¹ Ba kuun ba lizol,li kaan mu isa likwikil mu ma mpev mo maso,si li ba suu ku kel ba mpev munda iyab ne bo ba kel ba Nziem,munda ba mbikud ba fhun baba bi,ba yi mu mukil. ² Mu moma,Bini li yab na mpev ye Nziem,mpev yo iso ye fuguno Yesu Klistu mu imud,ikel ye Nziem. ³ Si mpev yo iso ye wun funguno Yesu,ikel we ye Nziem si ikel ye mbeen a Klistu wun wu liywil bini ne ayi ya,wu kel tel li,nde asun ya mu mukil. ⁴ Bini baan ba kii,bini li kel ba Nziem,bini bu likwi mu ikal kobun,munda wun wu kel mu bini, amu lwid wun wu kel munsi ntod. ⁵ Bo bakel ba mukil,ansa bo ba mo amon ne bad ba mukil,mukil si aba ywil. ⁶ Bis li kel baba Nziem,baba yeb ne Nziem aka liywil,si wun wo win kal wo Nziem,ali ywil we, akoyan ya li yab bis mpev ye masong ani mpev ye lifhu. ⁷ Ba kuun ba lizol,li bi zol bis-a-bis,munda lizol likel Lili Nziem ani nde muso wun wo zolo,afi ku kel Nziem,amu yeb si Nziem. ⁸ Wun wo wun zolo,a mu yeb we Nziem,munda Nziem akel lizol. ⁹ Lizol le Nziem ake li ghe ku kel bis ani ku kel ban ba twim nde,Mwaan a nde mumo mu mukil,mu mpil ne bis li zinghe mu nzil ye nde. ¹⁰ Lizol liso lin,li kel,kel we ne munda bis li zwel Nziem,si likel munda nde ali zwelmani iku litum mwaan a nde wun wo ya bi wa amon ne wo fha munda masum ma bis. ¹¹ Ba kuun ba lizol,kid ne,Nziem bun bo lizwel nde,bis si li kwi mu iku bizol ban ani ban, Nto mud mumo we wo mwen Nziem kid ne bis aka li bizol ban ani ban. ¹² Nziem akel andi bis,ani lizol li nde likel lili bwed mu nked a bis. ¹³ Bin bi li yeb bis ne lizinghe munda nde,ani nde si akel mu nked a bis,bun bo li wi mpev a nde. ¹⁴ Bis ake li mwen,bis si aka li kisi ne Tad bo twim Mwaan amon ne ngulunsi wo mukil. ¹⁵ Nde wun wo fungun ne Yesu akel mwaan a Nziem,Nziem si akel andi nde,nde si mu Nziem. ¹⁶ Bis bu li yeb lizol lin li kel a lo Nziem ku kel bis,bis si bu li kwikil mu nked a lo. Nziem akel lizol,wun wo zinge mu lizol,azinghe mu Nziem,Nziem si akel andi nde. ¹⁷ Bun bu kel nde,bun si bu likel bis mu nked a mukil wu,mu ko mun,lizol likel lili bwed mu nked a bis,mu mpil ne bis likal ani itsweel mu tsu le isemes. ¹⁸ Mu lizol,buum bi kala we, si lizol li bwed,li kiele buum,munda buum bi kenese ndol,ani wun wu kel andi buum,akel we nde mubwed mu lizol. ¹⁹ Munda bis,aka li muzol,munda nde wo lizwel mud wo iso. ²⁰ Kid mud mumo mwe ne: Me aka muzol Nziem, si nde ywi mukuun a nde,akel mud a mampia,munda wun wo wun zolo mukuun a nde wo mono nde,isi nki nde azol Nziem wo wun mono nde? ²¹ Bis li wel ngil yi ku kel nde: Wun wo zolo Nziem,aka amu zol si mukuun a nde.