¹ Ilelo ava positili navamwavo ve vamile mu Yeda vahivwa ukuti nakunzi wope vaposheleye amazwi ga Mulungu. ² Ilelo u Peteli lye akwezya ku Yerusalemu, vala vitisiva vuvolwa vahamulonga; ³ vahati, ''Ukuva poka navo vete vavolwa nu kulya navo!'' ⁴ Pe u Peteli ahanda ukuzilingania umwakusimishizya, ahati, ⁵ ''Ine nkaputaga munkaya ya mu-Yope, namile nishitushizya sha mbakuli yikwiha pansi, ngati mwenda umupiti wukwiha pansi kufuma kumwanya ninguto zyakwe zyonti 4.Wukwiha papane. ⁶ Nkashitontomela nukushisivilila . nkenya ivihano vya munsi ivya vinama 4, utukoko twa munzi, ivihano vye vikwavula, niviyuni vwa mumwanya. ⁷ Pe nkivwa amazyi ga kuyanga kwine, 'Nyamuha, Peteli; goga ulye!' ⁸ Nkati, 'Teshezili, Mwene; nashimo ishivivi nishinyazu she shinjiyepo mwilomo lyane.' ⁹ Ilyene izyi lihamula havili kufuma kumwanya, 'She uMulungu azelufizye, utahashite ukuva shinyazu.' ¹⁰ Ishi shavomvilwe honti hatatu, pe vyonti vyagalushiye havili ukuzuva kumwanya. ¹¹ ''Yenya, pepala pamile avanavuli vatatu vimiliye pantanzi pa nyumba pe twasmile; vavatumile kuline kufuma ku Kesaleya. ¹² Umupepo ahandajila ukuvala navo, havili ntahayipagule navo. Avamwitu 6 vahajenda nine, pe tuhavala munyumba ya muntu. ¹³ Ahatuvuzya she ayenyizye uhavizya ayimiliye munyumba yakwe nukuyanga, 'Tuma avantu ku Yopa nu kumuleta u Simoni we akwitwa Peteli. ¹⁴ Aliyanga kwiwe amazwi ge galikupoha iwe na vonti ava munyumba yaho.' ¹⁵ Lwe nkwanda ukuyanga kuvavo, umupepo umufinjile ahinza pa pavo, inza she ayinzile paliswe kuvwandilo. ¹⁶ Nkukumbuha amazwi ga Mwene, she ayanzile, 'Mwemumo u Yohani ahozyaga naminzi; imwe muliyozelwa numupepo umufinjile.' ¹⁷ Pelelo inga uMulungu akuvapa isha vwila ishiholana nashe atupiye pe tuhasuvilaga mwa Mwene u Yesu Chilisiti, nali ne wenu, ukuti imususyaje uMulungu?'' ¹⁸ Lwe vivuye zinizi, vatahayanga nalimo ilya kwamula, vahamutima uMulungu vahati, ''Pe uMulungu avapiye ulupinduho lwa shima na vakunzi.'' ¹⁹ ilelo vala ve vasasite nukuvwimilwa kwe kwa nyamusile pa Sitefani zihafiha na ku Foyinike, Sipelesi, na ku Antiyokiya, kuyanga amazwi kwe kuva Yuda. ²⁰ Loli vamu, avantu kufuma ku sipelesi na ku Kileni, vahinza ku Antiyokiya vope vahayanga na kuva Giliki, ukuvalumbilila inongwa inyinza izya Mwene u Yesu. ²¹ Inyove ya Mwene yali Navo; imbazyo impiti yihapinduha nukwinza kwa Mwene. ²² Ipangwi lyavo lihinza mumakutwi ga shivanza mu Yerusalemu, pe vahamutuma u Balinaba kuvala kuvutali ngati ku Antiyokiya. ²³ Lwe ayinza ayenya uvwila vwa Mulungu, ahovosile ahavagomya vonti ukusyalanu Mwene na moyo gavo gonti. ²⁴ Amile muntu umwinza ayizuye numupepo umufinjile nu lwitiho, na vantu avinji vahonjela kwa Mwene. ²⁵ U Balinaba ahepa ahavala ku Talisi kumulondola u Savuli. ²⁶ Lwe amwazile, ahamuleta ku Antiyokiya. Kuhinza kwava, ukuti umwana wonti vahavunganaga poka ni shivanza nu kumanyisya avantu avinji. ava sundikwa vahavita va Chilisiti ulwakwanda mu Antoyokiya. ²⁷ Ishi munsiku zinizi avakuvwi vamu vahinza ukwiha kufuma ku Yerusalemu mpaka ku Antiyokiya. ²⁸ Woka muvavo, u Agabu izina, ahanyamuha ahalingania mumupepo ukuti inzala impiti kwe yigwanje munsi yonti. Izi zyavomvilwe munsiku zya Kilavudi. ²⁹ Pe avasundikwa, lye vonti va vajiye, vahasiva ukutuma ivisangulwa avamwavo mu Yudeya. ³⁰ Vahavomba zinizi; vahatuma indalama kuvasongo munyove zya Balinaba nu Savuli.