¹ Mǝ gurum mǝ tugat nYahudiya sam yaa nAntakiya mǝ she gurum mǝ yen, "Nyang mǝ ngap dǝp mǝgwuo kabi wu Musa laaɗen hǝ mou, ɓǝ gwuo nanyi gǝ kat angkaa mou." ² Bulus muop gǝ Barnabas mǝ ɓagalshik suet gǝ muop gǝkaa ɓǝlǝp nanyi. Lat mǝn mǝ tagat pak gurum lǝ shiɓǝt Bulus gǝ Barnabas mǝn mǝ lep muop mwaan dǝr jeplep gǝ daskagam nUrishalima ɗewar mwaan mǝ yakdang ɓǝlǝp nanyi yi. ³ Muop wu mǝ lep muop nanyi mǝ ɗyilǝng war gǝyil Finikiya gǝ Samariya mǝ dwam yi nkwǝt Mǝjong mǝ bat lap ɓǝlǝp Naan. Took mǝjepnǝgǝn muop pya ge ɓǝlǝp nanyi. ⁴ Jya mǝ wul nUrishalima mǝn gǝwur gurum Naan gǝ jeplep gǝ daskagam mǝ kaat muop, mǝn mǝ yakdang jepe wu Naan chan nmuop hǝ dip. ⁵ Mǝn pak Farisiyawa wu mǝ pǝn naduk hǝ, mǝ yigil ɗyam, mǝ yen, "A tiit gǝ mǝ nkwap dǝp muop yi mǝn mǝ nlaa gǝ muop mǝ nkang byitǝt wu Musa dok shen hǝ." ⁶ Lat mǝn jeplep gǝ daskagam mǝ tugat ɗewar mǝ naa ɓǝlǝp nanyi yi. ⁷ Ndangkong mǝ arap fushak wagap pogot gǝ ɓǝlǝp nanyi mǝn Birtus yagal yen, "Mǝjepnaa, gu man nkwǝt Naan dok shang an gǝnaar gu ɗewar Mǝjong mǝ kǝlǝng langship yi nfunǝ npe mǝ pǝn naduk yi. ⁸ Naan wu man bǝzung gurum a nyi twamshik kaa muop, pǝn Mǝrip Wuret nmuop kabi wu pǝn nmǝn hǝ; ⁹ pǝnyit mu mou. A nyi vang bǝzung muop shi pǝn-naduk. ¹⁰ Nkwǝt a kam ɓǝ gu katshii Naan a; lee wu mǝn gǝ ndaamu muop dok mǝ ɓoot mang mou, ɓǝ mǝ sat nmuop mǝ mang a waa nme? ¹¹ Muop mǝ pǝn naduk kabi mǝn hǝ, nkwǝt gǝ mǝ kat ankaa a waa nsa chinɗong Miskagam Yesu." ¹² Gurum wukǝrgǝi mǝ ɗok kot mǝ kǝlǝng Barnabas gǝ Bulus mǝ yakdang byinyin gǝ ɗyeer wu Naan chin gǝsar muop gǝnaar Mǝjong yi. ¹³ Mǝ yakdang lat mǝn Yakubu lap yen, "Mǝjepnaa, gu lǝngkom gu kǝlǝng an yi. ¹⁴ Simon laa bii wu Naan chin ɗepin Mǝjong wak gurum gǝfe yi. ¹⁵ Bii nanyi waa nchat gǝ lǝfu mǝlaa-ɓǝlǝpnaan, kabi wu mǝ ran ɗen hǝ, ¹⁶ 'Dankong jepe muop hǝ ɓǝ a chin a wul, ji a bǝn a ɗyik lǝ Dauda wu ship hǝ; gǝ a bǝn a ep nyi a lang, ¹⁷ ɗewar gǝshang gurum mǝ tang Miskagam yi, nau gǝ Mǝjong wu muop a nǝmaan hǝ.' ¹⁸ Naan wu chan jepe wu mǝ man ɗagat nmok hǝh, a nyi laa ɓǝlǝp nanyi. ¹⁹ A waa nnyi, a fu nǝmaan, ɓǝ a kat ɗong nyin mǝ weel Mǝjong wu mǝ bat yit du dǝr Naan hǝ mou. ²⁰ Mǝ yil mǝ laa gǝmuop nkwǝt mǝ nyit wap natoon, gǝ ɓwaar, gǝ lua wu magar took ɗǝ muut yi, gǝ tǝgǝm. ²¹ Nsa jet