¹ Mǝ ɗyilǝng war gǝfǝr Amfipolis gǝ Apoloniya, mǝn mǝ ruo gǝfǝr Tasalonika; pee wu lǝwap Yahudawa muop nnǝgǝn hǝ. ² Bulus mwaan dǝr muop kawu jet gǝ chan hǝ, Ɓitnyak kún nyi fu ɓǝlǝp-ɓagal gǝ muop gǝkaa bang-byiran. ³ Ap ɗǝgǝn bang-byiran mǝn yakshii gǝmuop nkwǝt dok Kristi gǝ sua tǝgǝrchiin a lengwaar mǝn man ɓǝ yagal gǝnaar mediɗǝm. Laa yen, "Yesu wu a laa ɓǝlǝp afe gǝgun hǝ, a nyi a Kristi." ⁴ Pak Yahudawa muop mǝ ɗem mǝn mǝ lǝngǝdǝr Bulus muop gǝ Silas gǝ pak gurum Hellinawa muop gwet gǝ mǝnan surǝp. ⁵ Mǝn naalaa yaa Yahudawa muop wu mǝ nyang pǝn naduk hǝ, mǝn mǝ kok daas wu ɓǝtchan gǝ lǝtuk mǝn mǝ tǝl gurum wukǝrgǝi, mǝn gǝfǝr nanyi yagal kal gǝ jagar. Mǝ ruo nlǝ Yason gǝkaam npe mǝ fat yi gǝ Bulus gǝ Silas gǝɓang ntagam gurum muop. ⁶ Mǝ kat muop mou mǝn mǝ dǝl Yason gǝ pak mǝjepnǝgǝn mǝ mwaan gǝmuop ntagam mǝnan gǝfǝr nanyi muop fu aar ɗǝgǝl muop mǝ yǝn, "Gurum muop wu fu dam gǝyil hǝ, mǝ jya nau npeen. ⁷ Yason lap muop ɗǝk lǝnyi, a muop a wu ɓak byitǝt wu Kaisar ɗen hǝ; mǝ yen nde long nyi nnǝgǝn, sǝm muup a Yesu." ⁸ Gurum wukǝrgǝi gǝ mǝnan mǝ kǝlǝng kam mǝn ɓyak muop. ⁹ Mǝnan muop nanyi mǝ yak Yason gǝ mǝnyee muop mǝ kwat shagal, mǝn mǝ nyit muop wak. ¹⁰ Nlǝpar nanyi mǝn lep Bulus muop gǝ Silas mǝ mwaan nBeriya. Jya mǝ wul nnǝgǝn mǝn mǝ mwaan yaa nɗǝgǝn lǝwap nung Yahudawa muop. ¹¹ Gurum wu nnǝgǝn a wukǝr ma muop wu nTasalonika, nsa mǝ lap ɓǝlǝp Naan gǝ bǝzung muop gǝme, mǝ bil bang-byiran shiɓit-shiɓit ɗewar mǝ naa yi kwǝt a naduk oh. ¹² A waa nyi, muop gwet mǝ pǝn naduk gǝ pak mǝnan surǝp gǝ daas Hellinawa muop. ¹³ Yahudawa wu nTasalonika mǝ kǝlǝng nkwǝt Bulus nyi fu shakɓǝlǝp Naan nBeriya, mǝn mǝ mwaan nnǝgǝn mwaan mǝ tak jagar gǝkang muop. ¹⁴ Lat mǝn mǝjepnǝgǝn mǝ lep gǝ Bulus bǝr mwaan yaa fuchip mǝn Silas muop gǝ Timoti mǝ ɗe nnǝgǝn. ¹⁵ Gurum wu mǝ lǝngtagam Bulus hǝ, mǝ mwaan gǝnyi jong-jong gǝyil Aten. Bulus lep muop mǝ laa gǝ Silas gǝ Timoti mǝ jya dǝr muup bǝr. ¹⁶ Shi wu Bulus fu kang wul gǝmuop nAten mǝn kat naatoon ɓǝl gǝyil nanyi, mǝn dǝfil mang nyi. ¹⁷ Mǝn mǝ ɓagalshik gǝkaa ɓǝlǝp nanyi nlǝwap muop gǝ Yahudawa gǝ pak gurum wu gǝ mǝ wap Naan, nau gǝ muop wu gǝ lǝtuk hǝ. ¹⁸ Pak gurum Ipikuriya