¹ Dok mǝlaa-ɓǝlǝpnaan gǝ mə sheepee muop nɗǝgən gəwur gurum Naan nAntakiya. A muop a Barnabas, Saminu, (wu gǝ mə yong shi Nega) gə Lukiya gurum Kurane gə Managu, (wu mǝ yigil nlǝ gǝme gǝ Hiridus) gə Shawulu. ² Shi wudok muop fu wap Miskagam mǝn mǝ sǝnfu muop, mǝn Mǝrip Wuret yen, "Gu tagat Barnabas gə Shawulu n-an, ɗewar mə chin ɓəlang wu dok a yong muop kwat nyi yi." ³ Ndangkong mə sənfu, mə ɗangnaan, mən mə ləng sar kaa daas nanyi, mən mə shendǝr muop mwaan. ⁴ Barnabas muop gə Shawulu mə kələng ɗəgəl Mǝrip Wuret mǝn sam yaa gəyil Sulukiya, a nnəgən mən mǝ ruo n-am mwaan gǝchungpe Siprus. ⁵ Shi muop gəfər Salami hǝ, məm mǝ shakɓələp Naan nləwap nung Yahudawa muop. Mǝn Yahaya wu gǝ mǝ yong shi Markus hǝ təpɓǝt muop. ⁶ Mə zar gəchungpe Bafusa lat mən mə kat me wudaat, a me wulaa-ɓǝlǝpnaan wurum nung Yahudawa, səm muup a Bar Yeshua. ⁷ Wudaat nanyi yaa shaar gwopna Sergius Bulus, wudok a gurum wumanbii. Dagwuo nanyi yong Barnabas muop gə Shawulu nsa dok tangkop kələng ɓələp Naan. ⁸ Mən Elimas "wudaat" (bii mə bat səm muup a kam) watyit muop; mən tangwar ɗyin nbat en gwopna yi nbaa gǝnyi ngan pǝn-naduk. ⁹ Ni Shawulu wu gǝ mǝ yong nyi nau shi Bulus, wu nyi gə Mǝrip Wuret nshik hǝ, lang yit kǝr shi muup, ¹⁰ mən laa yen, Gə a laa Shetan, gə a wu fənpe gə bətbis. Gə a wu nyangyit jepe wukǝr. Gə nyi magar war Miskagam wu pət ɗeer hǝ mou a? ¹¹ Gəɗes hə, sar Miskagam nyi kaagə, yong gə vugum. Yong gə naa fus mou, pogot." Gə laa mou mən yit Elimas kwoo; mǝn taa mwaan gǝ tang gurum npe yaa sar muuop yi. ¹² Gwopnanaa bii wu taa mən pən naduk, nsa sheepe gǝkaa Miskagam rǝng nyi. ¹³ Bulus gə mǝshaar mwaan afe mə yigil nBafusa nɗəgən chii am mwaan nFirjiya gəyil Pamfiliya. Mən Yahaya nyit muop mən waadər Urishalima. ¹⁴ Bulus muop gə mǝshaar muup mə yigil nFirjiya mən mǝ yokjya nAntakiya gəyil Pisidiya. A nnəgən mən mǝ ruo nləwap Ɓitnyak mən mə tugat nnəgən. ¹⁵ Ndangkong mə bil byitǝt gǝ byiyil mǝlaa-ɓǝlǝpnaan mǝn wuntagam lǝwap nanyi lep dǝr muop yen "Məjepnaa, ɗyin gun gə bii laa wu gǝ kwaskwak mu, ɓǝ gu laa." ¹⁶ Bulus yagal ep sar mǝn yen, "Gurum Izraila gə gun wu bii gu pǝnmaa nNaan, gu lǝngkom gu kǝlǝng an yi. ¹⁷ Naan nung gurum Izraila kok ndaamu mən kaam seen muop shi wudok muop gəyil Masar hə, mǝn pǝt gǝmuop shi kagam gǝfe. ¹⁸ Zwat gə muop fu yii yagurumvəl ngǝgǝr. ¹⁹ Ndangkong wu rugup gəyil pogovəl nɗəgən Kanaan, mǝn pən yil gǝmuop ndaamu npe waa nǝmuop yi. ²⁰ Jepe nanyi chan dip a nɗǝgǝn yii ɗaa feer gə yagurumvǝl gǝfu-sar. A ndangkong jepe nhǝ dip mǝn Naan pən mǝsheep nmuop, waaji rǝ shi Samaila wulaa-ɓǝlǝpnaan. ²¹ Lat mən gurum mə tangkop long, mən Naan pən Saul laa Kish nmuop, nyi a gurum gǝseen Bilyaminu, ɗewar waa long yi dər yii yagurumvəl. ²² Ndangkong Naan shang nyi nlong, mən pəs Dauda a long nkaa muop. Naan dok laa ɓǝlǝp a gǝkaa yen, 'A kat Dauda laa Yessi a gurum wu bəzung nǝ mang, a nyi chan jepe wu a tangkop hə dip'. ²³ Naan pət gə wu angkaa a gǝseen muup npe Izraila, a nyi a Yesu wudok laa-ɗen hǝ. ²⁴ Bii nanyi mangɓǝm ɗagat she Yesu wul, shi wu Yahaya dwam kǝnpe nung bat dǝr gurum Izraila dip hǝ. ²⁵ Dok shi wu ɓǝlang Yahaya dǝr lat mǝn laa