¹ God Yawe i tokim Moses na i tok, ² "Givim tok olgeta manmeri bilong Israel olsem, 'Taim yupela i go insait long graun Kenan, em dispela graun bai yupela kisim, em olgeta hap ples i bihainim mak bilong Kenan. ³ Em graun mak bilong yupela long hap saut bai i go long ples nating bilong Sin i bihainim graun mak bilong Edom. Long arere long hap sankamap long mak bilong saut na bai i go pinis long mak arere long hap Saut bilong arere bilong Detsi. ⁴ Mak bilong yupela bai tanim long hap saut bilong maunten Akrabim na bihainim ples nating bilong Sin. Long dispela hap, em bai go olsem long hap Saut bilong Kades Bania na i go yet long Hasa Ada na i go moa yet long Asmon. ⁵ Long dispela hap, mak bai tanim long Asmon na i go long liklik wara bilong Isip na bihainim i go long solwara. ⁶ Graun mak bilong hap san igo daun bai i go long nambis bilong Bik Solwara. ⁷ Graun mak bilong hap not bai lusim Bikpela Solwara Mediterania i go inap long maunten Hor. ⁸ Na long maunten Hor i go long Leb Hamat, na long Sedad. ⁹ Na mak bai i go yet long Sipron na pinis long Hasar Enan. Dispela em bai hap mak bilong hap not. ¹⁰ Na yu mas makim mak bilong hap sankamap long Hasar Enan. Dispela em bai hap bilong Sefam. ¹¹ Na graun mak long hap sankamap bai i go daun long Sefam i go long Ribla, long sait bilong hap sankamap bilong Ain. Graun mak bai i go yet bihainim hap sankamap bilong Solwara bilong Kineret. ¹² Na graun mak bai i go yet long hap saut bihainim Wara Jodan long Detsi na i go daun long hap sankamap long mak bilong Detsi. Dispela bai graun bilong yupela, bihainim mak bilong en long olgeta hap.''' ¹³ Na Moses i tokim olgeta manmeri bilong Israel olsem, "Dispela graun bai yupela i kisim long skel na mak bilong yupela, em God Yawe i givim tok long ol 9-pela lain tumbuna na long hap tumbuna lain. ¹⁴ Ol lain bilong tumbuna bilong Ruben, bihainim pasin bilong tilim ol samting bilong ol tumbuna lain, na long ol lain tumbuna bilong Gad, bihainim ol pasin bilong tilim ol samting bilong tumbuna bilong ol, na hap lain bilong Manase bai kisim graun bilong ol. ¹⁵ Dispela tupela lain na hap lain i kisim skel bilong graun bilong ol hapsait long wara Jodan long hap sankamap bilong taun Jeriko na igo moa yet long hap bilong sankamap." ¹⁶ God Yawe i tokim Moses olsem, ¹⁷ "Dispela em nem bilong ol man husat i bai tilim graun bilong yupela long kisim. Em pris Eliasa na Josua, pikinini man bilong Nun. ¹⁸ Yu mas makim wanpela hetman long wanwan bilong ol bikpela tumbuna lain na ol bai tilim igo long wanwan famili. ¹⁹ Hia em nem bilong ol dispela lain man. Long lain bilong Juda em Kelep, pikinini man bilong Jefune. ²⁰ Long lain tumbuna bilong Simion, em Semuel, pikinini man bilong Amiud. ²¹ Long lain bilong Benjamin em Elidad, pikinini man bilong Kislon. ²² Long tumbuna lain bilong Dan em wanpela hetman nem bilong em Buki, em pikinini man bilong Jogli. ²³ Long tumbuna lain bilong Josep, long lain bilong tumbuna bilong Manase, em wanpela hetman nem bilong em Haniel pikinini bilong man bilong Epod. ²⁴ Long tumbuna lain bilong Ifreim em Kemuel, pikinini man bilong Siftan ²⁵ Long tumbuna lain bilong Sebulon, em wanpela hetman nem bilong em Elisafan, em pikinini man bilong Parnak. ²⁶ Long tumbuna lain bilong Isaka em wanpela hetman nem bilong em Paltiel, em pikinini man bilong Asan ²⁷ Long tumbuna lain bilong Asa, em wanpela hetman nem bilong em Ahiud na em pikinini man bilong Selomi. ²⁸ Long tumbuna lain bilong Naptali, em wanpela hetman nem bilong em Pedael, em pikinini man bilong Amiud." ²⁹ God Yawe i givim dispela tok long ol dispela lain man long tilim graun bilong Kenan na givim long wanwan tumbuna lain bilong Israel.