1 Uwene u Savuli akuyangana nu kogofya na kwe kugoga avasundukwa va Mwene, ahavala na kwa muputi umupiti 2 nu kulava ukalata wa kuvalila mu masinagogi mu Damasika, ukuti inga akumwaga wumo mwidala, kali mwanavuli kali mwantanda, angavapinya nukuvatwala ku Yerusalemu. 3 Lwe akujenda, shihavombwa ukuti lwe akwinza kupipi ku Damasika, ahagandushila ahamesya hamuzyunguliye nuluhozyo kufuma kumwanya; 4 Pe ahinza agwa pansi ahivwa izwi likuyanga kumwanya, ''Savuli, shoni she ukumvima ine?'' 5 Savuli ahamula, ''We wenu, Mwene? uMwene ahati, ''Ine ne Yesu, we ukumvima; 6 loli nyamuha, yinjila munkaya, mwe kwe vakuvuzye zye uhondiye uvombe.'' 7 Pe avantu ve ajenzite navo u Savuli vahimilila vatali nilyakuyanga, vahivwa izwi, vatahenya nawumo. 8 U Savuli ahanyamuha kufuma pansi, lwe ayigula aminso gakwe, atahenya nashimo; vahamulongozya ukumulema inyove vahamuleta ku Damasika. 9 Kunsiku zitatu atahenyaga, atahalyanga nu kung'wela. 10 Ilelo kwamile umusundikwa ku Damasika vahamwitaga Ananoya. U Mwewe ahayanga nawo munjozi, ''Ananiya?'' Ahati, ''Yenya, ine ndipa, Mwene.'' 11 U Mwene ahati kuwuyo, ''Yinuha, valaga mutudala twe vakuti tugolosu, na kunyumba ya Yudasi uvuzye umuntu we akufuma ku Talisi vakumwita Savuli, pakuti akuyiputa. 12 Ahamwenya munjozi umuntu vakumwita Ananiya akwinjila nukumuviha inyove zyakwe pa pakwe, ukuti ayenyaje havili.'' 13 Pe u Ananiya ahamula, ''Mwene, nivuye kuvinji izya muntu wununo, ukunanga kwe avomvile kuvantu vaho avafinnjile mu Yerusalemu. 14 Vahamwitishizya ve vaputi avapiti ukupinya vonti uku ve vakwitwa pizina lyaho.'' 15 Pe umwene ahati kuwuyo, ''Jendaga, pakuti shivombelo shane ishisaliwa, ukupimba izina lyane kuvakunzi na vamwene na vana va Isilayeli; 16 pakuti kwemulanjizye she kwe ayimbe pa shifukwa shizina lyane.'' 17 U Ananiya ahepa, ahinjila munyumba. ahaviha inyove zyakwe pa wuyo, ahati, ''Wamwitu Savuli, uMwene u Yesu, we akuvonesheye mwidala pe uhinzaga, antumile ine ukuti uposhele ukwenya kwaho nukwizula numupepo umufinjile.'' 18 Mwaluvilo vimo ngati vipapazula vihagwa muminso ga Savuli, pe ahaposhela ukwenya; ahanyamuha ahozelwa; 19 pe ahalya na ahava namaha. Ahihala numusundikwa mu Damasika kunsiku inyinji. 20 Pepala ahamufumusya uYesu mu masinagogi, ahayanga ukuti uwene we mwana Wamulungu. 21 Vonti ve vamwivuye vahasukumila nukuti, ''Te wewula umuntu we ahavananganiaga vala mu Yerusalemu ve vahitaga pizina linili? Ayinzile uku ukuvapinya nu kuvatwala kuva puti avapiti.'' 22 Uwene u Savuli ahonjela nkani amaha, ahavatetemya ava Yuda ve vahihalaga mu Damasika ukusimishizya ukuti u Yesu wu Chilisiti. 23 Lye pajenzite insiku inyinji, ava Yudas vahasiva poka ukumugoga uwene. 24 Loli insivo zyavo zyamanyikilwe kwa Savuli. Vahenyelezyaga pashilyango umusanya nu vusiku ukuti vamugoje. 25 Avasundikwa vakwe vahamusenda uvusiku vahamwisya pansi kujendela muluvumba, vahamwisizya mushiseje. 26 Lwe ayinza mu Yerusalemu, u Sauli ahayezya ukusangana na vasundikwa, avene vonti vahamwogopaga, vatahitihaga ukuti wope musundikwa. 27 Uwene u Balinaba ahamusenda nukumutwala kuva positili, pe ahavavuzya she u Savuli amuwenyi uMwene pidala nukuti uMwene ayanzile nawo, nashe ku Damasika u Savuli ayanzile umwakujimba mwizina lya Yesu. 28 Alinavo, ukwinjila nukufuma ukuzyungulila mu Yerusalemu. Ahayanga ahayanga umwakujimba mwizina lya Mwene uYesu. 29 Pe vahadalinkana nava Yuda va Helenisiti; pope vahalwisyaga ukumugoga. 30 Lye avamwavo vamanyile zinizi, vahamuleta muntende mukesaliya nu kumutuma ku Tasisi. 31 Pe ishi, ishivanza mu Yudeya yonti, mu-Galileya, namu Samaliya mwamile umutende na vayizenzile; pe, nukujenda nilyoga mwa Mwene na muvufwase vwa mu mupepo umufinjile, nishivanza shakuzile mumbazyo. 32 Ilelo kuhinza kwava ukuti, u Peteliahavala mushigavo shonti, ahinza muntende wope kuvantu va Mulungu avafinjile vevahihalaga munkaya ya Lida. 33 Kula ahamwaga umuntu wumo ahitwaga Eneya, we ali mushitala kumaha 8, she afuye uluvazu. 34 Peteli ahati ku wuyo, ''Eneya, uYesu Chilisiti akupozya iwe. Nyamuha tengaga ishitala shaho,'' panapo napanapo ahanyamuha. 35 Pe vonti ve ayihaye mu Lida na mu Shaloni vahenya umuntu vahagalushila kwa Mwene. 36 Ilelo ku Yope kwamile umusundikwa wumo vahamwitaga Tabita ( vahilula ukuti ''Dolika''). Umwantanda ayizuye imbombo inyinza ahavombaga ivya vwila ku vapina. 37 Kuhinza munsiku zyezila ahinza avina nukufya; lwe vamozya, vahamugoneha mushipitu sha pamwanya. 38 Ku Lida kwali kupipi na ku Yope, pe avasundikwa vahivwa ukuti u Peteli amele kwekula, pe vahatuma avantu vavili ku kwakwe, ukumulambilizya, ''Winze kuliswe ukusita kuhava.'' 39 U Peteli ahanyamuha nukuvala navo. lwe vafisile, vamutwaye kushipitu sha pamwanya, navafwilwe vonti vahimilila kupipi navo vahalilaga, vahamulanjizya amenda ninkanzu zye u Dolika ahagomba lwe ashili ali navo. 40 Upeteli ahafumya vonti mushipitu, ahasugamila pansi, ahaputa; pe, ahagalunkana kumuvili, ahati, ''Tabita nyamuha.'' Pe ahigula aminso gakwe, nukumwenya u Peteli ahihala. 41 Upeteli ahamupa inyove nukumunyamusya; Lwe avita avantu va Mulungu avafinjile nava fwilwe, ahavalanjizya umupuma avene. 42 izi zyinzile zyamanyikwa monti mu Yope, navantu avinji vahasuvila mwa Mwene. 43 Zihavombwa ukuti u Peteli ahihala amasiku aminji mu Yope nu muntu hatinji u Simoni, umunyuha makwela.