¹ بازن بیدم کی چهار تَه فرشته، زمینِ چهار گوشه جَه بئسَأد و زمینِ چهار تَه بادَ بدَأشتد تا خوشکی و دریا رو، و هیچ درختی رو نوزه. ² و ایتَه فرشتۀ دیگرَ بیدم کی شرقِ طرفِ جَه اَمویه و خدایِ زنده مُهرَ بدس دَأشته، اون چهار تَه فرشته یَ کی قدرت پیدا کوده بود خوشکی و دریایَ صدمه بزندَ دخَأد و بوگوفت: ³ «پیشتر جی اَنکی اَمی خدا بنده یانِ پیشانی یَ مُهر بزنیم، خوشکی و دریا و درختانَ صدمه نزنید.» ⁴ و بیشتَأوستم کی تعدادِ کسانی کی بنی اسرائیلِ همۀ قبایلِ جَه مُهر بوبُسته دَأردْ، صد و چهل و چهار هیزار نفر بو. ^{5 6} یهودا قبیله جَه دوازده هیزار نفر مُهر بوبُستد، رئوبینِ قبلیه جَه دوازده هیزار نفر، جادِ قبیله جَه دوازده هیزار نفر، اَشیرِ قبیله جَه دوازده هیزار نفر، نَفتالی قبیله جَه دوازده هیزار نفر، مَنَسی قبیله جَه دوازده ^{7 8} هیزار نفر، شَمعونِ قبیله جَه دوازده هیزار نفر، لاوی قبیله جَه دوازده هیزار نفر، یَساکارِ قبیله جَه دوازده هیزار نفر، زِبولونِ قبیله جَه دوازده هیزار نفر، یوسفِ قبیله جَه دوازد هیزار نفر، بِنیامینِ قبیله جَه دوازده هیزار نفر. ⁹ بازن فأندرستم و جماعتِ زیادی یَ بیدم کی نِشأسته اوشَأنَ ایشماردن، جی هر ملت، جی هر زبان، جی هر قؤم و طایفه، اوشَأنْ تختِ جولو، بره برابرِ جَه بپا ایسَه بود و همه تَه سفیدِ ردا دوکوده بود و نخلِ شاخه یَ بدس دَأشتد. ¹⁰ اوشَأن خوشَأنِ آوازَ بلندَ کودد و بوگوفتد:«اَمی نجاتْ اَمی خدا طرفِ جَه یه کی تختِ رو نیشته و بره طرفِ جَه یه.» ¹¹ همۀ فرشته یان، تختِ دورْ و اون پیرانِ و چهار حیوانِ دور بئسَأد و، همگی تختِ جولو سُجده و خدایَ پرستش بوکودد و ¹² بوگوفتد:«آمین، ستایش و جلال، حکمت و سپاس و احترام، قدرت و قوّت، اَمی خدا شین بیبه تا اَبدالآباد، آمین» ¹³ اونموقع ایتَه جی اون پیران می جَه وَأورسه:«اَشَأنی کی سفیدِ رَدا دوکوده دَأرد کیسد و کَ یَ جَه بأمو دَأرد؟» ¹⁴ جواب بدَم:«ای آقا اَنَ تو دَأنی!» و اون بوگوفت:«اَشَأن هون کسانی ایسد کی عذابِ سختِ جَه بوگوذشته دَأرد و خوشَأنِ لباسانَ بره خونِ دورون بوشوستد و سفیدَه کودد. ¹⁵ هَنه وَسیه کی؛ هَسَه خدا تختِ جولو ایسَد و اونَ شب و روز اونِ معبدِ دورون خدمت کوند، و اونْ تخت نشین خو خیمه یَ اوشَأنِ سرِ رو برپا دَأره. ¹⁶ اوشَأن هیچموقع ویشتا نوبود و هیچ موقع تشنگی نکشد، آفتاب و گرما اوشَأنَ نوسوجَأنه. ¹⁷ چون بره کی تختِ مرکزِ جَه ایسَه اوشَأنِ شَبانه، و اوشَأنَ چشمه هایِ آبِ حیاتِ طرف راهنمایی کونه، و خدا هر اَشکی یَ اوشَأنِ چومِ جَه پاکَ کونه.»