¹ Yinjeni mualolo, eni vaka kufuka, lileni oku muli tetela mukonda tuyando tu kenja kuli yeni. ² Vufuko vueni vuna volo, vidhala vyeni vina liua ku tuntembulu. ³ Kavue ka vunchele na vimbongo vyeni vina kuata nkalaue. Keho nkalaue yayo yikeyo lalo yikapua vukaleho kuli yeni. Vikalya ntcitu yeni ngue tuhya. Muna li lundikila vufuko vueni ku matangua aku manethela. ⁴ Taleni, fueto yiye yi mua hona kuhana vaye vaka kupanga mulihya lyeni vali na ku lilila kuli yeni. Kulila kua vaka ku kupanga china hete mumatui a Muene ua vimbunga. ⁵ Hantci mua kele va ka kupanga vya hantci, mua yonguele kulya na kushuama ngeya senga ya hantci eni vavenya. Keho hano honi muna hindala ngue vingombe viye viya muku ka vi tciha. ⁶ Mua hitha naku tcihya muntu mukua vucili. Yikeye ke ku mi vyana. ⁷ Thimpeni, va munanana noho ha kuinja kua Muene. Taleni, vati muka kulima ue ku tatelela kuima kua mbuto ya kuvuaha. Ya kutunda mulivu, nendi ue kuthimpa noho mbuto ye ku uana mema aku livanga na mema aku kotokela. ⁸ Neni lalo thimpeni. Koletheni myono yeni mukonda kuinja kua muene kuli mu hyehi. ⁹ Keti mukale na vimpata, va munanana, kuli umo na mukuavo, linga keti vami hithe. Taleni muka kuhitha nemana ku chikolo. ¹⁰ Vakuetu tambuleni chimuetho, cha kuyanda na kuthimpa kua vapolofeto, vaye va handekele mu lidhina lya Muene. ¹¹ Taleni, tuva tambula va ka kuvedhuka ava vana likanyameka. Munovu mua kolele Yombi, keho muna dhivuka chikuma cha Muene, omu mua kala na ngodhi na chikeketima. ¹² Muku tuvakana vyuma vyoshe, vakuetu keti mu lithinge , na lilu, nambe na hantci, nambe na chithingo cha-cho. Nambe,"Kutava" kueni kukale "Omo vene muomu nakuanya vene mukemo" naku "Vyana" kueni kukale "Ku vyana vene", kuteua mu kaua kuchi pangula. ¹³ Hali umo a yanda mua kama ha kati keni ndi? Muetheleni alombe. Hali umo ali muku yola-yola ndi? Embe lidhina lya ku shangala. ¹⁴ Hakati keni hali umo ava vala ndi? A thane vakuluntu va ngeleka; va valombele nendi. Va mu kuite madhi muku mu vua vuetha mu lidhina lya Muene. ¹⁵ Kulomba kua muka ku tcelela ku ko hyela uye a vavala, keho Muene aka mu kanguitha. Nga umo na panga vya kuvihya, Kalunga a ka muechela milonga yendi. ¹⁶ Ngocho vene litaveleni milonga yeni umo na mukuavo, na kulombela linga mukanguke. Kulombela kua muntu muka vuchili ali nandhili muvipanga vyendi. ¹⁷ Eliya ua kele muntu ua kufua yetu. Yikeye ua lombelele mua kama nguendi nyondhi keti yinoke, ngocho vene nyondhi koya nokele hantci myaka yitatu na vingonde vitanu na yimo. ¹⁸ Ngocho vene ua lombelele lalo. Lilu lya nokethele mema, na livu lya tuhuithile vushuka. ¹⁹ Vamunana, nga umo ha kati keni na shevuka ku vuchili, keho umo aka mu hiluitha. ²⁰ Ou a dhivuke nguendi ou a hiluitha muka kuvihya kuku vihya kuendi ako hyela muono ku kutca, aka fuika kuvihya kua kuingi.