yen, 'Gu ɗye gu kat an a wuɗang eh? An a nyi mou. Gu ləng komgu, mǝgwuo kwǝt nwul ndangkong nǝ, a mak npe wut kugul kogop shi kwak muup mou.' ²⁶ Mǝjepnaa, gun wu a seen Ibrahim, gǝ muop wu gǝ mǝ wap Naan gǝnaar gu, mə lep gǝ ɓǝlǝp angkaa nhǝ a nmǝn. ²⁷ Nsa muop wu mə tugatɗok nUrishalima gǝ mǝnan gǝmuop dok mǝ man nyi mou, mən mə kǝgǝt lǝfu mǝlaa-ɓǝlǝpnaan wu bii guu bil shi Ɓitnyak hǝ, mən mə watyit muup. ²⁸ Shi wu mə kat chin mǝbi wu mak ɗyin mǝ ntǝ nyi mou, mǝn mǝ ɗokɓǝp mǝ ɗang Bilatus tə nyi. ²⁹ Mə kǝgǝtfu jepe wudok ran gwe kaa muup, mǝn mǝ sam kum muup shi tǝng ɗen ntugun. ³⁰ Mən Naan ep yi gənaar mǝdiɗəm. ³¹ Gurum wudok mə tugat nGalili sam gǝdǝr muup nUrishalima hǝ, mǝ naa nyi wagap ɓit nɓəl. A muop a mətwamshik kaa muup ntagam gurum. ³² Mən fu dwam a langshp nkwət bii wudok Naan laa-ɗen gə ndaamu muop hə ³³ kǝgǝt a kaa mu, mǝn wu a jep muop, shi wu ep Yesu ntugun hǝ. Kabi wu mǝ ran ɗen gwe nɗəgən See wuvəl hǝ: 'Gə a laanə, a waa ndaagǝ chinyi.' ³⁴ Nung wu ep nyi gǝnaar mǝdiɗǝm ya baa kum muup nwam hǝ Naan laa yen: 'Wuret wudok a pəs funǝ nkwǝt a pən Dauda a tiit hǝ, gǝ a pǝn gun.' ³⁵ A nyi a bii wu saa bən laa yi nɗəgən nde See yen, 'Par gə nyit gurum agǝ wuret nwam mou.' ³⁶ Nsa Dauda dok chin ɓǝlang wu Naan ɗemkop fu yii muup lat, mən muut; mə wum nyi shiɓǝt ndaa muup moup, mǝ kum muup wam. ³⁷ Ɗe a nyi wu Naan ep ntugun hǝ man wam mou. ³⁸ Məjepnaa, a tangkop gu man gǝtap mǝn fu shakɓǝlǝp konwubis ngun a nsa dagwuo hǝ. ³⁹ A nsa nyi, mǝgwuo npǝn naduk, ɓǝ pǝt nfu jepe wu byitǝt Musa dok ɓoot npe pǝt gǝnyi mou. ⁴⁰ A waa nsa kam, gu kang yong bii wudok məlaa-ɓǝlǝpnaan mǝ laa hǝ nkat gun. Dok mǝ yen, ⁴¹ 'Gu naa, gun mǝnyangyit, ɓǝlǝp yog gǝ rǝng gun mǝn gu lat baan; Nsa an fu ɓəlang gəshi yigil agu, A ɓəlang wu, wa mǝgwuo ndwam gǝgun, ɓǝ guu pǝn naduk mou.'" ⁴² Bulus muop gə Barnabas mə fat, mən gurum mə ɗang muop ɗepin ɓən jya mǝ laa ɓələp nanyi shizak par Ɓitnyak nde. ⁴³ Ndangkong vak ləwap, mǝn Yahudawa gwet gə gurum wu gǝ mə wap Naan Yahudawa mə ləngədər Bulus muop gə Barnabas. Mən Bulus muop gə Barnabas mǝ kar muop ɗewar mǝ ɗyam yi bǝɓal nɗəgǝn chinɗong Naan. ⁴⁴ Par Ɓitnyak nde mǝn gǝye a gurum gǝfǝr dip mǝ təl shak npe kələng ɓələp Miskagam. ⁴⁵ Yawudawa mə naa gurum wukǝrgǝi mən naalaa yaa muop, mən mǝ watyit jepe wu Bulus laa hə mən mə agas nyi. ⁴⁶ Mən Bulus muop gə Barnabas mə laa ɓələp gə tugurduan mə yen, "Dok tong a tiit mǝ nlaa ɓǝlǝp Naan a gǝgun yi pel. Baa mǝ naa mǝ kat gu nyang gwe, gu kat kan gu mak npe lap tenglang gǝgwoo mou, ɓǝ gə mə bat mə mwaan dər Mǝjong. ⁴⁷ Nsa Miskagam pənfu nmən a kam yong, 'A ɗen gǝ a wus wusaanpe dər Mǝjong, ɗewar mwaan ge angkaa yi gəyil wu njong.'" ⁴⁸ Mǝjong mə kələng kam, mən took muop pya mən mən pyap Miskagam. Gurum nɓəl wu mǝ ɗemyit muop gə tenglang hə, mǝ pǝn naduk. ⁴⁹ Ɓələp Naan haanpe ngan gəyil nanyi dip. ⁵⁰ Mən Yahudawa mə kar surǝp wu ɗyamɓal gə daas wunan gǝfǝr nanyi. Mə twang Bulus muop gə Barnabas mən mə chen muop fat gǝnyi ngǝnook gǝfǝr amuop. ⁵¹ Mən Bulus muop gə Barnabas mə fuas orong kwak du kon nmuop. Lat mən mə mwaan gəfər IKoniyum. ⁵² Mən took jepgədər pya, mən mouo gə Mǝrip Wuret.