¹ Lat mǝn Bulus gǝ Barnabas mǝ ruo nlǝwap nung Yahudawa gǝyil Ikoniyum mǝ laa ɓǝlǝp wagap gǝret mǝn Yahudawa gwet gǝ Hellinawa mǝ pǝn naduk. ² Mǝn pak Yahudawa wu ɓakpe mǝ pat Mǝjong ɗewar mǝ nyang ɓǝlǝp Bulus muop gǝ Barnabas yi. ³ A waa nnyi mǝn mǝ tugat nnǝgǝn veet mǝ laa ɓǝlǝp Naan gǝ tugurduan. Naan zak lap gǝdǝr muop gǝkaa lep chinɗong wu pǝn muop hǝ. Nyit Bulus muop gǝ Barnabas mǝ chan byinyin gǝ ɗyeer nnǝgǝn sǝm muup. ⁴ Mǝn ɗǝgǝl gurum gwet nyangshak: pak mǝ lapgǝdǝr Yahudawa, pak mǝ lapgǝdǝr jeplep. ⁵ Dok Mǝjong gǝ Yahudawa muop mwaan mǝ gwaan mǝlǝntagam gǝmuop ɗewar mǝ chinkǝlǝng mǝ zwam Bulus muop gǝ Barnabas yi shi pang. ⁶ Bulus muop gǝ Barnabas mǝ man bǝshik mǝn mǝ suo waklap gǝyil Likoniya gǝ Listra gǝ Derbe gǝ gogot gǝyil ngan nanyi, ⁷ mǝn mǝ shakɓǝlǝp langship nnǝgǝn. ⁸ Me dagwuo gǝyil Listra nyi a wukut. Gǝsǝm nǝgǝn muup laa nyi jet mwaan-mwaan mou. ⁹ Dagwuo nanyi kǝlǝng Bulus fu laa ɓǝlǝp. Bulus lang yit kaamuup mǝn naa kat dagwuo nanyi gǝ bǝzung pǝn-naduk npe ɗǝ kat kagam yi. ¹⁰ Lat mǝn ep ɗǝgǝl muup laa gǝ nyi yen, "Yagal ge ɗar gǝ shii gǝ." Dagwuo paar, yagal ɗar mǝn ta fu mwaan. ¹¹ Gurum wukǝrgǝi mǝ naa bii wu Bulus chin mǝn mǝ ap ɗǝgǝl du mǝ laa ɓǝlǝp gǝ ɗǝgǝl Likoniya mǝ yen, "Naan muop mǝ sam dǝr mu gǝ swoopshik gurum." ¹² Mǝ yong Barnabas shi "Zus", mǝ yong Bulus shi "Hermes" nsa a nyi a wu ntagam laa ɓǝlǝp. ¹³ Wupin tugul wang Zus wudok lǝwang gǝfe dat ndangkong gǝfǝr hǝ, mwaan gǝ wawul gǝ nǝng gǝ jepe wap fukǝrang; nyi gǝ gogot gurum wukǝrgei dok mǝ ɗemkop tok naan gǝdu ashik. ¹⁴ Shi wu jeplep nanyi, Barnabas muop gǝ Bulus, mǝ kǝlǝng kam, mǝn mǝ yalang byaat gǝdu mǝn mǝ suo mwaan ya gǝnaar gurum wukǝrgei muop fu aar ɗǝgǝl ¹⁵ mǝ yen, "Mǝn a gurum kabi gun hǝ. A nah gun fu chin bii nakam yi? Mǝ wul a gǝ langship wuret ngun ɗewar gu nyit chak jepe dalak nhǝ gu lap Naan wu nkagam, wu chin gǝbǝtǝng gǝ gǝyil gǝ chip gǝ jepe wu nɗǝgǝn muop dip. ¹⁶ Dok nyit muop wu nmok mǝ chan jepe gǝwar wu mǝ man a nyi hǝ. ¹⁷ Nau gǝ kam, pǝn bii twamshik nnyi nsa nyit muop mǝ kat fan, mǝ ɗyap se gwet ɗǝ mǝ kat bii wu gǝ mǝ sǝ yi gǝ tookpya." ¹⁸ Nau gǝ ɓǝlǝp wu Bulus gǝ Barnabas mǝ laa hǝ, dok ɗǝ a ai dat den gurum gǝ mǝ chet byitot nmuop. ¹⁹ Mǝn pak Yahudawa wu tugat nAntakiya gǝ Ikoniyum jya mǝ fuǝn gurum wukǝrgǝi. Mǝ zwam Bulus shi pang mǝn mǝ del nyi pǝt tak gǝnookpe, mǝ naa mǝ kat kwǝt muut. ²⁰ Mǝn gǝshang jepgeder jya mǝ yaa Bulus waat mǝn yagal rǝ gǝfǝr. Ɗaar mǝ fat mǝn mǝ mwaan nDerbe muop gǝ Barnabas. ²¹ Ndangkong mǝ shak ɓǝlǝp langship gǝfǝr nanyi mǝn mǝ kat jepgǝdǝr nɓǝl, mǝn chin yigil waklap nListra, gǝ Ikoniyum gǝ Antakiya. ²² Mǝ kwaskwak jepgǝdǝr mǝn mǝ duantugur muop ɗewar mǝ tugat yi kwang nɗǝgǝn pǝn-naduk, mǝ yen, "Gǝ mǝ sua tǝgǝrchiin gwet she mǝ ruo nɗǝgǝn yil-long Naan." ²³ Mǝ twam mǝnan gǝnaar gǝwur gurum Naan muop mǝn mǝ ɗangnaan mǝn mǝ sǝnfu du, mǝn mǝ ɗǝk mǝnan nanyi gǝsar Miskagam wu mǝ pǝn naduk nnyi hǝ. ²⁴ Mǝ yigil nyit pee nanyi mǝn mǝ ɗyilǝng war gǝyil Pisidiya mǝ ruo nPamfiliya. ²⁵ Mǝ laa ɓǝlǝp nFirjiya mǝn mǝ sam yaa nAtaliya. ²⁶ A nnǝgǝn mǝn mǝ ɗyilǝng waklap nAntakiya pee wudok mǝ ɗǝk muop gǝsar chinɗong Naan npe ɓǝlang wu mǝ chin lat nhǝ. ²⁷ Dok mǝ wakruo nAntakiya mǝn mǝ yong gǝwur gurum Naan muop, mǝ yakdang bii wu Naan chin hǝ: ep fulǝ pǝn naduk nMǝjong muop. ²⁸ Mǝ tugat pogot nnǝgǝn gǝpe gǝme gǝ jepgǝdǝr.