¹ اونموقع بیدم فرشته ایی جی آسمان فرود اَیه و چاهِ بی انتها کلیدْ اونِ اَمرَه یه و ایتَه مُحکمِ زنجیرم خو دس دَأره. ² اونْ، اِژدها و اون قدیمی لانتی یَ کی هون ابلیس یا شیطان بیبه بیگیفت و دَوَست و هیزار سالِ رِه اَسیر بوکود ³ و اونَ تَأوَأده چاهِ بی انتها دورون و چاهِ درَ دَوَست و مُهر و موم بوکود تا اونْ دِ نتَأنه اَ هیزار سالِ میَأن قؤمانَ گومراهَ بوکونه. بعدِ اونْ ایتَه مدت آزاد بِهه. ⁴ اونموقع تختهایی بیدم کی اوشَأنِ رو کسانی نیشته بود کی داوری اوشَأنَ بیسپُرده بوبُسته بو، و کسانی یَ بیدم کی عیسی شهادت دَئَنِ وَسی و خدا کلامِ وَسی اوشَأنِ سَر وَأوِه بود، کسانی کی اونْ وحشَ و اونِ مجسمه یَ پرستش نوکوده بود و اونِ نشانَ خوشَأنِ پیشانی و خوشَأنِ دسانِ رو نأشتد، اوشَأنْ همه تَه دوباره زندَه بوستد و هیزار سال مسیحِ اَمرَه سلطنت بوکودد. ⁵ ولی باقی مُرده یان زنده نوبوستد تا اون هیزار سال تومامَ بوست، اَن قیامتِ اوله. ⁶ خوشحال و مُقدسد کسانی کی قیامتِ اولِ میَأن سهمی دَأرد، مرگِ دوم اوشَأنِ رو قدرتی نَئره، بلکی اوشَأنْ خدا و مسیحِ کاهنان بهد و تا هیزار سال اونِ اَمرَه حکومت کوند. ⁷ وختی اَ هیزار سال تومامَ بوست، شیطان خو زندانِ جَه آزادَ بِه. ⁸ و بیرون اَیه تا مِلتهایی کی زمینِ چهار گوشه جَه ایسَده فریب بده. اون جوج و مأجوجَ کی دریا کنارِ فورشِ مَأنستَأن زیاد ایسده جنگِ رِه جمعَ کونه. ⁹ اوشَأنْ هَطو زمینِ رو به پیش بوشُد و مقدسینِ اُردوگاهْ، یعنی اورشلیمْ اون شهرِ محبوبَ محاصره بوکودد، ولی جی آسمان آتش بوارست و همه تَه یَ بوسوجَأنه. ¹⁰ و اِبلیسْ کی اوشَأنَ فریب بدَه بو دریاچۀ آتش و گوگردِ دورون تَأوَأدَه بوبُست، هون جایی کی اون وحشْ و اون نبیِ دوروغین تَأوَأدَه بوبُسته بود، اوشَأنْ شب و روز تا اَبد عذاب دیند. ¹¹ اونموقع تختِ پیلدانه و سفیدیَ بیدم کی کسی اونِ رو نیشته بو. آسمان و زمین اونِ حضورِ جَه فرار کودد و جایی اوشَأنِ رِه نِنَه بو. ¹² مُرده یانَ بیدم، چی پیلدانه چی کوچیدانه کی تختِ پِشِ جَه ایسَه بود. و دفتران بازَه بوست، و ایته دفترِ دیگر بازَه بوست کی حیاتِ دفتره. مُرده یان بر حسبِ خوشَأنِ اعمال، مُطابقِ اونچی کی اون دفترانِ میَأن بینیویشته بوبُسته بو داوری بوبُستد. ¹³ پس دریا و مرگْ و مُرده یانِ عالم، خوشَأنِ مُرده یانَ تحویل بدَد تا مُرده یانْ مُطابقِ خوشَأنِ اَعمال داوری بوبود. ¹⁴ و مرگْ و مُرده یانِ عالم به دریاچۀ آتش تَأوَأدَه بوبُستد، دریاچۀ آتش مرگِ دومه. ¹⁵ و هر کس کی اونِ نامْ دفترِ حیاتِ دورون بینیویشته نوبوسته بو دریاچۀ آتشِ دورون تَأوَأده بوبُست.