5
Actemacja actacmanma nentemacja
1
Meliennajo nquec apquellanei'o apqueluaneiam la'a, ntasec coca elleltennasancoc nentemacja malha actonac apiapom apanquec la'a, eltacmelques jata njan apquetco'oc malha actonac apqueliaheng'a apanquec la'a.
2
Eltacmelques jata njan aluaneiam malha actonac nquen apanquec la'a, eltacmelques jata njan nqueluana atco'oc malha actonac apquelialheng'a apanquec la'a, mancotsepanquec na apnengiec ma'a.
3
Elpasem jata njan lhentampac'a metca nac atcac,
4
coca apcacjanco la atcac ma'a, atcac jata eltacmelquesec ma'a malha apqueliaqmoncasecja la'a altacmelquescama lhta amanie, coca acleclemelha njan apualhoc Engiapom Neten ma'a.
5
Coca lhentampe la'a acnecja nlhepquennenga ncoie', nconmalhnama mota Engiapom Neten lhamacjo acnem canjan pelhasep ncanec niawec epasmoc jata m'a.
6
Coca lhentampe la aclhenquescama
aquiasponcomacja nquec au'alhoc la'a, malha njan ntac atsepma la m'a.
7
Lheiap Timoteo, engiana ta elleliejecjoc lhamacjo asqueltacja nac etnancoc cacpota mancollentepcasalhquec apqueluesai'a m'a,
8
coca melleliajacjo la m'a melpasmec na apquetcac ma'a, mang na ncoitac meliasqueiam ma'a, tep anquec meliamolhma metlhoc ma'a meliojo nac mocjom Engiapom Neten.
9
Elpeneso ta apnaqtalhesaicamoc aluesai'a lhentampac'a cacpota ncotlhewancoc caselha alpasmoma, coca wanlha ta aluaneiam acuaiacmo tep 60 iantelhcapa anco'oc, wanlha coca lhema atawa' acuetai'a secje lhta,
10
canjan apquetlheianma la enenlhet alanai'a caselha altacmelo, ca ctonac altacmelquescama la atcac, canjan actacmanma mota anmaicamoc tacja amaica'a, aliengiesquescama
njan apmanco'oc
apquellelto la Jesucristo apquennemolhema enenlhet, alpasmoma mota apquellengaianco aquientalhnema, allelto lhta njan allanecamoc lhamacjo actemacja caselha altacmelo.
11
Coca menactalhes anquec aluesai'a m'a atco'oc anac lhentampac'a, ncanec njeclhec quelha ncotnec aclhenaicama au'alhoc ncotengiecjac atawa', acjemo quelha nja ncotnec actacja aliatecama ncasennama Cristo,
12
mancoieplauquesec actacja alheianma, ncoselhnanalhcoc jata nquec najan.
13
Canjan acpenesalhco la acpecquenammalhca acuesai'a m'a, ncowac quelha njan mancoiacuaiam ncomacmama, ncotnama quelha njan amaica'a natemma la'a, ncomalengionwomoc quelha njan acuanlha la natemma, nwanenwacmec na acuetacja la aquientalhnema mo'oc, nlheianwacme nquec najan.
14
Asqueltawec co'o atco'oc la lhentampac'a ncolliemjapecjac mocjom, ncolluetecjac atcac, ncollawanac na ncoltacmelquesec najan, netamen ncotno emmo'oc mancoimatquesama ta m'a lhentampac'a nac,
15
moclhem'a lhentapca'a coca nqueluatesanquec alleliejecjoc Cristo, coca nqueltemenwacmoc alleliejecjoc ma'a satanás.
16
Ca lhema nqueluana la acto Jesucristo apnemolhema acnema acnemacja lhema lhentampe la'a, ntase' ncopasmo nquec ma'a cacpota mancolientelhec aplhamacjo Jesucristo apquennemolhema m'a, wanlha coca ntasec elpasmoc lhentampac'a altaiecja nlhepquennenga ncawe nac.
POner titulo (instrucciones a los dirigentes de la iglesia)
17
17 Canjan metno apquetco'oc anac apquellelto apquelleltennaicamo, apquetlhecmosecamoc, apquetlhenquescama njan Jesucristo apquennemolhema apcacnecjelha, ntasec etlhewancoc aquianmoma aquietemo ncoie' aniem'o apquellai'o,
18
ca actemo nac na aclheianma Engiapom Neten apaioma m'a:
«Mengiapquesanquec atong buey necsa aptepelquecja trigo apelhcapcoc »
ca ntemac ma'a.
Ca ntemac na mo'oc aclheianma: «Nietawec elhcac aquianmoma apmacmecama apto la apmacmecama» ca ntemac ma'a.
19
Coca lhema apjapac la enenlhet apuecja apnacja lheiap apquetlheianma metno apquetcoc ncolatsecama aptemacja, mengiailho nquec ma'a metco la njan apquetlhelhma'a apcanet nlho ca la apcanet'olhema enenlhet apqueluetaianco m'a.
20
Coca eliennajo ta ellanjoc lheiap ma'a metno apquetco'oc anac meluatesaicamo nac meliamolhma napaqtawec aplhamacjo enenlhet'awoc la'a cacpota ellagac apquellelto apquellengai'a m'a.
21
Asqueltawe etnec lheiap napaqtec Engiapom Neten, Jesucristo, canjan enenlhet neten apqueliequiescama, eliejecjoc jenganemacja astacja lhquec ascano, etne apeiwomo napaqtawec aplhamacjo enenlhet'awoc, etne ta njan apnescamo mo'oc apquellanei'o po'oc.
22
Colquetamama ta apualhoc amanie nquec secjec apmajai'a enenquenec apmeioc tacjaplhet la enenlhet cacpota etnesquesec apquemjama apmanie' m'a apiesecsec Jesucristo apquennemolhema, coca mancolquetamenca la apualhoc ma'a, etnec jata njan lheiap malha apselhnanemmap aniem'o m'a enenlhet mancolatsecama apmacmecama, etne ta mota alhnai'o apualhoc lheiap.
23
Wanlha mota acmasca apuacmo lheiap, eienja ta iemmen canjan quetsec vino.
24
Moclhem'a enenlhet apquellanecamoc anac meliamolhma apqueluetacpec iocjalhmec anquec nenwanlha nac, ncolhec jata njan aliecpelco m'a, napocja njan enenlhet meluetacpoc apquellanecamoc caselha ncollatsecama nenwanlha nac, coca ncolhec jata njan aluet'o m'a.
25
Moclhem'a njan enenlhet apquellanecamoc anac actacmanma apqueluetacpec iocjalhmec anquec nenwanlha nac, canjan moclhem'a enenlhet anac apquellanecamoc caselha altacmelo malha aquielhammalhco nac, eluetacpoc jata njan ma'a.