¹ Pahavalilo hehala umwene Herodi ahavalema inyove vamo avashivanza pe ahavizizya venevo. ² Ahamugoga u Yakovo uwamwavo uwa Yohani nu lupanga. ³ Pa kuzezya zinizi ukuti zyavahovosya ava Yuda, pahonjezya ukumulema nawe Peteli. Gali manda ga makate ge gatali niviluzizyo. ⁴ Ilelo lwe amulemile, ahamwigalila mu jele, vahamulemeha kuha mpuga havantu 4 avasilikali ukuti vamulindililaje uwene; pe ahanzaga ukumufumya ku vantu lwe u pasa apitilila. ⁵ Pe u Peteli vahamusunga mu jele, loli ava shivanza vahayikungula ukumuputila uwene kwa Mulungu. ⁶ Pavusiku lwe uHerodi ashili ukumufumya ukuti vamulonje, u Peteli asyupiliye pakasi pava silikali vavili, vamupinyile nama nyololo gavili, lwe ava lindilili vali pantanzi ukwenyelezya ijele. ⁷ Yenya, uhavizya wa Mwene ayimiliye pali wuyo, puvu zelu vuhahozya mumo mu jele. Pe ahamuhoma u Peteli paluvazu pe ahamudamusya wenewo pe ahati, ''Nyamuha luvilo,'' Pe namanyololo gahagwa munyove zyakwe. ⁸ Pe uhavizya ahati kukwakwe, ''Fungaga ilamba lyaho uzwale ni ndwato zyaho.'' Peteli ahavomba vunuvu. Uhavizya ahati kukwakwe, ''Zwala ijaketi lyaho pe undandate ine.'' ⁹ Pe u Peteli ahafuma kunzi pe ahamulandata uhavizya. Atahamanyaga ukuti zye zihavombwa nu havizya ukuti zya mwemumo. Ahasiva ukuti ningavanga nkulota injozi. ¹⁰ Lwe apitiliye pa mulindilili uwavwandilo nuwa vuvili, ahinza ku shijela isha lwiji ishakumulongozya munkaya; luhavigushila lweka avenesho. Pe vahafuma vahavala panzi nukwishila pidala. pe uhavizya ahamuleha pepala. ¹¹ Lwe u Peteli azyagania umwenesho, ahati, ''Ishi nalyoli namanya ukuti u Mwene amutumile uhavizya wakwe ukunefya ine ukufuma munyove zya Herodi, nukufuma muli zyonti zye avantu vamu Yuda vahasuvilaga.'' ¹² Lwe azimanyinsania zinizi, ahavala kunyumba ya Maliya uyina wa Yohani, havili ahitwaga u Maliko, kwe avantu avinji vavungine vahaputaga. ¹³ Lwe ahonyonsizye ku lwiji ulwa shilyango, umuzya umulindu ahitwa wu Roda ahinza ukumwamula. ¹⁴ Lwe agasimishizya amazwi ga Peteli, ukufuma muluseshelo ahapotwa ukwigula ulwiji; ahavavuzya ukuti u Peteli ayimiliye pa mulyango. ¹⁵ Pe vahayanga kukwakwe vahati, ''Uli nishipena.'' Loli uwene ahumishizya ukuti she zili vunuvo. Vahati, ''Wuhavizya wakwe,'' ¹⁶ Loli u Peteli ahajendelela ukuhonyonsya, lwe viguye ulwiji, pe vahamwenya uwene vahasukumila nkani. ¹⁷ U Peteli ahavasonta venevo ninyove yakwe ahati pumaji, ahavavuzya avene mwe u Mwene amufumizizye uwene mu jele. ahati, ''Mumuvuzye zinizi u Yakovo nuwamwavo.'' Pe ahafuma ahavala kuvuzilo uvunji. ¹⁸ shinishi lwe lyinzile isiku, kutali nahashongo pavasikali pazye zihavombwa kwa Peteli. ¹⁹ Pe u Herodi ahamulondola uwene loli ahapotwa ukumwaga uwene, ahavalalusya avalindilili ahavalamulila ukuti vavatwale kumfwa. Pahiha ukufuma ku Yudeya nukuvala ku Kasaliya nukwihala kulanye. ²⁰ Shinishi u Herodi ahavahalalila nkani navantu vamu Tile namu Sidoni. Vahavala kukwakwe nimfundo yoka, pe vahamulambilizya, Bulasitasi, umutuli wa mwene, ukuvavwa avenevo, zye vahalavaga umutende mulandu inkaya yavo yaposheleye ivya kulya vyavo ukufuma mu nkaya ya mwene. ²¹ Pe kwasha u Herodi ahazyala umwenesho amenda ga shimwene pe ahatendama pashitengo; ahagomba uvuyanzi kuli vavo. ²² Avantu vahavilishila, ''Ili lwe lizyi lya shilungu, te lya muntu!'' ²³ Mwaluvilo uhavizya wa mwene ahamuhoma uwene, mulandu atahamushindihaga uMulungu; pe ahalyeliwa ninsonsi nu kufwa. ²⁴ Loli izyi lwa Mulungu lihavula nu kupapana. ²⁵ Lwe u Balinaba nu Savuli lwe vamala imbombo yavo, vahagaluha kwe vafumile ku Yerusalemu, ukuvaletela venevo u Yohani, we ahitwa u Maliko.