¹ Bulus mwaan zak yaa nDerbe gə Listra mən kat me lagədər nnəgən, səm muup a Timoti, nəgən muup a gurum Yahudiya wu pən naduk hə; ndaa muup a gurum Hellinawa. ² Gurum Listra gə Ikoniyum mə laa ɓələp wuret ka Timoti. ³ Bulus ɗemkop nyi nmwaan gədər nyi, mən gapdəp muup nsa gurum Yahudawa nnəgən mə man ndaa muup a məgwuo Hellinawa ⁴ Mə mwaan shi gǝfǝr-gǝfǝr muop fu dwam byitǝt wudok jeplep gə daskagam Urishalima mə yil pǝn hə. ⁵ A waa nnyi mən kwak gǝwur gurum Naan muop nnəgən kwas nɗǝgǝn pǝn-naduk, mən mǝ kat gurum wu lǝngǝdǝr muop gwet shiɓit-shiɓit. ⁶ Bulus muop gə məshaar mwaan gəfe mə mwaan ngan Frijiya gə Galatiya nsa dok Mərip Wuret dən shakɓələp Naan shimuop gəyil Asiya. ⁷ Dok jya mə wulduk gə Misiya, muop dər mwaan nBitiniya, mən Mərip Yesu dən shimuop. ⁸ A waa nnyi mən mə ɗyiləng shi Misiya mə mwaan nTruwas. ⁹ Nləpar mən Bulus naa məbi nkaa: me dagwuo Makidoniya ɗarɗok fu yong nyi yen, "Ji dər mu nMakidoniya ji gə epɓət mu." ¹⁰ Bulus naa dat kam mən mǝ yagal bər mǝ mwaan nMakidoniya nsa man nkwət a Naan yong mǝn ɗewar mǝ shakɓələp langship yi nmuop. ¹¹ Mə yigil nTruwas mən mə mwaan mə yaa nSamotras, ɗaar mə fat mən mə ruȯ nNyapolis. ¹² A nnəgən mən mə mwaan Filipi wu me gəfər Makidoniya hǝ, a nyi a maa gogo gǝfǝr muop dip ngan nanyi, mǝn a gǝyil Rom gǝ naa kaa muup, mə tugat nnəgən ɓit nɓǝl. ¹³ Par Ɓitnyak mən mə fat gəɓang mə mwaan fukyep kong, mə ɗye mə kat pee ɗangnaan kwǝt nnəgən. Mə tugat mə laa ɓələp gə surəp wu mə tǝl kəshak nnəgən hə. ¹⁴ Me namat langkom kələng ɓələp Naan yi nfu mu, səm muup a Lidiya, nyi a gurum Tiyatra, bii gə sarap gə byaat məlong muop, nyi a wuwap Naan. Miskagam ep kom muup kələng ɓələp wu Bulus laa hə yi. ¹⁵ Dok mə kən nyi gə gurum gəfe nau lat mən ɗwak mən yen, "Ɗə gu kat an a wu ɗarɓal ntagam Miskagam, ɓə jya gu tugat lənə." Mən gwaan mən. ¹⁶ Dok mǝn gǝwar mwaan gǝpe ɗangnaan mǝn me namat wu gǝ mǝrip koos paa kang mǝn. Mǝnan gǝfe bii mǝ kat shagal shimuup nsa koos paa nanyi. ¹⁷ Namat nanyi yagat langǝdǝr mu gǝ Bulus gǝ aar ɗǝgǝl yi yen, "Daas muop hǝ a gurum Naan Wumaa. A muop fu kam war angkaa ngun." ¹⁸ Chan kam ɓit nɓǝl. Mǝn dǝfil mang Bulus dogol gǝnyi, mǝn bat laa gǝ mǝrip nanyi yen, "A laa gǝgǝ nɗǝgǝn sǝm Yesu Kristi pǝt gǝ nyit namat nhǝ." Mǝn pǝt wagap bǝr. ¹⁹ Mǝpyan namat nanyi mǝ naa kat war