¹ Mən Shawulu, nyi a fu twang jepgǝdǝr Miskagam dat ba tuo muop, yagal mwaan dǝr ndaawang wukakǝgət ² mən ɗang nyi npe shen byiyil-lep yi nnyi ɗə mwaan nləwap muop wu nDamaskus zok ɗyin nkat muop wu a gurum War nhə, daas gǝ surǝp, ɓǝ yak muop ɗyan waadər Urishalima gǝmuop. ³ Mwaan ji wul dukduk gə Damaskus, mən wus tong gǝbǝtǝng sam saanpe ba ɗar n-yit muup; ⁴ mən pal n-yil mən kələng me mǝ ɗəgəl laa gənyi yen, "Shawulu, Shawulu, a nah gə fu twang an eh?" ⁵ Shawulu lap yen, "Miskagam, ge a wuɗa?" Miskagam yen, "An a Yesu wu gə fu twang hə; ⁶ yagal gǝ rə gəfər ɓə gǝ mə laa bii wu yong gǝ chin a tiit hǝ." ⁷ Gurum wu muop fu mwaan gəpe gǝme gǝ Shawulu mə ɗyam kit, mə kələng ɗǝgǝl nanyi ɗe mǝ naa məgwuo mou. ⁸ Shawulu yagal, ep yit muup, mən nyi a wu naa məbi mou; lat mən mə yaa sar muup mə ruo nDamaskus gǝnyi. ⁹ Chin ɓit kún nyi a wuvugum, sə mǝbi ɗǝ sua mǝbi yi mou. ¹⁰ Dok me lagədər nyi nDamaskus, səm muup a Ananiyas. Miskagam laa gənyi nsugun yen, "Ananiyas!" Lap yen, "An hə, Miskagam." ¹¹ Miskagam laa gənyi yen, ''Yagal gə mwaan gəwar wu gǝ mə yong shi Zagat hǝ, gə rǝ lə Yahuza ɓə gə nang me dagwo Tarsus, wu səm muup a Shawulu hǝ nsa nyi fu ɗangnaan. ¹² Naa nsugun nkwət me dagwuo, səm muup a Ananiyas kwǝt nwul ji nlang sar kaamuup ɗewar nyi naa pee yi shizak." ¹³ Mən Ananiyas lap yen, "Miskagam, a kələng ɓələp kə dagwuo nhə fuə gurum nɓəl gə muutlaa wu pǝn gurum agǝ muop wu nUrishalima hǝ. ¹⁴ Kat kamsik dər ndaawang wunan dər ɗyan gurum wu gǝ mə yong səmgə yi." ¹⁵ Mǝn Miskagam laa gənyi yen, "Mwaan, nsa a mang a lee ɓəlang gǝnə npe mwaan gǝ səmnə dǝ Mǝjong gə long muop gǝ jep Izraila; ¹⁶ yong gə a nyin təgərchiin wu nyi gə sua gədər sǝmnə hǝ." ¹⁷ Ananiyas yagal mǝn rə nlə naniy. Lang sar kaa muup mǝn yen "Emna, Shawulu, Miskagam Yesu wudung nyin kaashik ngǝ gǝwar shi wu gə nji hə, a nyi lep an ɗepin gə yit gə naapee yi, mǝn gə lap Mərip Wuret." ¹⁸ Bər dat mən kwagap məbi tong shi yit Shawulu pǝttaa, mǝn naa pee; yagal mən mǝ kǝn nyi; ¹⁹ mǝn sǝsǝ mǝn kat ɓal. Tong gəpe gǝme gǝ jepgǝdǝr nDamaskus dər ɓit nɓəl. ²⁰ Gə laa nou mən ɓəm shakɓələp Yesu nləwap, yen nyi a laa Naan. ²¹ Rǝng muop wu mə kələng nyi, mən mə yen, "A dagwuo nhǝ dok fu tuo muo wu mǝ yong sǝm nhǝ nUrishalima mou a? Wul a npe ɗyan muop yi mwaan gə pən ndaawang wunan." ²² Mǝn Shawulu, a fu miyaar dat maa wudok hǝ, mən pən weel nYahudawa muop wu mə tugatɗok nDamaskus, nsa nyin nkwǝt Yesu a laa Naan. ²³ Ndangkong