gǝ Stokiya mǝ kat nyi. Pak muop mǝ yen, "Ɗe wukaawang nhǝ fu laa a me?" Gogot mǝ yen, "Naa gǝye nyi fu yong gurum ɗewar mǝ lǝngǝdǝr Naan mǝjong yi," nsa dok nyi fu laa ɓǝlǝp a kǝ Yesu gǝ yagal ntugun afe. ¹⁹ Mǝ mang Bulus mwaan gǝnyi gǝnaar daskagam nlǝgǝt Ariyopagus mǝ yen, "Mǝ ɗemkop mǝ man sheepee gǝgǝ wufuo nhǝ. ²⁰ Nsa kom mu fu kǝlǝng pak jepe wufuo fugǝ. Mǝ ɗemkop mǝ man." ²¹ (Gurum Aten gǝ mǝzep muop wu nnǝgǝn bii mǝ ɗemkop lǝng kom du kǝlǝng jepe wufuo yi badǝn). ²² Lat mǝn Bulus yagal ɗar gǝnaar daskagam lǝgǝt Ariyopagus mǝn yen, "Gun daas Aten, a naa a kat gun a mǝ tang war Naan gǝret nɗǝgǝn jepe gǝgu nau. ²³ Nsa a ɗel war mǝn a naa jepe wu gun fu wap, mǝn a kat me mǝ rǝk-tok wu gu yil mǝbi gǝkaa gu yen, 'A nung Naan wu nǝ mǝ man hǝ.' Naan wu jet gun fu wap nǝ gu man hǝ, an fu dwam a nyi gǝgun. ²⁴ Naan wu chin gǝyil gǝ jepe nau hǝ, a nyi a Miskagam gǝbǝtǝng gǝ gǝyil, nyi bii gǝ tong nlǝwap wu mǝ ɗyak shisar mou. ²⁵ Mǝbi won nnyi ɗe a sar gurum gǝ shen nnyi mou, nsa a nyi bii shen tengklang gǝ nook ngurum gǝ jepe dip. ²⁶ Dok chin dagwuo a gǝme mǝn gogot gurum gǝyil dǝɗyak-dǝɗyak mǝ fat a nɓǝt muup, a nyi kam pǝtugat gǝ pǝlǝng gǝmuop gǝ pǝbat yii, ²⁷ ɗewar mǝ tang Naan yi, nɗong ɓǝ mǝ kat nyi. Nau gǝ kam, Naan nanyi njong gǝ me mu mou. ²⁸ Nsa a nɗǝgǝn muup mǝ kat tenglang, bii mǝ mwaanɗok gǝ shishik mu yi, kabi wu me wusee agu laa yen, 'Nsa mǝn zak a jep muup.' ²⁹ Ɗǝ mǝn a jep nɓǝt Naan, ɓǝ ɗong ɗyin mǝ man nkwǝt shishik muup a kabi zinariya, gǝ azurfa gǝ pang, ge bii wu gurum chin shi sar mǝn ɗye shi en mou. ³⁰ A waa nnyi, Naan dok takɓak̇ shide wu mǝn nkwoo hǝ, gǝɗes hǝ nyi tangkop gurum dip mǝ bat wakyaa dǝr muup. ³¹ Chin kam a nsa ɗen ɓit gwe npe dagwuo wu nyi mang hǝ nsheep gǝyil yi shi byiwukǝr. Naan pǝn byitwamshik kaa dagwuo nanyi shi wu ep nyi gǝnaar mǝdiɗǝm hǝ." ³² Daas Aten mǝ kǝlǝng ɓǝlǝp yagal ntugun gǝnaar mǝdiɗǝm mǝn pak muop mǝ zhal Bulus; pak mǝ yen, "Mǝ tangkop gǝ laa ɓǝlǝp nanyi shizak ɓit nde." ³³ Ndangkong nyi mǝn Bulus nyit muop. ³⁴ Pak gurum mǝ pǝn naduk mǝn mǝ lǝngǝdǝr muop, gǝnaar muop a Diyonisiyus wu a miskagam nɗǝgǝn Ariyopagus, gǝ mǝ namat sǝm muup a Damaris, gǝ gogot muop.