shagal gǝdu dugur mǝn mǝ dǝl Bulus gǝ Silas mwaan gǝnaar lǝtuk gǝmuop ntagam mǝnan. ²⁰ Mǝ jya gǝmuop ntagam mǝsheep mǝn mǝ yen, "Gurum muop hǝ fu dungpe gǝfǝr amu. Muop a Yahudawa. ²¹ Muop fu sheepee gǝ bii wu gurum Rom gǝ mǝ chan mou." ²² Lat mǝn gurum wukǝrgǝi kwal Bulus muop gǝ Silas; mǝsheep muop mǝ tee byaat gǝdu mǝn mǝ takpe ɗewar mǝ nas Bulus gǝ Silas yi shi dam shigal. ²³ Mǝ slam muop shi nas lat mǝn mǝ ɗǝk muop nlǝɓal, mǝn mǝ laa dǝr wupin lǝɓal kangkaa muop ɗong-ɗong. ²⁴ Wupin lǝɓal kǝlǝng kam mǝn ɗǝk muop ngulung mǝn ɗyan kwak muop lǝ shi kukshep. ²⁵ Nkang pechagat mǝn Bulus muop gǝ Silas fu ɗangnaan gǝ see pyap Naan ɗe gogot muop wu nlǝɓal fu kǝlǝng. ²⁶ Lat mǝn yil sugun gǝret ba kugur lǝɓal nanyi yok; gǝ laa mou mǝn fule ap mǝn teng wu mǝ ɗyan kwak muop gǝnyi hǝ wat. ²⁷ Mǝ yong wupin lǝɓal nsaam mǝn yagal kat fulǝɓal nanyi dip a wu ǝ-ap; lat mǝn shang chuk npe tǝshik, nsa ɗye kat muop wu nlǝɓal nanyi mǝ fat gwe lǝn. ²⁸ Mǝn Bulus tak ɗǝgǝl yong, "Gǝ tǝ sak mou, mǝn nau npeen." ²⁹ Lugut tǝ wupin lǝɓal ba ɗam; lat mǝn tang wus ɗǝ naa pee yi mǝn rǝ nlǝɓal nanyi mwaan gǝ pal ntagam Bulus muop gǝ Silas ³⁰ mǝn fat gǝɓang gǝ muop mǝn yǝn, "Daskagam a chin a nah a kat angkaa yi?" ³¹ Mǝ lap yǝn, "Pen naduk nMiskagam Yesu, ɓǝ gun gǝ gurum lǝgǝ gu kat angkaa." ³² Mǝ laa ɓǝlǝp Miskagam gǝnyi nu gǝ gurum lǝmuup. ³³ Lat mǝn kok muop nlǝpar nanyi mwaan gǝ vang shel gǝmuop mǝn mǝ kǝn nyi bǝr nau gǝ gurum lǝmuup. ³⁴ Rǝ gǝ Bulus muop gǝ Silas gǝ lǝmuup mǝn pǝn sǝ nmuop, took muup pya badǝn nau gǝ nung gurum lǝmuup nsa mǝ kat du pǝn naduk nNaan. ³⁵ Ɓit ɓang mǝn mǝsheep mǝ lep dǝr muup mǝ yen, "Nyit gurum muop nanyi mǝ wak." ³⁶ Wupin lǝɓal laa gǝ Bulus yen ,"Mǝsheep mǝ yong a nyit gun gu wak; gu fat dat gu wak chagap." ³⁷ Mǝn Bulus lap fumuop yen, "Mǝn a gurum Rom mǝn mǝ nas mǝn gǝtal nǝ nsheep, mǝn mǝ ɗǝk mǝn nlǝɓal. Gǝɗet nhǝ mǝ ɗemkop du tagat mǝn gǝsok a? Hayau! Laa gǝmuop jya mǝ fat gǝ men." ³⁸ Wupin lǝɓal mwaan gǝ laa dǝr mǝsheep muop. Mǝ kǝlǝng nkwǝt Bulus muop gǝ Silas a gurum Rom mǝn mǝ yigil lugat. ³⁹ Mǝsheep nanyi jya mǝ ɗwak Bulus muop gǝ Silas mǝn mǝ fat gǝ muop mǝn mǝ laa gǝmuop mǝ nyit gǝfǝr nanyi. ⁴⁰ A nyi mǝn Bulus gǝ Silas mǝ fat mwaan lǝ Lidiya. Shi wu Bulus gǝ Silas mǝ kat mǝjepnǝgǝn mǝn mǝ kwaskwak muop mǝn mǝ nyit gǝfǝr nanyi.