar. ³³ Jet a chaa azurfa, gǝ zinariya gǝ byaat mǝgwuo mou. ³⁴ Gun gǝkaasuk gu man nkwǝt a chin ɓǝlang gǝsar nǝ mǝn a sǝ gǝ san nau gǝ gurum gǝdǝr nǝ muop. ³⁵ Nɗǝgǝn jepe nhǝ nau, a nyit byiɗying ɗewar gu epɓǝt tǝguk muop yi, mǝn ɗewar gu ɗye dǝr ɓǝlǝp Miskagam Yesu wu yen, "Gǝ shen ɓǝ gǝ kat kopgǝshii ma wu gǝ lap." ³⁶ Ndangkong laa ɓǝlǝp kam, mǝn dugum mǝn ɗangnaan gǝpegǝme gǝ muop. ³⁷ Gurum mǝ mang wal mǝn mǝ ogom Bulus mǝn mǝ kangfu gǝnyi. ³⁸ Took muop dam nsa yen nua shee n-naa yit nyi shizak mou. Lat mǝn mǝ takdǝr muup gǝpe chii am.