¹ بعدِ اَن صدایی جی آسمان بیشتَأوستم کی گروهِ زیادِ فریادِ مَأنسته بو کی گوفتد:«هللویاه! نجات و جلال و قدرت اَمی خدا شینه، ² چون اونِ داوری کودَأن راست و عادلانه یه، اون خو داوری مرَه اون پیلدانه فاحشه یَ کی زمینَ خو زِنا اَمرَه فاسد بوکوده بو محکوم بوکود، و خو بنده یانِ خونِ انتقامَ اونِ جَه بیگیفت.» ³ و ایبار دیگر بوگوفتد:«هَللویاه! اَ شهرِ خاکسترِ دودْ، تا اَبد بوجُر شِه» ⁴ و اون بیست و چهار پیر و اون چهار حیوانِ زنده به خاک بکفتد و خدایَ کی تختِ رو نیشته بو پرستش بوکودد و فریاد بزد کی:«آمین، هللویاه» ⁵ اونموقع صدایی جی تخت بأمو کی گوفته:«اَمی خدایَ شُکر بوکونید ای اونِ بنده یان، ای کسانی کی اونِ جَه ترسید، جی پیلدانه و کوچی دأنه» ⁶ اونموقع جماعتِ عظیمی صدایَ بیشتَأوستم کی آبهایِ زیادِ صدایَ مَأنسته و رَعدِ غُرشِ صدایَ دَأشته و گوفته:«هللویاه، چون خداوندْ اَمی خدا، اون قادرِ مطلق، خو سلطنتَ شروع بوکوده. ⁷ بأئیم شادی و خوشحالی بوکونیم و اونَ جلال بدیم. چون بره جشنِ عروسی موقع برسه دَأره، اونِ عروس هم خورَه آماده کوده. ⁸ لباسِ کتانِ سفید و تمیز و درخشان اونَ ببخشه بوبُسته تا دوکونه.» منظور جی لباسِ کتان، مُقدسینِ اَعمالِ عادلانه یه. ⁹ اونموقع فرشته مرَه بوگوفت:«بینیویس، خوش به حال کسانی کی بره جشنِ عروسی رِه دعوت بهد.» و فرشته باز مرَه بوگوفت:«اَشَأنْ خدا حقیقی کلامد» ¹⁰ اَ موقع بکفتم اونِ پا ورجَه تا اونَ پرستش بوکونم، ولی اون مرَه بوگوفت:«نه، اَ کارَه نوکون، منم خادمی ایسم تی مَأنستَأن و دیگر ایماندارانِ مَأنستَأنْ کی عیسایِ مسیحِ رِه شهادت دهد، تو خدایَ پرستش بوکون. همۀ اَ پیشگوئی یان و هر چی کی ترَه نیشان بدم همه دربارۀ عیسایه.» ¹¹ بازن بیدم کی آسمانْ بازَه بوست. سفیدِ اَسبی اویَ ایسَه بو کی اونِ سوارِ نام «اَمین و حق» بو. اون عادلانه داوری و جنگ کونه. ¹² اونِ چومان آتشِ شعله هایِ مَأنستَأن بو و اونِ سرِ رو تاجهایِ زیادی نَهه بو. اونِ رو نامی بینیویشته بو کی جُز خودش کسی اونِ معنی یَ نَأنسته. ¹³ اونِ لباسَ خون وَسِه بوبُسته بو و اونِ لقب «خدا کلمه» بو. ¹⁴ آسمانِ لشکریان کی لباسهایِ کتانِ سفید و تمیز و درخشان دوکوده بود اَسبهایِ سفیدَ سوارَ بوسته بود و اونِ دونبال آموئد. ¹⁵ اونِ دهَنِ جَه شمشیرِ تیزی بیرون اَمویه تا اونِ مرَه قؤمهایِ بی ایمانَ سرکوب بوکونه. اونْ عَصایِ آهنینِ مرَه اوشَأنِ رو حکومت کونه، اونْ خدایِ قادرِ مطلقِ، خشم و غضبِ شرابِ ظرفَ، خو پا مرَه لگد زنه. ¹⁶ اونِ ران و اونِ لباسِ رو اَ لقب بینیویشته بوبُسته:«شاهِ شاهان، و رَب اَلاَرباب» ¹⁷ و فرشته ایی بیدم کی آفتابِ میَأن بپا ایسَه بو و صدایِ بلندِ اَمرَه همۀ پرنده یانی کی آسمانِ میَأن پرواز کوندَ بوگوفت:«بأئید و خدا ضیافتِ عظیمِ رِه جمعَ بید، ¹⁸ تا شاهان و سرداران و ظالمانِ گوشتَ بوخورید، اَسبان و اوشَأنِ سوارانِ گوشتَ، همۀ آدمیانِ گوشتَ، از برده بیگفته تا آزاد، از پیلدانه بیگیفته تا کوچدَأنه.» ¹⁹ اونموقع اون وحشَ بیدم، و زمینِ پادشاهانَ و اوشَأنِ لشکریانَ کی جمعَ بوسته بود تا اون سوارِ مرَه و اونِ لشکرِ اَمرَه جنگ بوکوند. ²⁰ ولی اون وحش گرفتارَ بوستْ و اونِ مرَه اونْ نبیِ دوروغین کی اونِ حضورِ جَه معجزاتِ زیادی انجام دَئه و خو معجزاتِ اَمرَه خیلیانَ فریب بدَه بو تا اون وحشِ علامتَ قبول بوکوند و اونِ مجسمه یَ پرستش بوکوند، اوشَأن هر دو تَه زنده زنده تَأوَأدَه بوبُستد دریاچۀ آتشِ دورون کی گوگردِ مرَه شعله ور بو. ²¹ و باقی اوشَأنْ شمشیری مرَه کی اون اَسب سوارِ دهَنِ جَه بیرون اَمویه بمردد، و همۀ پرنده یانْ اوشَأنِ گوشتَ بوخوردد و سِئرَ بوستد.