¹ Lwe tujenzite ukufuma kuvavo, pe vahagoloha kuvala ku nkaya ya Kosi, pe nisiku ilinji ku nkaya ya Lodo, pe vahafuma kula nukuvala munkaya ya Patala. ² Lwe vazile uvwato likulovoha ukuvala ku Foyonike mwe tuhayipashilas nukuvuva. ³ Ilelo lwe twayenya iya Sayipelesi, tuhalileha kuluvazu lwa mongo uvwato, tuhajenda ukuvala mu Siliya nukufiha ku Tili, kwe uvwato vuhisyaga umuzigo. Ilelo lwe twavaga avasundikwa, tuhihala mumo amasiku 7. ⁴ Ukujendela mwamupepo vahamulesya u Pavuli ukuvala mu Yerusalemu. ⁵ Lwe amasiku gitu kula gakwana, pe tuhepa nukujenda ukuvala mwidala lyitu, navonti, poka navashi navana vavo, vahatuvunga iswe ukufuma munkaya. Pe vahasugamila pansi kushipuma, vahaputa. ⁶ Ilelo pe tuhalagana navo. Pe tuhinjila muvwato, nukugaluha kuhaya. ⁷ Ilelo lwe tumazile uvulendo vwa pasumbi ukufuma ku Tili, tuhafiha mu Potolomayi. Tuhavalamuha avamwitu nukwihala navo isiku lyoka. ⁸ Isiku ilinji tuhavaleha nukuvala mu Kesaleya. Tuhinjila munyumba ya Filipu, umulumbilili, woka muvala7, pe tuhihala poka navo. ⁹ Ilelo umuntu uno amile navana avanamwali avalindu 4 ve ahakuvwa. ¹⁰ Lwe twihaye mwemula amasiku gamo, pe ahiha ukufuma mu Yudeya wumo umukuvwi izina u Agabasi. ¹¹ Pe ahinza kukwitu ahasenda ulamba wa Pavuli. Umwene ahayipinya muvinama vyakwe namunyove ahati, ''Ishe she umupepo umufinjile wukuyanga, ''Pe ava Yuda mu Yerusalemu valimupinya wenewo umuntu umwrnesho lamba, valimulemeha munyove zyavakunzi.''' ¹² Lwe twivuye zinizi, swe vonti na vantu ve vahihalaga muvuzilo vwevula vahamulambilizya nkani u Pavuli ukuti manyi avale ku Yerusalemu. ¹³ Uwene u Pavuli ahamula, ''Mukuvomba shoni, ukulosya nu kuvunza umoyo wane? She nzisengini, te kupinyiwa kweka, loli nakwe kufwa mu Yerusalemu shifukwa shizina lya Mwene uYesu.'' ¹⁴ Ukufuma pa Pavuli vatahamulambilizyaje, she twasyaye tupumile vulo pe ahati, '' Uvwigane mwa Mwene vuvombwe.'' ¹⁵ insiku zinizi lwe zyajenda, tuhanyamula ivikwama vwitu nukuvala mu Yerusalemu. ¹⁶ Navamwavo vahajenda niswe vamo avasundikwa ukufuma mu Kesaleya. Pe vahamuleta wumo umuntu izina Munasoni, umuntu ukufuma ku Sayipesi, umusundikwa uwa mwandilo, mwawuyo mwe tuhihale. ¹⁷ Lwe tufisile mu Yerusalemu, pe avamw3itu vahatuposhela nuluseshelo. ¹⁸ Pisiku ilinji u Pavuli ahajenda niswe kwa Yakovo, na vonti avasongo vali papo. ¹⁹ Lwe avalamusilevenevo, pe ahavavuzya woka nawoka ivintu vye uMulungu avomvile kuva kunzi ukujendela muvuvombezi vwakwe. ²⁰ Lwe vivuye zyenezyo, pe vahamutundumiha uMulungu, pe vahati kukwakwe, ''Mu kwenya, vamwitu, gali galinga ama 1,000 gavitisi ava ku Yuda. Vonti vahayikungula ukusunga indajilo zyavo. ²¹ Vavavuzizye ukuti, ukumanyisya monti ava Yuda ve vakwihala nava kunzi ukumuleha uMose, Puvavuzye uti mutahavavole uvuvolwa ava vinyu, nukuti mutahagalandate amiho agavo. ²² Tuvombe shoni? Valiyivwanye ukuti winzile. ²³ Vombi she tuhayanga