¹ Morwashi, mukonda Kirisitus kwa hepire munyama, karenu shikukandulito shanaghumwenu nashitambo shimwe. Keheghuno ngahepero munyama ngashayiki tapo ndjo. ² Vitundwamo, muntu wangoli, ruvede rwendi naruntje munyama, kwato nka liparu lyaghuntu , ngoli mulikuyuvho lyaKarunga. ³ Ruvede rwakapito rwagwana koye mukurughana makuyuvo ghavapagani, mukukara muruntjo, lidovho, naghunkorwi, likuhafito mughunkorwi, namakuhafito akudira kuwapera, ntani kukukwatakana naveta dadidona davintjwantjo. ⁴ Vavo kughayarashi vidona vyakudira kukupakerera navo namurughandjo rwandunge dadidona, vavo kughamba vyavidona koye. ⁵ Vavo ngavakawana mfuto kogho anakuwapiyikiro mukupangura vayumi navafe. ⁶ Nashitambo shino livangeli avaliyuvhita nakuvafe, mposhi, mpiri ngoli vana vapangura munyama yira vantu, vakona kuparuka pampepo mundjira yimwe yiraKarunga. ⁷ Ghuhura wavininke navintje pepi ghuna kara. Mpo ngolishi karenu nandunge dimwetupu, ntani muna pukuruka muvighayadara vyenu mukonda yamakanderero. ⁸ Kughupako navintje, munakona kukuturamo mushihoro shakukuhoratana.Shihoro shafukilira ghurunde. ⁹ Karenu ghuholi kumwe naghumwe ghana marunyeghenyo. ¹⁰ Namuvantje keheghuno kwawana ghushwi, ghuruwanitenu mukukuvatera naumwenu yira vantu vavawa vaKarunga mughufenkenda wakukushuvashuva. ¹¹ Nkeneshi ghumwe kunakughamba, anakona kukara munkango daKarunga. Nkeneshi ghumwe nakurughana, anakona kukara munkondo odo ghamupa Karunga, Rughana vino vininke mundjira nadintje Karunga ngavamufumadeka kupitira mwa Yesusi Krisitusi. Vikare wenoshi kwa Yesusi Krisitusi lifumadeko ntani lipangero likarerepo naruntje nanaruntje. Amen. ¹² Vakuhora, kapi shi mutetuke ashi mukonda munke muna kupitira mu mundiro ogho ngaghuyo papenu, yira vininke vyavidona vinakumushorokero. ¹³ Mpongolishi, vingi mukugwanekera navyo mumahepeko gha kristusi, nyanyukenu, mposhi ngamukare nalinyanyuko ntani ngamuhafe opo ngaghumoneka ghuyerere wendi. ¹⁴ Ntjeneshi ava mutuku morwa lidina lyaKristusi, vamutungika, mukondashi mpepo naghuyerere waKarunga ghunakara penu. ¹⁵ Makura mwashapulitira ghumwe wenu ahepe yira murudipayi, munawidi, murughani ghudona, ndi ghukorokoshi. ¹⁶ Ngoli nange keghuno nakuhepa ashi muKriste, kapishi ghafe ntjoni: Mposhi, ghanakona kufumadeka Karunga nalidina. ¹⁷ Mpongolishi runo ndo ruvede rwampanguro kuvareka navantu vaKarunga. Nkeneshi yitameka natwe, nke ngavikaro vitundwamo kovo vadiro kupura kulivangeli lyaKarunga? ¹⁸ Nkeneshi ghudito vapuli mukuyoghoka nke ngavi shoroko kovo vadiro kupura ntani vanandjo? ¹⁹ Mpongolishi kwavo vana kuhepo morwa Karunga vanakona kutura monyo davo kovo twaghuguvarera mushiti wavirughana vyaviwa.