¹ Kuiko kue kutundilila muyoyo na vimpata mukati keni? Kuma keti vye ku tunda ku mashungu eni eku miluitha mukati keni? ² Eni mutonguela vyuma vuno komuviuana, vyo munayeneka. Mutciha na kuliveya, keho eni komu vyuana. Muli kuanya na kulipupa. Ko mufuku muomu ko mua vithetelele. ³ Mulomba eni ko miviuana muomu mue kulomba muakuvihya, linga muvi pangethe ku mashungu eni. ⁴ Eni vakua vupangala! Komu dhivuka ngueni vuthamba vua lifuti vua pua chidhindo kuli Kalunga? Mukemo uoshe uye a yongola kuli kuata vuthamba na lifuti na li puitha vavenya chitodhi cha Kalunga. ⁵ Ndi mu thinganyeka ngueni lithona lya mbulula vishaki, "Mpundhi yakala mulyetu ya kala na lifuua ndi"? ⁶ Vuno Kalunga uekuhana nghodhi ya ku tuvakana, ngocho mathona ahandeka nguao "Kalunga a vyana va ka vaka kuli hametha, vuno ovuila ngodhi va ka kulikehetha." ⁷ Lihaneni kuli Kalunga. Vyaneni satana, na yikeye a ka mishondoloka. ⁸ Shueneni muhyehi kuli Kalunga, na yikeye aka kala muhyehi neni. Toketheni mavoko eni, eni va ka kuvihya, toketheni thimbunge vyeni, eni vaka kuthinganyeka. ⁹ Yonjueni, chukukeni na kulila! Viyolo vyeni vipue kuyonjua ndi kuyanguluka kueni kupue vuthiua. ¹⁰ Likehetheni eni vavenya kumesho a Kalunga keho yikeye aka mi yundula. ¹¹ Keti ku li kuanya mua kuvihya umo na mukuavo, vamunanana. Muntu uoshe a fueya mukuavo ndi apangula mukuavo na paya lishiko na kuhitha lishiko. Nga upangula lishiko, ko ua puile muka ku panga vya lishiko, vuno una pu muka ku pangula. ¹² Umo lika muka ku hana lishiko na muka kupangula. Yikeye lika muka kuovola na ku viyitha. Yove yiya, ove muka kupangula muka kulihata nove? ¹³ Mualolo tolilila, eni mue ku kuanya ngueni, "Lelo ndi himene tuka ya muimbo lyakama lya chingandi, tuka kale ko muaka, kupanga ndando, na ku uana konduethi." ¹⁴ Yiya nadhivuka vika vi ka yomboloka himene, umba vati uka fua muono uendi? Muomu muna pu ngue fuka ya kuija ha ntcimbu ya yihi umba na yidhimangana. ¹⁵ Ngechiye vene, muna pande kuhandeka ngueni "Nga nayongola Muene, tukala na muono na kupanga evi na viye." ¹⁶ Vuno eni muli tuntula na kuli shangalela vutumbe vueni vua vukenya. Kulituntula kuoshe oku kua ku vihya. ¹⁷ Ngocho vene nga umo adhivuka kupanga vuchili vuno keku vupanga, yikeye na lingi mulonga.