¹ Shi wu Apolos dok kutnyi nKorinti mǝn Bulus ɗel war gǝdeel mǝn ji gǝfǝr Afisa mǝn kat pak jepgǝdǝr nnǝgǝn. ² Bulus nang fu muop yen, "Dok gu lap Mǝrip Wuret shi wu gu pǝn naduk hǝ a?" Mǝ yen, "Hayau, jet mǝ kǝlǝng mǝbi kǝ Mǝrip Wuret mou." ³ Bulus yen, "Dok mǝ kǝn gun a nɗǝgǝn mǝ dat ee?" Mǝ yen "A shi kǝnpe nung Yahaya." ⁴ Bulus lap yen, "Kǝnpe nung Yahaya a dǝr gurum mǝ bat yi nyit wubyas. Dok nyi Yahaya laa gǝ gurum yen nua pǝn naduk ngwuo wu gǝ wul ndangkong nyi hǝ; gwuo nanyi a Yesu." ⁵ Gurum mǝ kǝlǝng kam, mǝn mǝ kǝn muop nɗǝgǝn sǝm Miskagam Yesu. ⁶ Bulus lǝng sar kaa muop mǝn Mǝrip Wuret sam kaa muop, mǝn mǝ laa ɓǝlǝp gǝ ɗǝgǝl dǝɗyak-dǝɗyak mǝn mǝ laa-ɗǝgǝnɓǝtnaan. ⁷ Dok daas sarkaavǝl. ⁸ Bulus rǝ nlǝwap mǝn chin tar kún nyi fu laa ɓǝlǝp gǝ tugurduan, nyi fu ɓǝlǝp-ɓagal mǝn gwaan kǝ yil-long Naan. ⁹ Mǝn pak Yahudawa wu ɓakpe mǝ nyang, mǝ watyit War nanyi ntagam gurum wukǝrgǝi. Lat mǝn Bulus nyit muop mǝn kok pak jepgǝdǝr, mǝn chan ɓagalshk gǝmuop shiɓit-shiɓit nɗǝgǝn lǝ shee nungTiranus. ¹⁰ Yii vǝl nyi fu chin kam; gurum muop wu nAsiya, Yahudawa gǝ Hellinawa, dip mǝ kǝlǝng ɓǝlǝp Miskagam. ¹¹ Naan chan ɗyeer gǝsar Bulus, ¹² mǝn gurum mǝ lap byaat fwas yit muup mwaan mǝ ɓuam wugok muop gǝnyi mǝn mǝ kat kagam, mǝn damwam fat nyit muop. ¹³ Mǝn pak Yahudawa muop wuchen-damwam mǝ ɗyileng war ngan pee nanyi. Mǝ yong sǝm Yesu ɗewar mǝ chen damwam yi mǝ yen, "Nnǝgǝn sǝm Yesu wu Bulus nyi fu kuut hǝ, mǝ sat ngun gu fat." ¹⁴ Ndaawang Yahudawa wukakǝgǝt wu sǝm a Skeva dok nyi gǝ jep pogovǝl, a muop dok fu chan bii nakam. ¹⁵ Me damwam lap fu muop yen, "A man Yesu, a man Bulus; ɗe gun a wuɗa muop yi?" ¹⁶ Damwam nanyi pǝt nshik dagwuo wugok mǝn rǝ kaa mǝ chen nyi mǝn nas muop bar-bar. Shen gok nmuop mǝn mǝ suo fat ngum. ¹⁷ Yahudawa gǝ Hellinawa dip wu nAfisa mǝ man ɓǝlǝp nanyi. Mǝ yigil badǝn, mǝn sǝm Miskagam Yesu kat yoon. ¹⁸ Gurum gwet wu mǝ pǝn naduk mǝ jya mǝ seer wubis gǝdu. ¹⁹ Gurum gwet wu gǝ chan daat hǝ, mǝ wagar bang-byiran gǝdu nuang gǝyit gurum dar. Mǝ kun shagal jepe wu mǝ nuang hǝ, mǝn waarǝ kam paat. ²⁰ Mǝn ɓǝlǝp Miskagam haan wagap fuǝǝr. ²¹ Bulus chin ɓǝlang gǝnyi lat nAfisa, mǝn yagal gǝwar mwaan nUrishalima mǝn bat war gǝyil Makidoniya gǝ Akaya, yen, "A yagal nnǝgǝn ɓǝ a mwaan nRom a