¹ وختی بره هفتمین مُهرَ وَأکود، نیم ساعتی آسمانِ میَأن سُکوتبوبُست. ² و بیدم کی هفتَ فرشته ایی کی خدا حضورِ جَه بپا ایسَه بودَ هفتَ شیپور فأدَه بوبُست. ³ و فرشته ایی دیگر بأمو و مذبحِ ورجَه بِئسَه، اون خو دسِ دورون بخورسوزی طلایی دَأشته و اونَ کلی بخور فأده بوبُست تا مُقدسینِ دوعائانِ مرَه، مذبحِ طلایی ایی رو تقدیم بوکونه کی تختِ جولو نَهه بو. ⁴ و بخورِ دود، مُقدسینِ دوعائانِ مرَه تا خدا حضور بوجُر بوشو. ⁵ بازن فرشته بخورسوزَ بیگیفت و مذبحِ آتشِ جَه پورَه کود و اونَ تَأوَأدَه زمین رو، ایمرتبه رَعد و برق بزَه و صداهایِ ترسناک بأمو و زلزله بوبُست. ⁶ اونموقع اون هفتَ فرشته ایی کی هفتَ شیپور بدس دَأشتد آمادَه بوستد تا شیپور بزند. ⁷ اولی فرشته خو شیپورَ صدا بدَه، و تگرگ و آتشی کی خونِ مرَه قاطی بوبُسته بو جی آسمان بوارست زمینِ رو، و زمینِ یک سومِ درختان و سبزه یان بوسوختد. ⁸ دومی فرشته خو شیپورَ صدا بدَه، ایمرتبه ایتَه چی کوه مَأنستَأن کی آتش بیگیفته بو دریا میَأن تَأوَأدَه بوبُست و دریایِ یک سومْ خونَ تبدیل بوبُست. ⁹ و یک سومْ جی دریا جانوران بمردد و یک سومِ کشتیان جی میَأن بوشود. ¹⁰ وختی سومی فرشته شیپورَ صدا بدَه، ایتَه پیلدانه ستاره کی چراغِ مَأنستَأن شعله ور بو جی آسمان بکفته یک سومِ رودخانه یان و چشمه یانِ رو. ¹¹ اونْ ستاره نامْ «اَفْسَنتین» یعنی زَرخ بو، و یک سومِ آب زَرخَ بوست، و هَنه وَسی خیلی جی مردمان بمردد. ¹² چهارمی فرشته خو شیپورَ صدا بدَه، و یک سومِ خورشیدَ و یک سومِ ماهَ و یک سومِ ستاره یانَ ضربه ایی بوخورد، جوری کی اوشَأنِ یک سومْ تاریکَ بوست، و یک سومِ روز بی نور بوبُست و یک سومِ شبم هَطو. ¹³ و هَطو کی فأندرستَأن دوبوم ایتَه لاشخور آسمانِ جَه فریاد بوکود:«وای، وای، وای بر کسانی کی زمینِ رو ساکند، چون هَسَه اون سه تَه فرشتۀ دیگر هم خَأید خوشَأنِ شیپورانَ صدا بدد!»