¹ Ishi mula mwali umuntu wumo munkaya ya Kesaliya, u Kolineliyo izina, umupiti wava silikali ava impuga vatili ya Itali. ² We ali mugolosu, uwene ahamunyilaga uMulungu ninyumba yakwe yonti, pe ahavapanga avantu ivya vwila, ahaputaga kwa Mulungu umwa ku yisimpa. ³ Muhavalilo aha vu 9 ahisiku, ahenya apazelu injozi izya havizya wa Mulungu zikumwishila. Uhavizya ahati, ''We Kolineliyo!'' ⁴ Kolineliyo ahamwenyelezya uhavizya nilyoga lihamulema ahati, ''imputo zyaho nivya vwila vyaho vizuvile ukuva sha kukumbushila isha vyakuyifumya pilongolela pa Mulungu. ⁵ Ishi uvatume avantu munkaya iya Yope vamulete umuntu we izina wu Simoni we akwitwa wu Peteli. ⁶ uwene akwihala numunyuha makwela we izina wu Simoni, we inyumba yakwe yili muluvazu ulwa sumbi.'' ⁷ Lwe uhavizya we ahayangaga kukwakwe ayaefile, u Kolineliyo ahavita vavili ava vwomvi ava munyumba yakwe, nu musilikali umugolosu ukufuma muve vahamuvombelaga uwene. ⁸ U Kolineliyo ahavavuzya zyonti zye zihavombwa pe ahatuma ku Yope. ⁹ ilya ndavi muhavalilo aha 6, lwe avene vali pavulendo vwavo vahapalamila kunkaya, u Peteli ahazuva pamwanya pa nyumba ukuputa. ¹⁰ Pe inzala yihamuvava anzaga shimo ishakulya, pe avantu vali pakuteleha ishakulya, ahapelwa injozi, ¹¹ pe ahenya kumwanya kwigusile pe shimo ishinyamulilo shikwiha, shimo she shali inza she likalatasi likwiha munsi, yikwiha ninguto zyakwe 4. ¹² Munumo mwali muhola vwonti uvwa vinyamana ivya vinama 4 ivintu ivya kusela munsi nivinyunyi ivwa mumwanya. ¹³ Pe izyi lihayanga kuline: ''Yamuha, Peteli, goga ulwe.'' Nkandi uwene u Peteli ahati, ¹⁴ ''Ndali, Mwene; she ine ntaliye nalumo shonti she shivivi nishinyazu.'' ¹⁵ Nkandi izyi lihapyanizya ilya vuvili: ''She u Mulungu ashigomvile ukuva shizelu, atahondeye ukusita ukuti shivivi.'' ¹⁶ Ishi shihavombws hatatu; pe ishinyamulilo umwaluvilo shihanyatulwa ukuva kumwanya. ¹⁷ Pe u Peteli lwe zimuvulunginie nkani izya njozi she ahashenya ahapotwa ukushimanya, yenya, av antu ve Kolineliyo avatumile vimiliye pashilyango, lwe vavuzya idala lya kuvala kunyumba. ¹⁸ Avene vahaholela nukuvuzya alikwi u Simoni, vevahatinji u Peteli, vahihalaga kula. ¹⁹ Lwe u Peteli ashili akusivilila izya njozi, umupepo ahati kukwakwe, ''NYenya, avantu vatatu vakukulondola iwe. ²⁰ Nyamuha wihaje navo nukujenda navo. utahave namagani gani pakujenda navo, pakuti nene mbatumile'' ²¹ Pe u Peteli ahiha kuvantu valka ahati, ''Nenene uyo we mukumulondola. shoni she imwe mwinza?'' ²² Avene vahati, ''Umupiti wavasilikali we akwitwa Kolinaliyo, umuntu umugolosu uno we akumunyila u Mulungu, we akuyangwaga inyinza insi zyonti izya va Yuda, ahapelwa ipangwi ilyinza ukufuma kwa Mulungu nu havizya umufinjile ukuti atume kukwaho ukuti uvale kunyumba yakwe, kwekuti ayinze ayivwe ipangwi ilyinza ukufuma kukwaho.'' ²³ Pe u Peteli ahavitishizya ukwinjila pe ahatendama navo. inzanchi ye yikulandata ahanyamuha nukujenda navo, pe navamwavo vamo ve vafumile ku Yope vahayisanzya. ²⁴ Kundavi yisiku vahafiha mu Kesaleya. U Kolineliyo ahavalindililaga venevo; uwene avitizizye poka avajenzi vakwe navamwavo ava kupipi ²⁵ Zihavoneha ukuva inza uvu lwe u Peteli ayinjiye, u Kolineliyo ahahomana nawo pe ahagwa muvinama vwakwe