¹ Dok me dagwuo nyi gəfǝr Kaisariya, sǝm muup a Koneliyus, nyi a long sojya gəyil Italiya. ² Dok nyi a gurum wu ɗarɓal, wu wap Naan dau gǝ lǝ muup; bii pǝn shagal gwet ntuguk muop, mǝn bii ɗangnaan kwang. ³ Shi wu fuus neep mǝn naa me mǝwong Naan nwul dǝr muup nsugun. Məwong nanyi laa gǝnyi yen "Koneliyus!" ⁴ Koneliyus naa mǝwong nanyi mǝn yagal lugut mǝn yen, "A me hǝ, Miskagam?" Məwong nanyi laa gənyi yen, "Ɗangnaan gə byipən agə dǝr wupya muop waarə gəbətəng, a bii wu Naan gə ɗyedər kwang. ⁵ Gəɗes hə taklep gǝyil Yafa mwaan mǝ yong me dagwuo sǝm muup a Simon wu gǝ mǝ yong nyi shi Bitrus hə. ⁶ Tongɗok shiɓət wukusnar, səm muup a Simon wu lə muup fuchip." ⁷ Mǝwong wu laa laa ɓələp gənyi hǝ, yagal nyit nyi, mǝn Koneliyus yong frang afe vəl, gə sojya wu ɗarɓal gənaar muop wu fu ɓəlang nnyi. ⁸ Koneliyus laa bii nanyi dip gǝmuop mən lep muop mwaan nYafa. ⁹ Ɗaar mǝ fat nfuus gǝnaar mǝn muop nmwaan, jya mǝ wulduk gǝ gǝfǝr nanyi, mǝ Biturs kaa yaa gǝ məleng npe ɗangnaan. ¹⁰ Ɓlak tə nyi mən tangkop ɗyin nsə mǝbi. Mǝ kutnyi fu chet sǝ mǝn naa mǝbi wul nnyi kabi sugun hǝ, ¹¹ naa gəbətəng ep mən məbi gǝ tongsam kabi byaat ǝbǝr hǝ gǝye mǝ yaa a shi gwang gǝfe wu feer hǝ. ¹² Jepe wu nɗəgən hǝ dip a lua muop wu gǝ kwak feer, gə jepe wu gǝ mǝ feer gǝɓǝt, gǝ yer gətəng. ¹³ Mən me ɗəgəl laa ɓələp gənyi yen, "Bitrus, yagal gə kwap gə aar." ¹⁴ Mən Bitrus yen, "A kam mou, Miskagam. Jet a sə mǝbi wu rap mou." ¹⁵ Mən ɗəgəl nanyi chin laa shizak wuvəl yen, :Bii wu Naan saar hǝ, gǝ yong shi wurap mou." ¹⁶ Bii nanyi chan kaa kún, mən mə mang bər kaa gətəng gənyi. ¹⁷ Bii wu taa kabi sugun nanyi rǝng Bitrus, nyi fu ɗye ɓǝlǝp gǝkaa dat mǝn gurum Koneliyus mǝ nang war lǝ nanyi gwe ba jya mǝ ruo, mǝ ɗyamɗok fukǝrang. ¹⁸ Mə nang nkwǝt Simon wu gǝ mə yong shi Bitrus tongɗok a nnəgən oh. ¹⁹ Biturs kutnyi fu ɗye ɓǝlǝp bii wu gǝlap sugun nanyi, mən Mərip laa gǝnyi yen, "Gǝ naa, daas kún fu tang gǝ. ²⁰ Yagal sam gə kat ɓǝ gǝ mwaan gǝdər muop. Gə nyang mwaan gədər mou, nsa a an a lep muop." ²¹ Lat mən Bitrus sam dər muop mən yen, "A an a gurum wu gun fu tang hǝ. Gu wul a nah?" ²² Mə yen, "A me long mǝlek wu səm muup a Koneliyus hǝ, nyi a gurum wukǝr mǝn bii wap, mǝn gurum Yahudawa muop gwet bii mǝ laa ɓǝlǝp wuret kaa muup, me məwong Naan laa gənyi lep dər gə, ɗewar nyi kələng me lep yi fugə." ²³ Mən Bitrus sat nmuop jya mə turǝp dǝr muup. Ɗaar ɓit ɓang mən yagal mwaan gədər muop, mən pak məjepnəgən wu gəyil Yafa mə mwaan gǝdər muop. ²⁴ Ɗaar mǝ fat mǝn mǝ ruo nKaisariya. Koneliyus dok nyi fu kang wul gǝmuop; yong mǝmyaa nau gǝ mǝshaar muup. ²⁵ Bitrus rə nlǝ nanyi. Koneliyus kat nyi mǝn