¹ Quetlhencap elialheng'a apquellelto nac esclavos, ntasec ellajo mota apuesque apanco'oc cacpota menaqtewacsec enenlhet apuesai'a Engiapom Neten ma'a canjan jengetlhecmoscama nac ennenco'o. ² Moclhema coca apcacjanquec apqueluescai'e apanco'oc apquellelto Jesucristo apquennemolhem'a m'a, motlhenanquec na apualho'oc apquenmacmesanca la'a ntasec metengianquec apiempeioc ncanec malha apquelialheng'a apancawec. ¡Ma'! ntasec etengiancoc apiempeioc necsa apquenmacmesaicama m'a aniem'o acnemo mo'oc meliasqueiam quetlhencap ma'a, malha apqueltonac apquelialheng'a apancawec apquellamelammacpo la'a. Asqueltawec co'o etnec lheiap apquetlhecmoso ta jenque'e, ³ apto la lhema enenlhet apsoiam moc actema jengetlhecmoscama mancolhnemo m'a jengetlhecmoscama apuesque engancoc Jesucristo, anmelhma m'a jengetlhecmoscama enganco'oc anac actemacja mongiasqueiam anac, ⁴ coca apto m'a apcammacpo enenlhet anac, meijanweiacmo njan, wanlha aptengia mota apqueliamenammap po'oc, netamen ma'a aluo'o nengiasepquescama, nennapommalhca, nentacnoncoma emmo'oc, mantemesquescama iocjalhmec emmo'oc, ⁵ apqueliamenammap anac apiesecsec enenlhet'awoc anac malha alieijama lhma, meliojoc acto jawe ngiapac anquec, apquetlhenacpawe apanquec najan apquellelto apqueliamolhma meliasqueiam coca aptengianque mota apanco'oc apancawec caselha altacmelquesquescama la apquellaniemjaicama ⁶ Coca acto jawe ngiapac anquec aquiawai'a nquec altacmelquescama nellaniemjaicama nentanco la m'a neliamolhma Jesucristo apquennemolhema, nentanco la njan wanlha alpaijecja engellualho'oc acnanco la caselha nquescama, nlho ca la njan quetsec la'a, ⁷ ncanec nempalleianlha lhta secje lhta mangetsoiacmo caselha enganco'oc, ca njan nelletsepo la'a mongeletsacjec caselha enganco'oc. ⁸ Ca ncanec ntasec ncolpaijecjac engellualho'oc acnanco la nentecamoc, nentalhnema nenwanlha nac ⁹ Coca apquellelto la aptengiaicamo mota nquescama patacom apanco'oc, ncowac na aclheianma apualho'oc eltoc engianquesancoc caselha apanco'oc la'a, coca ncowac na actewasecja nquec ma'a, malha ta njan ncotnec anmama aljanemmalhca m'a nconnactewacsec jata njan aplhamacjo acuacmo apsaujecpo m'a. ¹⁰ 10 Jai', lhamacjo caselha ncolatsecama aniem'o m'a nquescama nentengiai'a pataccom, aplhaniec na apqueliengiecja aptaicamo lhta meliasqueiam, apquetselhnanemmacpo njan aquiawai'a nquec ma'a. ¹¹ Coca lheiap apto Engiapom Neten apcasennaicama, etne ta malha apquengiema cacpota mancomama m'a caselha ncolatsecama nac, elana toca acpeiwomo, actacmelo caselhaja, coietna meiasqueiam, engiamelemma njan po'oc, eliepjecjo ta apuascapma necsa aplengaianco aquientlahnema, etne ta njan nalhepec ancoie napaqtawec enenlhet'awoc. ¹² Engiammelh jata njan anmelhmacja nac mongiasqueiam, meiasquem anquec na elhcac jata lheiap aquiennactema apnengiec mancotnenwaianlha nnelha ncanec lheiap apto apqueliequiescama Engiapom Neten, apqueluetascasquec na napaqtawec enenlhet'awoc aquietnema mei'asqueiam lheiap. ¹³ Coca colhuawe nac napaqtec Engiapom Neten apto apquellaicamoc aliennactema lhamacjo caselha lhmanquec jam, canjan napaqtec Jesucristo apto apuetasquescamo lhta napaqtec Pilato metca apquelanai'a ncolatsecama, apuetasquescaiacmo lhta njan actacmelo jengetlhecmoscama actemacja mongiasqueiam anac, ¹⁴ asqueltawec eliejecjoc lheiap astacja lhquec asqueltennascama, etacmelcasacpo ta njan, etne ta njan actacmanma cacpota melhenacpec meijamolhma lheiap acuacmo apuactamo ta apuesque engancoc Jesucristo, ¹⁵ ewatac jata aquietemo nquec acnem aplheianmacja la Engiapom Neten apto aquietemo nquec antacnescasancoc, ncanec wanlha lhema apjapac apuesque aquietnema apmopuana lhamacjo tacjaplhet'oc enenlhet'awoc lhmanquec jam, apto njan apiau'acja apuesque acnema apmopuana mamma po'oc la'a. ¹⁶ Apto njan lhema apjapac mengietsepma, apto apcaniemjaicama njan aisecsec atsac'elha lhma, mamma njan ncotetescamoc ma'a, mamma njan enenlhet apto apuetai'a m'a ncanec na mongapuanquec angellanjoc ma'a. Apto njan wanlha lhema apjapac aquietnema apmopuana m'a, ntasec angellajo mota m'a metca nnelha. Amen. ¹⁷ Ellelto ta njan lheiap mengianec ellacpoc apquellelto nac nema apquelletsecama, mellanec na ncolhnancoc aleljalhnecama apualho'oc aniem'o nquescama apquelletsecama ncanec ncomasquenwomoc jata m'a. Coca ntasec ma'a ncolhnancoc aleljalhnecama apualho'oc aniem'o Engiapom Neten, jengellaianco njan nquescama caselha aimommalhquelha la m'a cacpota ncoltacmelec nellaniemjaicama m'a. ¹⁸ Ellelto njan ellanancoc caselha altacmelo m'a, nquescama njan caselha altacmelo, ellamoc jata njan po'oc caselha metca apquenmasma. ¹⁹ Netamen ma'a ncotnec jata malha apcanquesaicamoc nema njan apquetsecama m'a neten, etlhewancoc jata njan aliennactema apnengio'oc mancotnenwaianlha nnelha. ²⁰ Lheiap Timoteo, etacmelques jata nema aicamoc anac apmacmecama, mepasenwoma nquec na ncolatsecama la apquelpaqmetquesammap, mengiailhenwomjo njan mancoietemo nac apquetlhecmosecamoc apquelleltaianco nac acuesai'a nengianweiacmo acto jawe ngiapac anquec ma'a, ²¹ moclhem'a apqueliengiacjec aptaicamoc meliasqueiam aniem'o apquelieplecja m'a apquetlhecmosecamoc anac ma'a. Asqueltawec coca Apuesque ewaiwesentac tacjaplhet'oc aplhamacjo jengamelaiam apancoc anac.