ukuti amupute wuyo. ²⁶ Nkandi uwene u Peteli ahamwavwa pakushamusya, ahati, ''Yimilila! Nine ne muntu.'' ²⁷ Lwe u Peteli ashili akuyanga nawo, ahinjila pe ahavaga avantu avinji vavungine poka. ²⁸ Ahavavuzya ahati, ''Imwe mweka muzimanyile ukuti telulajilo ku muntu umu Yuda ukuva poka nakwe kuvatandalila avakunzi. nkandi umulungu andanzile ine ukuti ntahamwitaje umuntu nawumo ukuti muvivi pamo munyazu. ²⁹ She shilesile ine ninzile ukusita kudaliha, lwe nkutumwa. Pe nkakuvuzilizya she iwe uhantumaga ine.'' ³⁰ U Kolineliyo ahati, ''Amasiku 4 gegajenda ahavalilo inza she ahenya, naputaga ahavalilo aha 9 munyumba yane; pe nkenya, umuntu ayimiliye pilongolela lyane azyaye amenda amazelu. ³¹ Ahati, ''We Kolineliyo, imputo zyaho zivwisile nu Mulungu, navwe vwa vwila vimukumbusizye u Mulungu izyaho. ³² Mutume wumo ku Yope, tukukwitila umuntu u Simoni we akwitwa u Peteli. We akwihala munyumba ya munyuha makwela we izina wu Simoni, muluvazu ulya sumbi.' Lwe akwinza uwene, aliyanga kulimwe. ³³ Pe muhavalilo hoka nkavatuma kukwaho uli nuvwila pakwinza. Ishi lelo, swenti tuli apa tukuvoneha muminso gamulungu akuvwa vyonti vye imwe muha linganizuwa nu mwene ukuti.'' ³⁴ Pe u Peteli ahigula ilomo lyakwe ahati, ''Nalyoli, ishi pe nazimanyinsyania ukuti uMulungu atakusala. ³⁵ Muvuzilo vwakwe, munsi zyonti wonti we ahamunyila uwene nukuvomba imbombo ingolosu we akwitishilwa kuli wuyo. ³⁶ Imwe mugamanyile amazwi ge avatumiye avantu ava mu Isilayeli, lwe akumusizye ipangwi ilyinza nizya mutende mwas Yesu Chilisiti, wewu Mwene wa vonti- ³⁷ imwe mweka mutamanyile utuvalilo twe tuhavombwa, she shavomvilwe mu Yudeya monti, ukutaliha mu Galileya, ukufuma pa lozyo lwe u Yohani alukumusizye; ³⁸ nizya Yesu uwa mu Nasareti, inza she uMulungu ahamupahazya numupepo umufinjile namaha. Uwene ahajendaga ukuvomba inyinza nukuvapozya vonti vevavunjile amoyo nu satana, she uMulungu ali navo. ³⁹ Iwe sye vahome va zyonti zye uYesu ahavomba, monti munsi iya va Yudeya namu Yerusalemu. vahamugoga uwene pakumusajiha pikwi. ⁴⁰ Pe uMulungu ahamuzusya pisiku ilya vutatu nukumunesya. ⁴¹ Te kuvantu vonti, nkandi ku vahome vala ve vasalilwe nzila nawe Mulungu- niswe swe twaliye nukung'wela nawo lwe azyusile kuvafwe. ⁴² Uwene ahatulajila iswe pakulumbilila ku vantu nukusimishizya ku vantu ukuti uno we wula we ahasalwa nu Mulungu ukuva mulonzi wave valanzi poka navafwe. ⁴³ Zili nawuyo umwenesho ukuti avakuvwi vonti vasimishizyaje, kwekuti wonti we akumwitiha we aliposhela ulu tetelo ulwa mbivi mwizina lwakwe.'' ⁴⁴ Lwe u Peteli akujendelela ukuyanga zinizi, umupepo umufinjile ahavagwila vala vonti ve vahatejelezyaga amazwi gakwe. ⁴⁵ Pe avantu vala vevali kuluvazu ulwa vuvolwa avitisi- navonti ve vinzile nu Peteli- vahasukumila, pakuti ishikunjilwa isha mupepo umufinjile shihakupulwa nakuvakunzi. ⁴⁶ She vahavizya ava panzi vanava vakuyanjila munjango izinji pe vakumutima uMulungu. Pe u Peteli ahamula, ⁴⁷ ''Ishi alipo wumo we angasengula aminzi ku vantu ava ukuti avene vatahozelwe, avantu ve vaposheleye umupepo umufinjile inza she sweneswe?'' ⁴⁸ Pe ahavalajila avene ukuti vozelwe mwizina ilya Yesu Chilisiti. Pe vahamuvuzya ukuti atendame nawo amasiku gamo.