tiit." ²² Bulus lep Timoti muop gǝ Erastus mǝ mwaan nMakidoniya. Mǝn nyi ɗe nAfisa ɗǝng lee. ²³ A shide mǝn ɗǝgǝl-nyangshak yagal ɓaan-ɓaan gǝyil Afisa gǝkaa War nanyi. ²⁴ Mǝ wusugum sǝm muop a Dimitriyas chan natoon nung Diyana, mǝn bii mǝsugum mǝ kat shagal gwet a shik. ²⁵ Lat mǝn tǝl kǝ mǝsugum muop mǝn yen, "Daskagam, gu man bii mǝ kat gwet a shi ɓǝlang nhǝ. ²⁶ Gǝɗet nhǝ gun fu naa gun fu kǝlǝng nkwǝt bii nanyi a gǝyil Afisa dat mou, mwaan gǝrǝ gǝyil Asiya dip, Bulus nyi fu gwaan gurum gwet baa gǝnyi. Nyi fu laa gǝtap naan waakot wu mǝ chin shi sar mou. ²⁷ Gu man a lǝtuk amu dat gǝ lat mai, lǝwap Diyana (naan wumat) zak gǝ waa wubaan. Nyi wu gurum Asiya gǝ gǝyil nau fu wap nyi hǝ, gǝ lat baan." ²⁸ Mǝ kǝlǝng kam mǝn tuub muop lee, mǝn mǝ jor ɗǝgǝl du mǝ yen, "Diyana nung Afisa a naan wuyoon!" ²⁹ Mǝn pee yagal rǝng dat dip gǝfǝr nanyi, gurum mǝ fat mǝt-mǝt mwaan gǝpee gyaa. Dok mǝ yak Gayus gǝ Aristakus, mǝshaar mwaan Bulus muop gwe. Dok mǝ tugat a nMakidoniya wul yi. ³⁰ Bulus nyi gǝwar rǝ gǝnaar gurum wukǝrgǝi mǝn jepgǝdǝr mǝ dǝn shimuup. ³¹ A kam shizak, pak shaarmuup wunan gǝyil Asiya mǝ lang lep laa gǝnyi nkwǝt nyi nrǝ gǝpee gyaa nanyi mou ³² Gurum ɗe gǝ mǝ laa ɓǝlǝp dat vuu nsa kang rǝng muop. Pak muop man bii wu wul gǝmuop mou. ³³ Pak gurum wukǝrgǝi mwaan mǝ laa gǝ Alekzanda wu dok Yahudawa mǝ tugun a nyi tak ntagam hǝ, mǝn ep sar ɗewar yakshii yi ngurum wu jya mǝ ɗyam hǝ. ³⁴ Gurum mǝ man nkwǝt nyi a mǝgwuo Yahudawa mǝn mǝ chin jor ɗǝgǝl du veet, muop fu yen, "Artimis nung Afisa a naan wuyoon!" ³⁵ Wubyiyil gǝfǝr sat ngurum mǝ ɗok mǝn yen, "Gun gurum Afisa, a wuɗang nyang nǝ nman nkwǝt Afisa lǝwap Diyana wuyoon gǝ riin wudok tong gǝbǝtǝng sam yi? ³⁶ Gu man nkwǝt mǝgwuo gǝ ɓagal mou; a waa nnyi, ɗong nyin gu ɗok kit mǝn gu chin mǝbi gǝ dǝfil mou. ³⁷ Gu jya gǝ daas muop hǝ gǝpe sheep, muop wu mǝ mwaan wat mǝbi nlǝwap mou, mǝ laa wubis kǝ naan amu mou. ³⁸ A waa nnyi, ɗyin Dimitrus gǝ gogot mǝsugum muop gǝ pampe gǝkaa mǝgwuo ɓǝ fulǝ sheep a ǝ-ep, mǝsheep muo nnǝgǝn. Ɗagat muop pamshak yi. ³⁹ Ɗǝ gu kwǝt a gǝ nde ɓǝlǝp ɗyik, ɓǝ mǝ laa gǝɓang gǝnaar gurum. ⁴⁰ Nsa gurum em mǝ nnaa wubis gǝmu gǝ jagar wu taa chinyi nhǝ. Ɗong ɗyin ɓǝlǝp roop ndung ntaa mou, nsa ɓoot npe yakshii mou." ⁴¹ Lat mǝn sat ngurum mǝ wak.