¹ Inkatama, yar arwã as chii apinma Lazarori achanawaruri, Ekama Beatania chitari, kã auya Maria e'ñá apa'chá Marta e'ri. ² Maria nei, to' aro'kiro to perfumeyo ata'ró asãus yo uski, cuyo a arki Lazaroma archanawari. ³ Pesh pa'chama akashkua tunrii Jesús rishki ñe'ri: "Señor, chãú, tãró piraenpikiwasá tõ'ró archanawai." ⁴ Jesús iró wesh kuma, Ekama ñehi: "ima chanama onnatãi, akẽs Patatista gloriai, Patatishta, Ayerwã gloria tishpiro ekayo." ⁵ Inkatama, Jesusma apa'charó Marta ara en kii Lazorori rii. ⁶ Akẽs eka weshkuma Lazaroro achanawa rii, Jesúsma ã pok tawarki tõh Ekaya. ⁷ Akaskuá ima tiká, Ekama su'ba'taró ti'kakii, ''Judeaña warki naparwá." ⁸ Araba'tama ti'kari Ekaró: "Rabi, to Judiosma sayó arkate'lerpirish kri, ¿warkineiya ataya?'' ⁹ Jesús karkawarki: "¿ã ukúa pok ãas kamas chituwã? As chii ahar tarteshkuá, atatuwã, ahar chẽwã, i mundo kamasya. ¹⁰ Akaskuá, ika ekama kakaña tarteshkuma, atatastipé, tõ'karó kamasma ekaña ãa'tii.'' ¹¹ I yasma Ekaña ñe'hii tika te'ki warki ti'kaki a e karó, ''Un ta'wa Lazaroma ookiro aaki, akaró tasma wakaka'pa." ¹² To su'ba'tama tõ'karó ti'kakiri Ekaró, ''señor, ekama okaishkuá, ékama akuatishpé." ¹³ Inkatama, Jesús kapash kuaruri ahi onpirikena, akaró Ekama ameshkerma on chewãró newakenaruri ¹⁴ Akaskuá Jesús kabis ti'kakii, ''Lazoroma onni. ¹⁵ Arari tishkawa to eñaró, Tasró tõ'ña ã a'tarima yar pamawá ta'takautupiwá, Naparwá a ekaya.'' ¹⁶ Tomás, apima Didimo, karkawa'taró ti'kakii  a'wa su'ba'taró, "Pitaswa naparwá a ekayo onnapiró.'' ¹⁷ Ke ahi Jesús te'kuamá, Ekama Lazaroro kanso'ñaro artapuki ke ã káh paki. ¹⁸ Inkatama, Betania Jerusalén emarii, owá as owa onki metrosri. ¹⁹ Judios wé chilerá te'kri to Martaró Mariari, ara tẽs hkakii a arkirishkia ²⁰ Akashkuá martoma, kortaña ke eka weshkuma Jesús te'kuaró, a Ekayo artapuki; Maria a kashkuá akaoña achi'pe achiwaruri. ²¹ Marta tõ'karó Jesúsro ti'kii, "señor, paró ñaro ã akurima, ta arkima ontirishki. ²² Akema, tasma yas arihawá iró akapeikena Patatishtaró, Ekaña pipenpé." ²³ Jesús to kortaró ti'kii, Pi arkima wakuatishpé." ²⁴ Martama Ekaró ti'kii, "Tasma chẽ arihawá wakuatishpé wakuatishkechẽ to apistichẽ.'' ²⁵ Jesús to kortaró ti'kii, "Tasrawá wakuáka'pa chaparó; Tãro creeshkuama Tasró, onarike, chipé; ²⁶ Tãro asna chii Ta creehki'wama tõ'ma ontipé. ¿Pama i creeshkia?" ^{28 27} Kortaña ti'kii "Yar, Señor. tasma yar ñahawa Pama Cristoriyá. Patatishta Ayerwãriyá. i mundoña te'kuá. Akaskua ke ekaña ñe huma i'ro, ñei apa'charó Mariaro arwãhni asuntapakñaró ti'kakiri: "I achiwishtama ña aki karwana kiwá." ²⁹ Korta ke weshkuma i'ró, wãripe ishtaki nei a Ekañaí. ³⁰ Atewata, Jesúsma nebo'tirii to chilerñá akaró atewata tõ'ñari Maria artapukiñá. ³¹ Akaskua to Judiosma atewá to kortayo akrima to kaoña taña ña eña pero ti'kakiri, Mariaró chẽri waripe ishtaki