¹ U Pauli ali mulwivwano nizyamfwa yakwe. Pe kwanzite pisiku lila ukuvwimilwa ukupiti ukushivushila ishivanza isha mu Yerusalemu; peavitisi vonti vahasata mu vigavo vwonti ivya Yudeya nu Samaliya, veka avapositili. ² Avanavuli ve vahamunyilaga Umulungu vahamusyila u Sitefani, vahamulilila ukulila ukupiti. ³ Nkandi u Pauli ahalwisya ukunangania ishivanza. Pe ahinjilaga munyumba ni nyumba nakuvadendemula avanavuli na vantanda, nukuvigalila mujela. ⁴ Loli avitisi ve vasasite vahavala ukulumbilila izwi. ⁵ U Filipu ahiha munkaya iya Samaliya nukuvalumbilila avene izya Chilisiti. ⁶ Impuga iya vantu yihamutejelezyaga zila zye ahaziyanga u Filipu; ninsivo yoka vahamwivwaga, pe vahenyaga nivivonesyo vwe ahavombaga. ⁷ Impepo inkandamanu zihafumaga muve vinji ve vali nazyo. zihali;a nukuholela nkani, na vinji ve vahataliye na valemazu vahapola. ⁸ Ishi pe mwali uluseshelo nkani mu nkaya. ⁹ Nkandi kwali wumo umuntu munkaya vahatinji u Simoni, we kuvwandilo ahalagulaga; we shima ahavasukumizyaga avantu ava mu Samaliya pe ahayitimaga ukuti ali muntu uwapamwanya. ¹⁰ Ava Samaliya vonti, ukwanda ku munsi ukufiha ku muputi, vahamuteshelezyaga wuyo, vahati, ''umuntu uno gegala amaha aga Mulungu ge gakwitwa amapiti.'' ¹¹ Vahamwivwaga uwene pakuti ahavasukumizyaga ahavalilo ahatali na mayele gakwe. ¹² Nkandi avene lwe vamusuviye u Filipu pe akulumbilila ipangwi ilyinza ukuyana nizya shinamwene sha Mulungu nizyi zina lya Yesu Chilisiti, vahozelwa vonti avanavuli na vantanda. ¹³ Nawe Simoni wope ahitiha, lwe ayozelwa ahanda ukutendama nu Filipu nukuyisimpa. Pe ahenya ivivonesyo nimbombo impiti zikuvombwa, ahasukumila. ¹⁴ Ishi lwe avapositili ava mu Yerusalemu vivuye ukuti avamu Samaliya valiposhele izwi lya Mulungu vahavatumila u Peteli nu Yohani. ¹⁵ Lwe avene visile, vahavaputila, ukuti vaposhele umupepo umufinjile. ¹⁶ She ukufishila ahavalilo he hala umupepo umufinjile atafisile ku muntu nawumo; avene vozelilwe vulo mwizina ilya Mwene u Yesu. ¹⁷ Pe u Peteli nuYohani vahavaviha inyove zyavo papavo, vope vahaposhela umupepo umufinjile. ¹⁸ Ishi u Simoni ahenya ukuti umupepo umufinjile apelilwe munyove izya vapositili, ahavapa avene impiya. ¹⁹ Ahati, ''Mumpe nine uvulamulili uvu, nine, ukuti wonti we ine namuviha inyove aposhelaje umupepo umufinjile.'' ²⁰ Pe u Peteli ahayanga kuli wuyo, ''Leha impiya yaho yilove poka niwe, pakuti ukusiva ukukala ishavwila isha Mulungu ni mpiya. ²¹ Utali nishigavo nashimo ku mbombo ino, pakuti umoyo waho atagolosile kuzya Mulungu. ²² Pelelo upindushe ukufuma kumbivi zyaho, uyipute kwa Mwene, ukuti pamo angakutetela insivo izya mu moyo waho. ²³ She ine nkwenya ukuti uli munsalile inkali nkani namu vukungwa uvwa mbivi.'' ²⁴ U Simoni ahamula ahati, ''Mputila ine kwa Mwene, ukuti kutahave nashimo pa zye waziyanga zye zinaje ine.'' ²⁵ Lwe avene vasimishizye pe vahaliyanga izwi ilya Mwene , u Peteli nu Yohani vagalushila ku Yerusalemu, ukulumbilila ipangwi ku twaya utwinji utwa va Samaliya. ²⁶ Pe ishi uhavizya uwa Mwene ahayanga kwa Filipu ahati, ''Nyamuha valaga ku vuswelo uvwi dala lye likwiha ukufuma ku Yerusalemu ukuvala ku Gaza.'' ( Idala ili lili mulugwa).'' ²⁷ Ahanyamuha nukujenda. Yenya, pala pali umuntu akufuma ku Etiyopiya, umupase uwa vulamulili uvupoiti uwa Kandake, umwene umwantanda uwa Etiyopiya. We ali wu songo wa vyuma vyonti. ahinza ku Yerusalemu pa kuputa . ²⁸ Pe akugaluha uyihaye mwi galeta lyakwe, pe ahavazyaga izya mukuvwi u Yesaya. ²⁹ Umupepo wuhayanga kwa Filipu, ''Valaga uyimilile kupipi ni galeta .'' ³⁰ Pe u Filipu ahamushimbilila, pe ahamwivwa akuvazya u Yesaya umukuvwi, ahati, ''Ukuzimanya zye iwe ukuvazya?'' ³¹ Pe ahati, ''Nakuti vuli ine pe nanti wumo angandongozya?'' Ahamwitizya u Filipu ukuvala mwi galeta nu kutendama nawo. ³² Ishi uluvatiho ulwa mazwi ge umu Etiyopiya ahavazyaga gegano, ''Ahalongolwa inza she ng'onzi kuwe akuvola, inza she hagozi pilongolela iya we akuvegula she hapumile, uwene atahigula ilomo lwakwe. ³³ Mwe nsoni zyakwe nu vwanalyoli vwakwe, vahamusilila. Wu wenu we angaziyanga izya luho lwakwe ukufuma munsi.'' ³⁴ Pe umupase ahavuzya kwa Filipu, ahati, ''Ine nkulava iwe, umbuzye ine wuwenu umukuvwi we akuyangwa, wuyo weka, pamo wumo uwunji?'' ³⁵ U Filipu ahanda ukuyanga, ukwandila izwi linili ahalumbila ipangwi ilyinza ilya Yesu kuwuyo. ³⁶ Lwe akujenda mwidala, vahafiha paminzi gamo uwene umuase ahati, ''Yenya, pali aminzin apa. Shoni she shingankanizya ine pakozelwa?'' ³⁷ U Filipu ahati, ''Nanti ukwitiha mu moyo waho wonti, wandi uyozelye.'' Umu Etiyopiya ahamula, ''Nkwitishizya ukuti u Yesu Chilisiti mwana wa Mulungu.'' ³⁸ Pe umu Etiyopiya ahalajila igaleta kuti lyimilile. Pe vahiha ukwinjila mu minzi, vonti u Filipu nu Mupase. Pe u Filipu ahamozya uwene. ³⁹ Lwe avene vafumile mu minzi, Umupepo uwa Mwene ahamusompola u Filipu, pe Umupase ahajenda nuluseshelo. ⁴⁰ Nkandi uwene u Filipu ahavoneha pa Azota ahadumunsania mushigavo shila, ahalumbililaga ipangwi ilyinza mu twaya tonti ukufishila pe ahinza mu Kayesareya.