¹ Pe u Agilipa ahati kwa Pavuli, ''Iwe wamile uyiyanjile wewe weka.'' Pe u Pavuli ahagolosya inyove zyakwe ahayitetela. ² "Ine nkuyenya nenenye ukuva ne muhovosu, we Mwene u Agilipa, ukuyileta inongwa pilongolela lyaho ilelo ukumbushila nu kundonjelala konti ukwa va Yuda. ³ Lelo pakuti iwe we mumanyi wa miho gonti aga va Yuda na namavuzyo. Ishi ine nkukulava univye nuvutehamu. ⁴ Nalyoli, ava Yuda vonti vazimanyile mwe ine natendamilaga ukufuma kuvunsi munsi iyane mu Yerusalemu. ⁵ Pe avene vamanyile ine ukufuma ku bvwandilo, nanti vanganza ukushitishizya ishi, ukuti ine nali ne mu Falisayi, impuga ye yihayikungula nkani mushigavo shitu. ⁶ Ishi nimiliye apa pakulongwa pamulandu uwa lusuvilo numulaji we uMulungu agomvile nava tata. ⁷ Uno we mulaji ukuti inkolo zyitu zyonti 12 zikusuvila ukuposhela she zikumuputa uMulungu uvusiku nu musanya pe ishi she shalusuvilo lunulu, Mwene, ukuti ava Yuda vakundonjelela ine. ⁸ Shoni she likusivililwa nimwe mwe vasita lwitiho ukuti uMulungu akuzyusyaga avafwe? ⁹ Ishi mwemumo, ine neka nkasiva ukuti imbombe ivintu ivyinji ukulivushila izina ilya Yesu uwa mu Nazareti. Ine nkazivomba izi mu Yerusalemu. ¹⁰ Ine nkavigalilaga mujele avinji avantu avazelu ava Mulungu nu vulamulili vwe naposheleye ukufuma ku vaputi avapiti; pe avene lwe vavagoga, pe nine nkitishizyaga. ¹¹ Nkavayivyaga utuvalilo utwinji muma sinagogi nkalwisyaga ukuvapatilishizya ukuti vansamulaje. Nali inza we apenile ishipena ukuvavushila avene nu kuvavwima na mwe nkaya injeni. ¹² Lwe nkuvomba zinizi, nkavala ku Damasikasi nu vulamulili ni ndajilo ukufuma ku vaputi avapiti; ¹³ Pe lwe ndimwidala kula pamusanya pakasi, Mwene, nkenya uvuzelu vukufuma kumwanya vwe vuhalamaga ukushila izuva lihalamila ukuzyungulila ine navanavuli ve tuhajendaga poka navo. ¹⁴ Lwe swenti tuguye pansi, nkivwa izwi likuyanga kuline lye lyayanzile munjango iya shiheberi, 'Savuli, Savuli, shoni she ukumvima ine? Shigomu kuliwe ukuyipana indisa. ¹⁵ Pe ine nkati, 'We wenu, Mwene?' uMwene ahamula, 'Ine ne Yesu we ukumuvwima. ¹⁶ Pe ishi nyamuha uyimilile; pamulandu wi izi nakuvoneshela iwe, nukusala iwe ukuva we muvomvi wane nu home ukuyane nivintu vye inti inkulangaje iwe muntanzi. ¹⁷ Havili ine ndikuponia ku vantu naku vakunzi ku vavo kwe ine nkukutuma, ¹⁸ kuti uhavigule aminso gavo nukuva pindula avene ukufuma ku shisi ukwinza kuvuzelu nukufuma kuvulongozi uvwa satana ukuva kwa Mulungu, kwekuti vahinze vaposhele ukufuma kwa Mulungu ulutetelo ulwa mbivi nu vupyano vwe ine ndivapa vevizuzye nu lwitiho muline.'' ¹⁹ Pe lelo, umwene u Agilipa, ine ntahazisula injozi izya kumwanya; ²⁰ nkandi, ku vala avamu Damasika vatalishe, pe napa Yerusalemu, na monti mu nkaya iya Yudeya, nakwe kuvakunzi. Ine nkavapa ipangwi ukuti vapindushe nukugalushila kwa Mulungu,, nukuzivomba imbombo inchindamu izyalupinduho. ²¹ Ishi she shalesile ava Yuda vandeme ine mwi tempeli nukunkunga ukuti vangoje ine. ²² Pelelo, ine mposheleye uvwavwili vwe vufumile kwa Mulungu ukufiha isiku ilyilelo, pe nimiliye nukusimishizya ku vonti avansi na vapiti zye zitashizile zila zye avakuvwi nu Mose vaziyanzile ukuti zilivomba- ²³ ukuti u Chilisiti ahondeye ukuyimba nukuva wakutaliha uwene pakuzyuha ukufuma kuvafwe aliyanga izya luhzyo ku vantu avitu na kuvakunzi. ²⁴ Uwene u Pavuli lwa mazile ukuyimililila, u Fesitasi ahati kwizwi ipiti, ''Pavuli, uli nishipena; ukumanyila kwaho ukupiti kwe kwakupenenia iwe.'' ²⁵ Pe uwene u Pavuli ahati, ''Ine ntapenile, we mushindamu nkani Fesitasi, nkandi ine kuyanga amazwi aga nalyoli havili ga njele indanzi. ²⁶ She umwene azimanyile izya vintu ivi; pe nkuyanga kuvujimvu kuwuyo, she vandambilizizye ukuti nashoka pali izi she shingavwama ukufuma kukwakwe. ²⁷ Ishi imwe mukuvitiha avakuvwi, we Mwene Agilipa? nzimanyile ukuti iwen ukwitiha.'' ²⁸ Uwene u Agilipa ahati kwa Pavuli, ''Muhavalilizyo ahansi ukwinza ukundambilizya ine nu kumbiha nemu Chilisiti?'' ²⁹ U Pavuli ahati, ''ine nkuputa kwa Mulungu, ukuti nashe ahavalilo hangafupila pamo hatalimpe, tewewe weka, na vonti ve vakunivwa ine ilelo, valiva ngati nene, nkandi avene vataliva nu vunyololo uvwa jele. ³⁰ Pe umwene ahimilila, numusungansi, nu Berinisi wope, vala ve vatendime navo; ³¹ lwe vafumile mwe vahahomanaga, vahayangana woka nu wamwavo, vahati, ''Umuntu uno atavomvile nashimo she shinga muletela imfwa pamo ukukungwa.'' ³² Uwene u Agilipa ahati kwa Fesitasi, ''Umuntu uno ahondeye ukusatulwa nanti uwene atasitakaga kwa Kayesala.