dugum ntagam muup mən wap nyi. ²⁶ Mən Bitrus ep nyi gətəng mǝn yen, "Yagal gətəng! An zak a gurum." ²⁷ Bitrus fu ləfu gənyi, mən rə ji kat gurum muop gwet mə təl gəshak. ²⁸ Laa gə muop yen, "Gun gə kaasuk gu man nkwət ɗong ɗyin mǝgwuo Yahudawa nroop shik mǝn nmwaan lǝ nde mǝgwuo wu a wujong hǝ mou. Mǝn Naan nyin n-an nkwət an gə a yong mǝgwuo shi wurap mou. ²⁹ A waa nnyi gu yong an mən a wul yi nǝ nɓagalshik. Ɗagat a nang bii wu saa gu lep dǝr nǝ yi." ³⁰ Koneliyus yen, "Ɓit feer wu ɗyilǝng pekam hǝ, an fu ɗangnaan nlǝ gǝnǝ shi wu fuu neep gwe; mǝn a naa me dagwo ɗarɗok ntagam nǝ gǝ byaat wu pya pat. ³¹ Laa yen 'Koneliyus Naan kələng ɗangpe agə, mǝn Naan ɗyedǝr gǝ nsa byipǝn agǝ dər wupya muop. ³² Lep məgwuo mwaan nYafa mwaan gǝ yong me dagwuo wu sǝm muup a Simon wu gǝ mǝ shi Bitrus hǝ. Tongɗok lə me wukusnar, səm muup a Simon, lǝ muup fuchip.' ³³ Lat mən a lep wagap bər dər gə. Gə chin ɗong shi wu wul nhǝ. Mǝn dip npeen ntagam Naan ɗewar mə kələng bii wu Miskagam laa gəgə yi." ³⁴ Lat mǝn Bitrus epfu mǝn yen "Naduk, a naa a kat Naan gə pənyit mou. ³⁵ Nɗəgən gəyil dip ɗǝ mǝgwuo gǝ nwap nyi mǝn nchan bii wukǝr ɓǝ Naan lap nyi nɗem. ³⁶ Gu man lep gəni pǝn gurum Izraila, shi wu dwam langship nung tugatchagap nfu Yesu Kristi wudung a Miskagam nung gurum dip— ³⁷ Gun gə kaasuk gu man bii wudok ɗǝk wudung mang gǝyil Yahudiya dip shee shi Galili ndangkong kǝnpe wu Yahaya dwam hǝ; ³⁸ a jepe gəkaa Yesu gurum Nazaret wudok Naan mǝm nyi shi Mərip Wuret gə kamgǝɓǝlǝp. Dok mwaanɗok gə ɗak gurum wu damwam fu chin klǝng gǝ muop nsa Naan gǝpe gǝme gǝnyi. ³⁹ A mǝn a wu twamshik kaa jepe wudok Yesu chan dip gəyil Yahudawa gǝ Urishalima. Mə mang nyi lang shi tǝng mǝn mǝ tə nyi, ⁴⁰ mən Naan ep nyi nɓit wukún mǝn nyit gurum mǝ naa nyi, ⁴¹ a gurum nau mou, a mətwamshik wu Naan dok kok muop gwe ntagam hə— a mǝn wu mǝ sǝsǝ mə sua am gəpe gǝme gǝnyi ndangkong yagal gǝnaar mǝdiɗǝm hǝ. ⁴² Pənfu nmən npe mə shakɓələp yi ngurum mǝn mǝ twamshik nkwǝt a nyi wu Naan mang npe sheep gurum wukagam gǝ mǝdiɗǝm. ⁴³ Məlaa-ɓǝlǝpnaan dip mǝ twamshik a kaa mup, ɗewar məgwuo npən naduk nnyi ɓǝ mǝ kon wubis afe nɗǝgǝn sem muup." ⁴⁴ Bitrus kutnyi fu jepe nhə gə laa yi, mən Mərip Wuret sam kaa muop wu fu kələng bələp gǝfe. ⁴⁵ Muop mə kwapdəp muop wudung mə jya gədǝr Bitrus hǝ mǝ kat ɓǝlǝp wufuo, nsa Mərip Wuret sam kaa Mǝjong nau. ⁴⁶ Nsa mə kələng Mǝjong nanyi fu laa ləfu gǝ ɗəgəl dǝɗyak-dǝɗyak, mǝn muo fu pyap Naan. Mən Bitrus lap yen, ⁴⁷ "Mǝgwuo gǝ dənka wu gǝ mǝ kǝn muop wu mǝ lap Mərip Wuret ka nǝmuun ha?" ⁴⁸ Lat mən kǝn muop nɗəgən səm Yesu Kristi. Mən mə ɗuak nyi tong dər muop nung ɓit nɓəl.