4
Apuai'a ta ncolatsecama jengetlhecmoscama
1
Aplheianmec Espiritu acto iocjalhmec anquec acmac'o ta ncowac actemonwanlha nnelha acnem, moclhem'a eluatesanco ta aptaicamoc meliasqueiam, elieplo'oc jata casecapo au'alhoc jengiennenquescama cacpota njan jengetlhecmoscama anco'oc queliacjameio.
2
Elleliejecjoc jata m'a jengetlhecmoscama apqueltemacja janet apualho'oc anac cacpota njan apquenmopuanca ania'a nac, anmasquenwaiam anac atlheianma apualho'oc ellanac actacmelo caselha.
3
Ellacsec jata etengiancoc apnaqteianca'a enenlhet'awoc, ellacsec jata njan etawancoc aptecamoc moclhem'a nentomacja la'a, coca Engiapom Neten alhta niecje apquellanai'a m'a lhamacjo nentoma nac cacpota etawancoc apquellelto nac meliasqueiam, apqueliojo nac acto jawe ngiapac anque, etnancoc na gracias Engiapom Neten.
4
Jai, lhamacjo caselha apquelentepquescama lhta Engiapom Neten ntasec etawancoc enenlhet'awoc ma'a, meltacnewamancoie', aplheianmec Engiapom Neten ma'a allelto alalhnai'o nquec ma'a lhamacjo nentoma nac,
5
apuanca'ac etawancoc aquieplomo coca aptaicamoc gracias Engiapom
Neten.
6
Timoteo, asqueltawec etlhecmocsec lheiap caselha asqueltennaso lhquec aplhamacjo engelialheng'a jam, netamen ncowac jata aptema lheiap aptacmanma apcasennaicama Cristo Jesús, apiennactema aniem'o apqueliejecjo meiasqueiam canjan actacmanma apquetlhecmoscama allaicamoc malha nentoma aljaiwecja apiempec cacpota ncancoc apiennactema.
7
Mengiailho nquec ania'a lhennenga nema atlheianweiam alhma ammelhma nac Engiapom Neten, aniem'o coca enenlhet apanco'oc apancawec ma'a, lheiap coca elana mota caselha acpeiwomo malha njan aptac apqueleiwesammap la'a.
8
Aselhtec apqueluetai'a actacmanma apiempeioc ma'a apquellelto nac apquelleiwesammap la'a, coca m'a acto neten anquec actacmanma apquellelto nac apquellanecamoc la caselha acpeiwomo, apenescanque lhta njan lhema apaioma Engiapom Neten ma'a elleltacmelquesquesec necsa apquellaniemjaicama jenque'e nalhepop anac, canjan alhaiec ma'a neten,
9
jawe ngiapac anquec astacja lhquec alheianma, manjeliasquemanque'.
10
Ca ncanec na ennenco'o nentengiaiancawec engiempeioc nenmacmeianca, nellammelhmec na jengellammelhmacja la'a ncanec nietnec alleljalhnecama engellualho'oc jengelpasmoc jata Engiapom Neten apto metnenwaiam annelha, apto njan jengeluonquescama tep aplhamacjo enenlhet'awoc, tep anquec ma'a apquellelto la meliasqueiam
11
Etlhecmos jata lheiap jenque'e caselha nac alheno lhcaiec, cacpota njan ellanac elleliejecjoc enenlhet'awoc jam.
12
Mengianco nquec na ncolhec actemesquesantamo coneng lheiap aniem'o apquetcoc mocjom lheiap, eliatama ta nja mota aquietemo nquec aplheianma, eltacmelcasacpo ta njan, elto ta njan ncalhnoc apualhoc anac, coiet jata njan mei'asqueiam canjan apcamelaiam po'oc cacpota aplhamacjo enenlhet'awoc eluanancoc aptemacja lheiap.
13
Necsa jeljalhanma co'o lheiap jam ntasec elietsete mota napaqtawec Jesucristo apquennemolhema waccajac Engiapom Neten apaioma, eliatecjo ta mota njan ma'a, etlhecmosamo ta njan.
14
Emama ta apmopuana aplhewai'a lhta necsa apnenquenaicamoc apmeio'oc alhta tacjaplhet metno apquetco'oc aniemai'o coca njan ma'a Engiapom Neten aptema.
15
Etacmelcaso ta apquellanei'o caselha asqueltacja lhquec elanjoc lheiap cacpota eluetac enenlhet aquiennacuaiam apualhoc.
16
Engiawacpo ta apanquec na lheiap aniem'o apualhoc apanquec la aquiatecamoc altemo elanac ncolatsecama, elquetnamoc jata cacpota metlhecmocsec mancoietemo. Ca apqueliajacjo la astacja nac ascano lheiap, ewoncasacpoc jata njan tep lheiap, eluonquesec jata njan tep apquellelto la apquelleliejecjo apqueltennaicama lheiap.