¹ Lwe umuyava yuva watehana, uPavuli ahavita avasundikwa pisinda ahavagomya, ahalagana nukuvala ku Makedoniya. ² Lwe ashilingania mu vigavo vila lwe ayanga amazyi aminji agakuvagomya, ahafiha ku Gilisi. ³ Lwe adila amezi gatatu kuko, vahamuvwimaga ava Yuda lwe ali kupipi kufihab ku Asiliya, pe ahasivilila kugaluha pe ahilinkania mu Makedoniya. ⁴ Ve vamile nawo konti ku Asiya Sopato mwana wa Filuhasi uwa ku Beliya; u Arisita nu Sekunda, vonti vitisi vaku Tesalonika; u Gayasi waku Debe; Timoteyo; nu Tayikasi nu Tofimasi waku Asiya. ⁵ Nkandi avantu vanava vahalongolela kuliswe havili vahagulilila iswe mu Tolasi. ⁶ Tuhajenda mwasumbi ukufuma kuva Filipi lwe amasiku gajenda aga makate ge gatali niviluzizyomu Tolasi. Pe tuhadila kuko insiku 7. ⁷ Ilelo pisiku itanzi lya pasabata, lwe twakungine poka kumensula amakate, uPavuli ahayanga ku vitisi. Ahasivaga ukunyamusya isiku lya kundavi, pe ahapitilizya ukuyanga izwi kufishila mpaka pavusiku pakasi. ⁸ She mwamile inkozyo nyinji munyumba yeyamile pa mwanya mwe iswe twavungine poka. ⁹ Pivwindo pe patendime umulumendo izina wewu Eyutaka, we agonile utulo utwivizu. Lwe uPavuli ahava nkani ukuyanga, umulumendo uno pe ahasyupila nkani, lelo ahasaguha kufuma panyumba ya vutatu pa mwanya pe vakumuseva lwe afuye. ¹⁰ U pavuli ahiha pansi, ahalambalala pamwanya, nu kumufuhatila. Pe ahayanga, zitahavatamwaje havili, she uno mulanzi.'' ¹¹ Pe ahazuva kunyumba havili nukumensula amakate nu kulya. Lwe ayanga navo ahatali ukushila kumasho, ahajenda. ¹² Pe vahamuleta umulumendo mulanzi pe vali vakupumiliziwa nkani. ¹³ Pe iswe tuhalogolela pantanzi pa Pavuli pa vwato pe tuhajenda ukuvala ku Aso, she mwe tuhatinji tukumunyamula u Pavuli. Izi zye wuyo aganile kuzivomba, mulandu aganile ukujenda pansi. ¹⁴ Lwe tuhomine nawo ku Aso, tuhamupashila muvwato nukuvala ku Mitalani. ¹⁵ Pe tuhajenda mwa sumbi havili tuhafiha ishandavi kulungama insungo ya Cheyo. Ishandavi tuhalama insungo ya Samosi, havili kufuma apo tuhafiha ku nkaya ya Mileteni. ¹⁶ She u Pavuli asivile ukujenda mwa Efeso u umukali, ukuti atahave adile ahavalilo mun Asiya; she ahashimbililaga mu Yerusalemu pisiku lya pentekositi she mwonti mwe zingavela kukwakwe ahazivomba vunuvo. ¹⁷ Ukufuma mu Mileti ahatuma avantu ku Efeso nu kuvita avasongo va shivanza. ¹⁸ Ilelo lwe vinza kuli wuyo, pe ahavavuzya ahati, ''Mwenemwe muzimanyile, ukwanda isiku lya vwandilo lwe nahanya mu Asiya, ngati she nadiliye nimwe. ¹⁹ Nkamuvombelaga umwene ninsivo zya kuyisya namansozi, havili havili namalandu ge gahavombwa kuline mulandu wa valugu vwava Yuda. ²⁰ Muzimanyile kuti ntalesile kukumusya kulimwe zyonti izyakuvavwa, havili she nksvasambilizya kuvwinji inyumba kunyumba, ²¹ kusimishizya ku vonti ava yuda nava Giliki kuzya lupinduho kwa Mulungu nizya Lwitiho mwa Mwene witu uYesu. ²² Ishi pe yenya, nkujenda ku Yerusalemu, pe nkututuliziwa numupepo, ntamanyile zye zinganaga kula ine. ²³ Musuvile ukuti umupepo umufunjile wukunsimishizyaga ine munkaya zyonti amanyololo nuvuyimvi viguliye ine. ²⁴ Nkandi ntakuvihaga vwapamwanya uvulanzi vwane, nanti ningamalizya vulo imbombo yavavombezi vwe nkaposhela kwa Mwene uYesu, kusimiushizya inongwa ya vwila vwa Mulungu. ²⁵ Ishi yenya, inzimanyile ukuti imwe mwenti, muli vamo ve nkulumbilila izya shinamwene sha Mulungu, mutaliyenya isheni shane havili. ²⁶ Nkandi kusimishizya papinyu isiku linili, ukuti ntali nishifukwanu muntu wumo. ²⁷ She ntazyisile nazimo ine kuvavuzya zye uMulungu akasime. ²⁸ Ilelo mushenjele palimwe mweka, havili naku ng'onzi zyonti zye umupepo umufinjile azisazile kuti imwe muzyenyelezye. Mushevaje ukudima itempeli lya Mulungu, lye ahalonka namavanda gakwe. ²⁹ Ine nzimanyile ukuti lwe najenda, impumpi inkalazu ziliyinjila palimwe pe zitalileha idimilo nalomo. ³⁰ Inzimanyile ukuti napakasi pimwe vamo avantu valiyimilila nu kuyanga amazwi ge mavivi she kuti avasundikwa va valandate vavo. ³¹ Pe mudamule. Kumbuha ukuti mumaha gatatu ntalesile kuvasoha woka na woka uvusiku nu musanya havili nnamansozi. ³² Pe nkuvaviha imwe kwa Mulungu havili izwi lya vwila vwakwe, lye lingavazenga havili kuvapyaniha ku vonti ve vahasevwa. ³³ Ine ntahasenda uwa muntu u siliva,golodi amwe shizyalo. ³⁴ Imwe mweka muzimanyile ukuti nyove zyane zinizi zye zihampanga ivwakusovelwa na vevamile nine. ³⁵ Muli vyonti nkuvapa ishiholanio sha kuvala avayeyevazu, havili she mukumbuhaje izwi lya Mwene uYesu, amazwi ge mwenesho ahayanga; 'Sha vulote nkani ukuvapa kushila ukuposhela.''' ³⁶ Lwe ayanzile mwidala linili, ahasugamila pansi havili ahaputa poka navo vonti. ³⁷ Kwamile ukulila kwa vinji vahamufuvatila nu kumufyompa. ³⁸ Vali vakuswimililwa mulandu wa zyonti zye u Pavuli ahayanga, ukuti vatalivuyizya ukwenya isheni shakwe. Havilipe vahamusindishila ku vwato.