¹ اونموقع آبِ حیاتِ نهرَ مرَه نیشان بدَه کی بلورِ مَأنستَأن شفاف بو و خدا تخت و بره جَه سرچشمه گیفته، ² و شهرِ میدانِ وسطِ جَه ردَ بوسته، نهرِ دو طرفِ جَه، حیاتِ درخت نَهه بو کی سالی دوازده مرتبه میوه فَدَه یه، یعنی هر ماه ایتَه جور تازه میوه، اونِ برگان هم قومَأنِ شفا رِه بکار اَمویه. ³ شهرِ میَأن هیچ چیزِ مَلعونی پیدا نوبوسته، خدا تخت و بره او شهرِ میَأن نَهه و اونِ بنده یان اونَ عبادت کوند. ⁴ اوشأنْ اونِ رویَ دیند و اونِ نام اوشَأنِ پیشانی رو بینیویشته بِهه. ⁵ دِ شب وجود نَئره و اوشَأنْ خورشیدِ نور و یا چراغِ نورَ احتیاج نَئرد. چون خداوندْ خدا اوشَأنَ روشنایی بخشه و اوشَأنْ تا اَبد سلطنت کوند. ⁶ فرشته مرَه بوگوفت:«اَ کلامْ راست و قابلِ اعتماده، و خداوندْ خدا کی اَنبیایَ روحِ نبوّت بخشه، خو فرشته یَ اوسه کود تا خو بنده یانَ اونچی کی بزودی اتفاق دکفه یَ نیشان بده.» ⁷ عیسی مسیح فرمایه:«بدَأنید کی بزودی اَیم، خوش به حال کسی کی اَ کیتابِ پیشگویی یانَ توجه بوکونه» ⁸ من یوحنا، هون کسی ایسم کی اَ چیزانَ بیدم و بیشتَأوستم، و بعدِ اَنکی بیدم و بیشتَأوستم، اون فرشته پا جیر کی اَ چیزانَ مرَه نیشان بدَه بو بکفتم تا سجده بوکونم. ⁹ ولی اون مرَه بوگوفت:«نه اَ کارَ نوکون، منم تی مَأنستَأن و تی برارانْ یعنی خدا اَنبیاء مَأنستَأنْ و همۀ کسانی کی اَ کیتابِ حقایقَ اعتماد دَأردِ مَأنستَأنْ عیسیَ خدمت کونم. پس فقط خدایَ پرستش بوکون» ¹⁰ بازن مرَه بوگوفت:«اَ کیتابِ پیشگویی یانَ جیگا ندن چون بزودی همه تَه اتفاق دکفه. ¹¹ وَأهَأل اونی کی بدکاره، خو بدی کودَأنَ ادامه بده و اونی کی فاسده بازم فساد بوکونه، و دوروستکارْ خو دوروستکاری یَ ادامه بده و مُقدسْ، هَطو مُقدس بِئسِه.» ¹² عیسی فرمایه:«من بزودی اَیم و هر کسِ رِه مُطابقِ اونِ اعمال پاداشی می اَمرَه اَورم. ¹³ من الف و یا، اول و آخر و ابتدا و انتها یم» ¹⁴ خوش به حال اون کسانی کی خوشَأنِ رَدایَ شورد تا بتَأند حیاتِ درختَ دسترسی بدَأرد و شهرِ دروازه یانَ بودورون بوشد. ¹⁵ چون سَگان و جادوگران و بی عِفتان و قاتلان و بُت پرستان و همۀ کسانی کی دوروغَ دوس دَأرد و اونَ انجام دهد بیرون ایسد. ¹⁶ «من عیسی خودمِ فرشته یَ شیمی ورجَه اوسه کودم تا اَ چیزانَ کلیسائانَ اعلام بوکونه. من ریشه و داوودِ نسل و صبحِ درخشانِ ستارۀ یم.» ¹⁷ روح و عروس گوید:«بیا» هر کی ایشتَأوه بوگویه:«بیا» هر کسی تشنه یه بأیه، هر کی مِیل دَأره تَأنه جی آبِ حیات مجانی بوخوره. ¹⁸ من هر کسی کی اَ کیتابِ نبوّتَ ایشتَأوه هشدار دهم کی اگر چیزی اونَ ایضافه بوکونه، خدا بلاهایی کی اَ کیتابِ دورون بینیویشته بوبُسته یَ اونِ سر اَوره. ¹⁹ و اگر کسی اَ نبوّتِ کلامِ جَه چیزی کمَ کونه، خدا اونَ حیاتِ درختِ جَه، و شهرِ مُقدسِ جَه، کی اَ کیتابِ دورون دربارۀ اوشَأن بینیویشته بوبُسته بی نصیب کونه. ²⁰ کسی کی اَ چیزانَ بوگوفته دَأره فرمایه:«بله، من بزودی اَیم!» آمین، بیأ ای خداوند عیسی. ²¹ اَمی خداوند عیسایِ مسیحِ فیضْ، شیمی اَمرَه بیبه. آمین