kwimwe. Tuli navo avanavuli 4 ve vahafinga ulufingwi. ²⁴ Vasende avantu vanava pe uyizelufye poka navo, uvalipilile vye vasuvile venevo, ukuti vefwe kumatwe gavo. Vonti alimanya ukuti ivintu vye vahavuziwa ukukwafania lwe zyilenga. pe valimanyila kukwaho ukuti niwe ukulanadata inkomelezyo. ²⁵ Ukukwafyania navakunzi ve vahasuvila, twasimvile twadumuye ukuti vayisunje avenesho ukufuma kuvintu ivya kufinjila kumalungu, ukufuma mwivanda, ukufuma vye vyayinyonga, nuvutalamalandu.'' ²⁶ Ilelo u Pavuli ahasenda avantu, isiku lya ndavi ahayizelufya poka navo. Ilelo pe vahinjila mu tempeli, ukuvapa amasikugakuyizelufya pe gali kwaniliziwa pe vahatwalaga imputile uno iyakwe uno iyakwe. ²⁷ Lwe amasiku 7 gala gasila, vamo ava Yuda ukufuma mwa Asiya, vahamwenyaga u Pavuli mwa tempeli, vahayisochelezya impuga yonti iya vantu pe vahaviha inyowe pali wuyo. ²⁸ pe vahapunda vahati, vantu va visilayii, twavwe. umunthu uno wewe ahamanyisya avantu vonti konti kula ivinthu ivilwani kuvantu, ninkomelezyo, pa vuzilo uvunye. Paluvazu, ahawinjizya nagiliki mwa tempeli nukuhandamanya pavuzilo uvufinjile. ²⁹ Inza she vamu vwenyi kwisinda utilofimo uwa mwa Efeso ukuti vatendame nawo munkaya, vahasiva ukuti u Pauli amulesite wenevo mu tempeli. ³⁰ Pi nkaya yonti yihahovoha, pa vantu vahashimbilila poka poka pakumulema upauli. vahamudendemulila kunzi kwa tempeli, ni nyiji naluvilo luvilovahigalila. ³¹ Lwe vakwanza ukumugoga uwene ipangwi lihinza kwa songo wavalindili ukuti wonti u Yerusalemu ahavuluma. ³² Nahalinga uwene ahawasenda avasikali navalongozi vavo vahashimbila ukuvala kwi vumba. Lye avantu vahavenya ukapitawo umpiti nawa sikali, vahavalesya ukumuhoma u Pauli. ³³ Pe ukapitawo umupiti ahafiha ukuti ukumulema u Pauli, nu kumulamula uwene ukuti vamukunje namanyololo gawili. Pahavavuzilizya ukuti wunanu wununo havili avovile shoni. ³⁴ Vamo mumpuga vahazuma ishongo kushintu shoka avanji wahayangaga izinji. ukapitawa ahapotwa nukumanya ubwanaloli shifukwa vonti vahazumaga ishongo, ahalamula ukuti u Pavuli utwalaje mwilinga. ³⁵ Lwe afisile pikwelelo, pe ahanyamulwa nava sikali shifukwa shakulwana ku mpuga. ³⁶ She impuga ya vantu yamulandite vahapunda vahati, ''Uku mumwefwe wenewo!'' ³⁷ Upavuli lwe akuvala ukutwaliwa mwilinga vahati, usongo umupiti wa vasikali shikwitishiziwa kwine ukuti injanje shimo kwimwe? Usongo ahati, ''Ukuyanga shi Giliki? ³⁸ Vuzye te we mu Igiputo mwe ahavalilo hamo mwanzite ukusambushila anukuvalongozya avantu 4,000 pava 'Pumavintu' ukufuma mulugwa?'' ³⁹ U Pavuli ahati, ''Ne mu Yuda, ukufuma munkaya ya Talasi mu Kilikiya. Ye nkaya yetefumukwa mwe ine kwihala kuvalava, mwitishizye ine nkuyanga ku vantu. ⁴⁰ Lwe usongo amwitishizizye, pe u Pavuli ahimilila pamwanya pikwelelo. Nukuvasonta ninyove avantu. Pe kwamile ukupuma mya mya. Ilelo pe uwene ahayanga munjango yavo yavo ya shihebeli. ahati,