ɓit nɓəl mǝn Yahudawa mə ɓugat fudu npe tə nyi. ²⁴ Ɓǝlǝp nanyi taa nkom Shawulu. Bii mə ɓong fukǝrang nfuus gə ləpar ɗewar mə tə nyi yi. ²⁵ Mǝn jepgədər muup mə mang nyi nləpar pət gənyi gə togolpe nɗəgən tukushi. ²⁶ Dok ji rǝ nUrishalima, Shawulu tangkop gə langədər jepgədər Yesu mən mə yigil lugut muup, mə ɗem nkwət nyi waa lagədǝr gwe mou. ²⁷ Mǝn Barnabas mang nyi mwaan dər jeplep gǝnyi, mən laa gəmuop kǝ wu Shawulu naa Miskagam gəwar mən Miskagam laa ɓələp gǝnyi, gə ɓələp wudung Shawulu laa nDamaskus gə tugurduan kǝ səm Yesu hə. ²⁸ Kat muop shi wu muop fu ruo muop fu fat nɗəgən Urishalima hǝ. Laa ɓələp gə tugurduan nɗəgən səm Miskagam Yesu ²⁹ mən mə chin ɓagalshik gə Yahudawa wu gə mə kǝlǝng Hellinawa; mǝn mǝ tang war tǝ nyi. ³⁰ Məjepnəgən mə kələng kam mən mə mang nyi sam yaa gəyil Kaisariya mən mǝ lep gənyi nTarsus. ³¹ A shide mən gəwur gurum Naan dau gǝyil Yahudiya, Galili, gə Samariya mə kat tugatchagap gə mwaan ntagam; muop fu yigil Miskagam, muop fu kat zwaanpe nung Mərip Wuret, mən gurum mǝ ɓəl. ³² A shide mən Bitrus zarpe ngan gǝyil nanyi dip, mən sam dər mǝpǝn naduk wu gǝfǝr Lidda hǝ. ³³ A nnəgən mən kat me məgwuo, səm muup a Eniyas, wujet terɗok gə karam gok yii pogokún, nsa shishik muutkum. ³⁴ Bitrus laa gənyi yen, "Eniyas, Yesu Kristi ɗak gə. Yagal gətəng, mǝn chigit karam agə," mǝn yagal wurut gətəng. ³⁵ Muop wu mə tugatɗok gəyil Lidda gə Sharon mə naa dagwuo nanyi mən mə bat ləngədər Misgakam. ³⁶ Dok me reepgǝdǝr nyi nYafa, səm muup a Tabita, wawu a "Dokas". Namat nanyi dok bii chan jepe wuret shen gurum wupya mən naachigir amuop. ³⁷ Namat nanyi gok shide mən muut; mə sugup kum muup mǝn mə ɓuət nyi nlə məleng. ³⁸ Lidda dukduk dat gə Yafa, jepgədər mə kələng nkwǝt Bitrus nyi nnəgən, mən mə lep gurum vəl dər mwaan mə ɗang nyi mǝ yen, "Ji dər mu bər." ³⁹ Bitrus yagal mwaan gədǝr muop. Mwaan mǝ ruo mən mə kaa gənyi lə məleng. Surəpkaa dip mə ɗyam gǝ mǝ wal yi n-eskogop muop, muop fu nyin byaat wudok Dokas taan nmuop shi wu nyi nkagam hə. ⁴⁰ Mǝ Bitrus ǝgǝt muop fat gǝɓang, mən dugum gǝ fǝrǝm mǝn ɗangnaan; lat mən bat yit naa kum nanyi mǝn yen, "Tabita, yagal." Lat mən epyit naa Bitrus, mən yagal tong. ⁴¹ Bitrus yaa sar muup mən ep nyi gətəng; yong mǝpen naduk muop gǝ surǝpkaa nanyi mǝn nyi nkagam. ⁴² Gurum gǝyil Yafa dip mə man ɓələp nanyi mǝn gurum gwet mə pən naduk nMiskagam. ⁴³ Lat mǝn Bitrus tong nYafa ɓit nɓəl shiɓət me məgwuo wu səm muup a Simon, wukusnar.