¹ Vamunana, keti muhone ku tcelela Muene uetu Yesu Kilistu, Muene ua kuvuahelela , keti muthingimike vamo lika. ² Muomu nga umo a kovela muchiuano cheni na dhala vidhalo vua kunchele nevi vya kukedhimina, mba chihutu lalo ali muvidhala vya kuvihya ako velamo muchiuano. ³ Nga mutala kumuntu nadhala vidhala vya thenga na ahandeka nguendi," Tumama kumuhela ua chili, Vuno uleka chihutu ngueni "yimana oko vene" ndi "Tumama hantci kuma hindi achituamo change", ⁴ komua lihithile yeni vavenya? Komua puile machinja a kuvihya ndi? ⁵ Tolilileni, vamunana, keti Kalunga ua shovuele vahutu va hantci vakale vaka kufuka na ku tcelela na vaka ku hinga vumuene vuye kuli vaye vamu yongola ndi? ⁶ Vuno eni muna shaula vahutu! Keti vaka ku fuka vami yandetha ndi? Keti vakevo vami kokela kuvi ndhango ndi? ⁷ Keti veku shaula lidhina lya kathingimiko livana mitumbula nalyo ndi? ⁸ Nga, mu puithamo lijui lya lishiko lya muene ngue kumathona, "Yongola mukueni ngue ove va venya," u linga mua chili. ⁹ Vuno nga uthingimika vantu vamo, upanga mulonga, keho ku lijui lya lishiko ngue vaka ku panga mulonga . ¹⁰ Nga nkala uoshe a shuama mashiko oshe , keho kashevuka limo, na panga mulonga mukupokola mashiko oshe. ¹¹ Nga uye umo ua kuanyene , nguendi ,"Keti ulinge vupangala," Ua kuanyene lalo nguendi ,"Keti upange vupangala." ua handekele lalo nguendi,'' Keti ukatcihye.'' Nga kou panga vupangala, vuno nga utcihya , una yomboka mashiko. ¹² Ngocho kuanyeni, na kupanga ngue vaye voshe vava ka vahitha na majui alishiko naku linga chidhango. ¹³ Nga chihitho kocha kele na ngodhi kuli vaye voshe valeketha kuyeneka ngodhi. Ngodhi yohyela mukuhitha. ¹⁴ Chikala vati, vamunanana, nga umo a kuanya , nguendi ali na lutcelelo, vuno kakele navi panga? Keho lutclelo kuatha ku muohyela, ndi? ¹⁵ Munanoko ua lyala ndi ua mukentu nga ali mishenga-shenga naku yeneka vyakulya vyali tangua lya ngongo. ¹⁶ Keti umo uaha kati keni a kuanye navo nguendi ,"Enda nachivovo, kaleni muntuima na ku yishulitha," Nga koua hanene na vyuma vya fuila ku muvila, konduethi muka? ¹⁷ Ngocho vene kutcelela chacho vavenya, nga ko cha kele na vipanga, china tci. ¹⁸ Nga umo aka kuanya nguendi,"Uli na lutcelelo , ange njili na vipanga." Njilekethe lutcelelo luove nange njika ku leketha lutcelelo lua vipanga vyange. ¹⁹ Ove ua tcelela ngachiye Kalunga yakeye umo lika, upanga mua chili. Vuno nambe vandemone va tcelela evi naku ngangama. ²⁰ Uyongola kudhivukitha, muntu ua litha, kutcelela cha kuyeneka vipanga vya ngocho? ²¹ Keti Avilahama tate uetu keti yakeye ua thambuele na vipanga muye mua kombeleyele munendi Yisake kumuyombo,ndi? ²² Una mono ngechiye kutcelela cha pangele hamo na vipanga vyendi, keho ku tcelela chi yanguluka na vipanga. ²³ Mathona apuilemo ,"Avilahama ua tcelelele Kalunga, keho vamu tumbuile kavuthamba ua Kalunga. ²⁴ Muna mono ngechiye muntu a thambua na vipanga, keti muku tcelela lika. ²⁵ Mungila oyo vene lalo, keti Lahave yakeye chikuidhi ua thambuele na vipanga muye mua tambuile tunenga, naku vatuma ku ngila yayo. ²⁶ Muomu ngue muvila uakala na mpundhi yina tci, nambe lutcelelo ko lua kele na vipanga luna tci.