¹ وختی بره اولین مُهرْ جی اون هفتَ مُهرَ بازَه کود، من تماشا کودَأن دوبوم و بیشتَأوستم ایتَه جی اون چهار حیوانْ صدایی مرَه کی رَعدِ صدا مَأنستَأن بو بوگوفت:«بیأ جولو» ² وختی فأندرستم ایتَه سفیدِ اَسبَ بیدم، کسی کی اونِ رو نیشته بو کمانی بدس دَأشته، اونَ تاجی فَأدَه بوبُست و اون بتاخت بوشو تا بیشه و جَنگانِ میَأن پیروز بیبه. ³ وختی بره دومین مُهرَ بازَه کود، بیشتَأوستم کی دومین حیوان بوگوفت:«بیأ جولو» ⁴ و اَسبِ دیگری بیرون بأمو کی آتشِ سرخی یَ مَأنسته و اونِ سوارَ قدرت بدَه بوبُست کی تا صُلحَ زمینِ رو جَه اوسَأنه تا آدمان همدیگرَ بوکوشد، اونَ ایته پیلدانه شمشیر فأدَه بوبُست. ⁵ وختی سومین مُهرَ وَأکود، بیشتَأوستم کی سومین حیوان بوگوفت:«بیأ جولو» اونموقع فأندرستم و ایتَه سیاه اَسبَ بیدم کی اونِ سوارْ ایتَه ترازو بدس دَأشته. ⁶ اون چهار حیوانِ میَأنِ جَه صدایی بیشتَأوستم کی گوفته:«ایتَه پیمانه گندم یا سه پیمانه جو، یک دیناره، ولی روغن و شرابَ صدمه نزن.» ⁷ وختی بره چهارمین مُهرَ وَأکود بیشتَأوستم کی چهارمین حیوان بوگوفت:«بیأ جولو» ⁸ فَأندرستم اَسبی یَ بیدم کی اونِ رنگ بپرسته بو و اونِ سوارِ نام "مرگ" بو و مُرده یانِ دونیا اونِ پوشتِ سر اَمویه. اونَ قدرتی فَأدَه بوبُست تا یک چهارمِ زمینَ شمشیر و ویشتایی و مرض و حیواناتِ وحشی مرَه جی میَأن بوبوره. ⁹ وختی بره، پنجمین مُهرَ وَأکود، مذبحِ جیر اَرواحِ کسانی یَ بیدم کی خدا کلامِ وَسی و خوشَأنِ ایمانِ اعترافِ وَسی شهید بوبُسته بود. ¹⁰ اوشَأن صدایِ بلندِ مرَه فریاد بزَد:«ای خداوندِ حق، ای خداوندِ قدوس، تا کِی زمینِ مردمانَ داوری نوکونی و اَمی خونِ انتقامَ اوشَأنِ جَه فَأنگیری؟» ¹¹ بازن هر کودامِ اوشَأنَ رَدایی سفید فَأدد و اوشَأنَ بوگوفتد کی ایبچه آرام بیگیرد تا تعدادِ نفراتی کی وَأستی اوشَأنِ مَأنستَأن شهید بوبود کامل بیبه. ¹² و وختی بره شیشمین مُهرَ وَأکود، ایمرتبه ایته پیلدانه زلزله بأمو، آفتابْ ایتَه سیاه پارچه مَأنستَأن تاریکَ بوست و ماهْ خونِ مَأنستَأن سُرخَ بوست. ¹³ و آسمانِ ستاره یان فووُستد زمینِ رو، دوروست اَنجیرایِ دیررَسی مَأنستَأن کی توندِ بادِ مرَه درختِ جَه فووُد. ¹⁴ آسمانْ طومارِ مَأنستَأن بپیچست و جمعَ بوست، و همۀ کوه هان و جزیره یانْ خوشَأنِ جا جَه جابجا بوبُستد. ¹⁵ اونموقع، زمینِ پادشاهان و فرمانروایان، پیله کسان و سرلشگران، پولداران و قدرتمندان، و هر غلام و هر آزادی، خوشَأنَ غاران و کوه هان و صخره یانِ میَأن جیگا بدد. ¹⁶ اوشَأنْ کوه هان و صخره یانَ گوفتد:«اَمی رو بکفید و اَمَرَه تخت نشینِ جه و بره غَضبِ جَه جیگا بدید، ¹⁷ چون اوشَأنِ پیله غضبِ روز فأرسه دَأره و کیسه کی بتَأنه تاب بأوره؟»