¹ Keti mukale valongithi vavengi, vamunana, muomu muna dhivuka ngechiye vaka tu pangula muakama. ² Muomu etu voshe tue ku punduka muvingila vya vingi. Nga umo ka punduka na lijui, endi muntu apuitha mo, atha kunyunga muvila uendi uoshe. ³ Omuo nga tuhaka vitoma mu tunua tua tukambe linga va tu shuame, etu lalo tumina mivila yavo yoshe. ⁴ Taleni lalo mato, nambe akeuo akama-kama ngechiye, keho aya na mpundhi ya kama, va a dhengetha na chikathi cha chindende-ndende kuoshe kua na yongola vavenya. ⁵ Mungila eyi , ndaka yikeyo kachilyo ka kandende-ndende, keho yili shangala na vyuma vya kama. Taleni lalo muthenge ua kama-kama u uema ku tuhya tua tundende-ndende. ⁶ Ndaka nayo yina pu tuhya , chifuti cha kuvihya ha kati ka vilyo vyetu, moyi na pu ndaka ,yi viyitha muvila uoshe , shuameka ndeho ya muono, nalyakelyo vavenya, ya shuamekele tuhya tualutengo. ⁷ Muomu mishovo yoshe ya tuthitu, na tudhila ,na vyoshe vyaku kalava ,voshe nevi vya mumema ndonga Kalunga ve kuvi longetha avyo vantu vavilongetha . ⁸ Vuno ndaka yamuntu naumo uahi atha kuyilongetha. Ayo mulonga, ya kala na vushungu vua kutcihya. ⁹ Yikeyo yeku shangala Kalunga Tata, na yikeyo yeku kunkula vantu, yiya ua pangele Kalunga mu chifua chendi. ¹⁰ Mukanua kamo lika mu tu ka vishangala naku kunkula, vamunana, vyuma evi keti vikale ngocho. ¹¹ Kuatha mulithima limo mu tuhuke mema aku shasha naa akutovala ndi? ¹² Kuatha chiti chamukuyu chinehe madhi ndi? vamunanana, ndi cha vinyu ndi? Nambe mema a mukele a katha mema aku tovala. ¹³ Yiya muka mana na kuvua ha kati keni? Linga muntu ouo a lekethe naku lithingimika muku konkama. ¹⁴ Muomu nga muli na lifuua lya kushasha naku lihangula muvimbunge vyeni, keti mulihake kuvukama na kuhandeka vishaki ku vuchili. ¹⁵ Aa keti mana atunda kuilu. Nambe, vili hantci, vya kuyeneka mpundhi chili, na vandemone. ¹⁶ Muomu aha hali lifuua na chitaka mbunge , hakeho hali muyoyo na vipanga vyoshe vya ku vihya, ¹⁷ Vuno mana atunda muilu hakulivanga achili, keho chivovo-mukuyongola , kuathiua kulomba , ashula na nghodhi, na vushuka vua chili , na vimpata vyahi , na vufue vuahiho. ¹⁸ Na vushuka vua chili vavu muena kuvantu vaka chivovo vaye valinga chivovo.