mǝ gǝ shakɓǝlǝp Musa gwe ɗagat-ɗagat shi gǝfǝr dǝɗyak-dǝɗyak; jet gǝ mǝ bil nyi nlǝwap par Ɓitnyak." ²² Lat mǝn jeplep gǝ daskagam gǝ gǝwur gurum Naan dip mǝ kat ɗong ɗyin mǝ ntagat Yahuza wu gǝ mǝ yong nyi shi Barsabas, gǝ Silas wu muop a mǝ-ntangam gǝwur gurum Naan hǝ, mǝn mǝ nlep muop mwaan nAntakiya gǝpe gǝme gǝ Bulus gǝ Barnabas. ²³ Lat mǝn mǝ yil mǝ yen, "Wudung tong a dǝr jeplep gǝ daskagam, mǝjepnung, mǝ yil ngun mǝjepnǝgǝn mu wu gun a Mǝjong gǝyil Antakiya, gǝ Siriya gǝ Kilikiya. Mǝ tal gun! ²⁴ Mǝ kǝlǝng nkwǝt pak gurum mǝ tugat dǝr mu jya mǝ ɓyak gun gǝ sheepee wu mang kǝr gu lang he. A mǝn mǝ lep muop mou. ²⁵ A waa nnyi mǝn dip mǝ ɗem mǝ tagat gurum yi gǝnaar mu mǝ lep muop dǝr gu gǝpe gǝme gǝ Barnabas gǝ Bulus, ²⁶ muop wu mǝ mang tugurnung gǝ tengklang gǝmuop nsa sǝm Miskagam amu Yesu Kristi. ²⁷ A waa nnyi mǝ lep Yahuza gǝ Silas ɗewar mǝ laa bii wu mǝ lep gǝnyi ngun shi fudu. ²⁸ Nsa Mǝrip Wuret kat ɗong, mǝn zak mǝ kat ɗong ɗyin mǝ pǝn lee wu tegen ngun ma wu jet tiit hǝ mou: ²⁹ gu nyet bii wu mǝ tok natoon gǝnyi, gǝ tǝgǝm, gǝ lua wu mǝ magar took, gǝ ɓwaar. Ɗǝ gu chin wudung ɓǝ gu kat tugatchagap. Mǝ nyit gun." ³⁰ Lat mǝn muop wu mǝ lep nanyi mǝ sam ya nAntakiya; sam mǝ tǝl gurum mǝn mǝ pǝn byiyil-lep nanyi. ³¹ Muop zak mǝ bil lat mǝn took muop pya nsa kwaskwaw muop. ³² Yahuza gǝ Silas wu muop a mǝlaa-ɓǝlǝpnaan hǝ, mǝ kar mǝjepnǝgǝn nanyi mǝn kwak muop ɓal. ³³ Ndangkong mǝ tugat nnǝgǝn pogot mǝn mǝ shendǝr muop wak yaa gǝpe wu dok mǝ lep muop hǝ. ³⁴ . ³⁵ Bulus gǝ Barnabas mǝ ɗe nAntakiya dǝr gogot muop. A nnǝgǝn mǝn mǝ shakɓǝlǝp Miskagam. ³⁶ Ɓit fat vǝl mǝn Bulus laa gǝ Barnabas yǝn, "Mǝ mwaan pee wudok mǝ zaar hǝ, mwaan mǝ tal mǝjepnǝgǝn gǝpe wudok mǝ shakɓǝlǝp Miskagam hǝ, man ɓǝ mǝ naa myaar gǝmuop." ³⁷ Barnabas dok ɗemkop mang Yahaya wu gǝ mǝ yong shi Markus hǝ mwaan gǝ nyi. ³⁸ Mǝn Bulus zak kat ɗong ɗyin Markus nmwaan gǝdǝr du mou, nsa dok yak nyit muop nPamfiliya, nyang mwaan ɓǝlang gǝdǝr muop. ³⁹ A nnǝgǝn mǝn ɗǝgǝl muop nyangshak mǝn mǝ kwapshak. Barnabas mang Markus mǝn mwaan NSiprus. ⁴⁰ Bulus mang Silas, ndangkong mǝjepnǝgǝn mǝ ɗangnaan kaa muop, mǝ ɗǝk muop gǝsar chinɗong Miskagam mǝn mǝ yigil. ⁴¹ Lat mǝn mwaan nSiriya gǝ Kilikiya nyi gu kwaskwak gǝwur gurum Naan muop nnǝgǝn.