tapasteshki arachiri; ameshkerma kanso'ke newakenchẽri akanpiró tõña. ³² Akaskua Mariama ke nebo'nama Jesús ãakiña cheumá , ata'na taenhi ti'kii Señor, para ña akurima ta arkima ontirishki.'' ³³ Jesúsña aka'ni chẽuma, toh judiowá asken te'krima to kortayo to'wá aka'naishkri, Ekama ameshki a'katishki uruñá Akuansaró akuaró asama akuátishki: ³⁴ Eka ti'kakii: "¿Piã tukinawichere?ekama ti'kiri: "Señor, te'kú chaũ." ³⁵ Jesús akahni. ³⁶ Akaskuá, Judiosma ñe'ri: "¡I chauwa Lazaro enchei!" ³⁷ Akaró akuamá ñe'ri: "¿I arwãma inishtii, awa achẽnuro aprihi, inkro ki'tiisa i arwã ontipiró?" ³⁸ Akaskuá Jesúsma warki, ameshki a'katishki aruña ekapé kansohña nei inkata eñama, atapak as rii, sá as achiwá rurii. ³⁹ Jesús ñehi: "sá peshkuwa" Marta, Lazaro apa'chama.Taró onnikena Jesúsro ti'kii: "Señor,inkatapema, apeshkaomá ke warkuai,akró ekamá ké ã ká pa kuaprá ⁴⁰ Jesús to kortaró ti'kii: "¿paró ta'pikatucheré pama tasro yarñahima. Gloriama chãume Patatishtae'ró? ⁴¹ Tõ'karó ekama sá peshkri, Jesus awama ishpaki ñehi: "Tús, Tasma kaparkawá taña weshkiraská. ⁴² Tasma ke piri hawa atewata tãña weshkiya; pesh wriharishki tarwĩchinleraská tõkaro ñahasi, to ekama wrishma tachẽlera yar ti'ta kilerpiró Paña tatunhuriró.'' ⁴³ Akashkua Eka ti'kakii, ñah a'kayo ñehi: "i Lazáro te'kú apaskú!" ⁴⁴ To' onnimá tapaski,  ata'ri asawari kaowa ukayo tikarii, awatapa'ma amu'karii kaowa ukayó. Jesúsña ti'kakii ekayo ''Ariokuwãwĩ tunnelera nepiro.'' ⁴⁵ Akaskuá, Judios wé chilerá Mariaró chẽri Jesús irõ ishkikena, creeshkri Ekaya; ⁴⁶ akaró Fariseos tisleri ti'kariri Jesús yas ñehiró. ⁴⁷ Tõ'karó to parema princioades Fariseori concilioña tauwẽcheri ñe'ri. "¿Iró ishpra? arwãma yas ishki. ⁴⁸ Pitasma tõ'ke tu'naparma, kriro yar ñelerpe Ekaya; Toh Romanos te'kerpe pitasña pitakulerpe piachãama ta kãuyari.'' ⁴⁹ Akashkuá, arwã yar as kri aakerá. Caifas, tõñaro sumo parerii i kui'ró. ti'kakii: "Pamawá in arihutuwãwĩ. ⁵⁰ Panawá ay siña hu tuwã wĩ aka arwã eñaró irish onpisa i kaha uya kri chaparo onlertipiró.'' ⁵¹ Inkatuma, ekama eña ekapekama ñeshtuwã: sumo parerikẽ i kui'ró, profetiza ishki asapayo Jesúsma ñe'hi onpiriró kaha uyaró; ⁵² kã ãya pero tãrihi Patatishta ayerwaró tis tis ticheriró tauwẽchelerá kriró askén. ⁵³ Akema tõ'cherima ki newãchẽ, ekama ameshka enkiri inkashkera  Jesus amaskerpirikena. ⁵⁴ Intani Jesusmá tarsteshtii ta' kapo'ña Judios kri'ró, akẽhma ke tarsteshnei tõsna chii kuk senna erña. kã ã uya Efrainña. Tõ'ña tawarki pes su'ba'tayo. ⁵⁵ Inkatama Pascua a e'ma ke erña te'ki pesh we tis tawe'ri to Jerusalenña a uskerpiró. ⁵⁶ Ekama Jesúsro proleruri, a ekape ñe'leruri akashki temploya ã akri: ¿Inkén pamawá ameshkiñawisá? ¿Inkén ekama te'tipii akatiña? ⁵⁷ Inkatama, to parema principales Fariseosri ña as kawishkri, tãro pia Jesus a akrima, imaña ti'kakipirii ekaro sukulerpiro.