¹ بازن آسمانی جدید و زمینی جدید بیدم. چون آسمانِ اول و زمینِ اول جی میأن بوشو بو و دِ دریایی هم وجود نَأشته. ² و شهرِ مُقدسِ اورشلیمَ بیدِم کی جی آسمان و جی خدا ورجَه بیجیر اَمویه، آمادَه بوسته بو جوری کی عروس خو دامادِ رِه آماده بِهه. ³ و تختِ جَه صدایِ بلندی بیشتَأوستم کی گوفته:«هَسَه خدا خانه آدمیانِ ورجَه نَهَه، اونْ اوشَأنِ میَأن ساکن بِهه، و اوشَأنْ اونِ قؤم بهد، و اونْ اوشَأنِ خدا بِهه. ⁴ اون هر اَشکی یَ اوشَأنِ چومِ جَه پاکَ کونه، مرگْ وجود نَئره، و دِ ناله و درد و ماتمِ جَه خبری نییه. چره کی چیزهای کهنه جی میأن بوشو.» ⁵ بازن اونی کی تختِ رو نیشته بو بوگوفت:«هَسَه همه چیَه نو کونم.» و مرَه بوگوفت:«اَنَ بینیویس، چون اَ کلامْ راسته و شَه اونَ اعتماد کودَأن.» ⁶ و دوباره مرَه بوگوفت:«تومامَ بوست، من الف و یِ، و اول و آخرم. من هر کیه کی تشنه بیبه جی چشمۀ آبِ حیات مجانی فأدم. ⁷ هر کی پیروز بیبه تمامِ اَ چیزانَ اِرث بوره و من اونِ خدا بهم و اون می زأی. ⁸ ولی ترسویان و بی ایمانان و فاسدان و آدمکشان و زِناکاران و جادوگران و بُت پرستان و همۀ دوروغگویانِ نصیبْ، دریاچه ایی جی شعله هایِ آتش و گوگورده، اَن مرگِ دومه.» ⁹ ایتَه جی اون هفت فرشته کی پیالۀ پور جی هفت بلایِ آخرَ دَأشتدْ بأمو و مرَه بوگوفت:«بیا، من عروسْ، یعنی بره زنَ ترَه نیشان دهم» ¹⁰ اونموقع مرَه در روح بوبورد ایتَه پیلدانه کوهِ بلندِ جُر و شهرِ مقدسِ اورشلیمَ مرَه نیشان بدَه کی جی آسمان و جی خدا ورجَه بیجیر اَمویه. ¹¹ خدا جلالْ اونِ جَه تاوسته و اونِ درخشندگی جواهرِ گرانقمیتَ مَأنسته، اون یَشمَ مَأنسته بو و بلورِ روشنیَ دَأشته. ¹² شهرِ حَصاران پهن و بلند بود. شهرْ دوازدَه دروازه، و دوازده فرشتۀ دربان دَأشته. اسرائیلِ دوازده قبیله نامْ دروازه یانِ رو بینیویشته بوبُسته بو. ¹³ سه تَه دروازه مشرقِ طرف، سه تَه دروازه شمالِ طرف، سه تَه دروازه جنوبِ طرف و سه تَه دروازه مغربِ طرف وجود دَأشته. ¹⁴ شهرِ حصارْ دوازدَه پایه دَأشته کی اوشَأنِ رو بره دوازدَه رسولِ نام بینیویشته بوبُسته بو. ¹⁵ و فرشته ایی کی می مرَه گب زَئه، ایتَه میلۀ طلایی خو دس دَأشته کی خَأسته اونِ اَمرَه شهرْ و اونِ دروازه یان و اونِ حَصارانَ اندازه بیگیره. ¹⁶ شهرْ مربعْ و اونِ طول و عرض مساوی بو. اون شهرَ اون میله مرَه اندازه بیگیفت. طول و عرض و بلندی همه برابر بو و اونِ هر ضِلع به درازای دوازدَه هیزار تیرِ پرتاب کودَأنِ مسافت بو. ¹⁷ و اونِ دیوارَ اندازه بیگیفت، و دیوار صد و چهل و چهار ذراع بو، یعنی به مقیاسِ انسانی، کی اون فرشته بکار بورده. ¹⁸ شهرِ دیوار جی یَشمْ، و شهرْ جی طلایِ ناب چَأکوده بوبُسته بو، شهرْ شیشه مَأنستَأن شفاف بو. ¹⁹ دیوارِ پِی، همه جور جواهرِ اَمرَه تزئین بوبُسته بو، پِی اول یَشمِ جَه بو، دومی لاجوردِ جَه، سومی عقیقِ سفیدِ جَه، چهارمین زُمردِ جَه، ²⁰ پنجمی عقیقِ سُرخِ جَه، شیشُمی عقیقِ جِگری جَه و هفتمی زبرجدِ جَه، و هشتمی یاقوت کبودِ جَه، و نُهمی یاقوتِ زردِ جَه، و دَهمی عقیقِ سبزِ جَه، یازدهمی فیروزه جَه و دوازدهمی لَعلِ بنفشِ جَه. ²¹ شهرِ دوازدَه دروازه، دوازدَه مُروارید بود، یعنی هر کودام جی دروازه یان ایتَه مُروارید بو، و شهرِ میدان جی طلایِ خالص بو و شیشه مَأنستَأن شفاف. ²² شهرِ دورون معبدی نیدم، چون خداوند خدایِ قادرِ مطلق و بره اون شهرِ معبدد. ²³ و شهرْ خورشید و ماهَ نیاز نَئره تا اونِ رو بتاود، چون خدا جلالْ اونَ روشنَ کونه و بره اون شهرِ چراغه. ²⁴ و قؤمان اونِ نورِ جیر راه شُد و زمینِ پادشاهان همۀ خوشأنِ جلال و احترامَ به اویَ اَورد. ²⁵ شهرِ دروازه یان هیچ موقع دوسته نیبه چون اویَ همیشه روزه و شبی وجود نَئره. ²⁶ همۀ قومَأنِ جلال و عزّت اَورده بِهه به اویَ. ²⁷ ولی هیچ چیزِ نجس، و یا کسی کی اونِ اعمال زشت و اونِ گبان دوروغ بیبه هیچموقع اون شهرَ بودورون نیشه، فقط کسانی کی اوشَأنِ نامْ بره دفترِ حیاتِ دورونْ بینیویشته بوبُسته تَأند ورود بوکوند.