¹ A shii wu nanyi mǝn long Hiridus yak pak muop wu gǝwur gurum Naan npe chin klǝng yi gǝmuop. ² Tə Yakubu emnəgən Yahaya gə nggoo. ³ Naa kat took Yahudawa muop pya gə bii nanyi mən yaa Bitrus zak. Dok a shi byisǝ nawe wu nǝ nkwǝt gǝ yis hǝ. ⁴ Yaa nyi tak nlǝɓal mǝn ɗǝk gǝwur mǝlek feer mǝ kang nyi yi; ɗye kat ɗə byisǝ Gapɗel nlat ɓǝ pǝt gǝnyi ngurum muop. ⁵ Shi wu Bitrus nyi nləɓal hǝ, mǝn gǝwur gurum Naan mə ɗangnaan gərǝt npe muup. ⁶ Nləpar wu Hiridus daar gə pǝt gǝnyi npe sheep hǝ, mǝn Bitrus dok teerɗok fu saam gəkang mǝlek vəl, mə ɗyan nyi shi tengshagal vəl, mǝ kangpe mə ɗyamɗok fuləɓal fu kang lǝɓal nanyi. ⁷ Me məwong Miskagam ji dar shiɓǝt muup, mən pee saan nɗəgən ləɓal nanyi. Chit Bitrus ntugur mən mii nyi, mən laa yen "Yagal bər," mən tengshagal shisar muup pətta. ⁸ Məwong nanyi laa gənyi yen, "Ɓyang byaat nshikgə mən gə ruan kogop." Mən Bitrus chin kam hə. Məwong nanyi laa yen, "Ǝbǝr byaat gǝgǝ mǝn gə langədərnə." ⁹ Lat mən Bitrus langədǝr məwong nanyi mǝn mə fat. Man nkwət bii məwong nanyi chin hə a naduk mou. Naa kat jin a fu sugun. ¹⁰ Mə ɗyiləng wukangpe wupel gə wuvəl, mǝn wakjya mǝ ruo fukǝrang shagal wu mwaan yaa gəfər hə; mən fukərang nanyi ep shi kaashik. Mǝn mǝ fat mwaan gǝwar, mǝn məwong nanyi nyit nyi waga bǝr. ¹¹ Yit Bitrus saan, mən yen, "A gəɗes hə a man kwət a Naan lep gə məwong afe mən shang an nsar Hiridus, gə bii wu Yahudawa mə ɗen endu gǝkaa hǝ." ¹² Naa kat kam, mən mwaan lə Mariya nəgən Yahaya wu gǝ mǝ yong shi Markus hə, pee wu gurum gwet təlkaa shak fu ɗangnaan. ¹³ Kwak fulə mən lareep wu a frang, sǝm muup a Roda mwaan gə naa. ¹⁴ Kǝlǝng ɗəgəl Bitrus, mǝn baa ep fulǝ mou nsa tookpya, yak gəsə mwaan nɗəgǝn lə, mwaan gə laa yen Bitrus ɗarɗok fulə. ¹⁵ Lat mən mə laa gənyi mǝ yen,"Kaa yi bat." Mǝn nyang yong a naduk. Mǝn mǝ yong "A mǝwong afe." ¹⁶ Bitrus a fu kwak fulə dat veet, mə ep fulə, mən mə naa nyi, mən rǝng muop. ¹⁷ Bitrus ep sar npe mə ɗok yi, mən yakdang bii wu Miskagam chin shang jin nɗəgən nləɓal yi. Yen, "Gu yakdang jepe nhə dǝr Yakubu gǝ gogot məjepnəgən." Mən yagal mwaan nde mǝpe. ¹⁸ Ɓit ɓang mən jagar taa gəkang mǝlek nsa bii wu kat Bitrus hə. ¹⁹ Hiridus tang nyi kat mou, mən nang ɗəgəl mǝkangpe muop, mən pənfu mən mə tuo muop. Mən yagal nyit Yahudiya mwaas nKaisariya sam gə tong nnəgən. ²⁰ Dok tuup Hiridus lee badǝn gə gurum Taya Sidon. Mə tǝl shak mǝn mǝ mwaan dər muup. Mə gwaan Blastus, gəɓəu long təpdər muop yi. Mə ɗang tugatchagap nsa dok gəyil amuop gə lap sə a gəyil long nanyi. ²¹ Məɓit mən Hiridus duu shik nɗəgən byaat long mən tong kə pǝtong-long; mən laa ɓələp gə muop. ²² Gurum mə lap wuwagar mǝ yen, "Ndung a ɗəgəl naan, a ɗǝgǝl gurum mou!" ²³ Gə laa mou mən me məwong Miskagam chit nyi, nsa pən yoon nNaan mou; nəyet mə aar nyi mən muut. ²⁴ Mən ɓələp Naan feer mǝn haanpe. ²⁵ Barnabas muop gə Shawulu mə lat lep amuop mən mə tugat nUrishalima wakjya gə Yahaya, wu gǝ mǝ yong shi Markus hǝ.