¹ بازن بره یَ بیدم کی کوهِ صَهیونِ رو ایسَه بو، و یکصد و چهل و چهار هیزار نفر اونِ اَمرَه ایسَه بود کی اونِ نامْ و اونِ پئرِ نامْ اوشَأنِ پیشانی رو بینیویشته بوبُسته بو. ² و صدایی جی آسمان بیشتَأوستم کی آبشارِ صدا و رَعدِ صدایَ مَأنسته، ولی صدا، چنگ نوازانِ صدا مَأنستأن هم بو، یعنی زمانی کی چنگ نوازان چنگ زند. ³ اونموقع اون چهار حیوانْ و پیرانِ حضور، ایتَه تازه سرود بخَأدد، اونْ سرودَ هیچکس نتَأنسته یاد بیگیره بِجُز اون صد و چهل و چهار هیزار نفر کی تمامِ زمینیانِ جَه خریداری بوبُسته بود. ⁴ اَشَأن کسانی ایسد کی روابطِ زناشویی جَه دوری بوکودد و خوشَأنَ زناکانِ مرَه آلوده نوکودد، بلکی اوشَأنْ باکره مَأنستَأن پاکد و هرجا کی بره شِه، اَشأنم اونِ دونبال شُد. اَشَأن آدمیانِ میَأنِ جَه خریداری بوبُسته دَأرد تا به عنوانِ نوبرْ خدا و بره یَ تقدیم بوبود. ⁵ اوشَأنِ دَهنِ جَه ایتَه دوروغم بیرون نأمو دَأره، اوشَأنْ پاک و بی عیبد. ⁶ اونموقع ایتَه فرشته دیگرَ بیدم کی آسمانِ میَأن پرواز کوده و انجیلِ جاودانی یَ خو مرَه دَأشته تا زمینِ ساکنانَ بشارت بده. جی هر قوم و زبان و مِلتی کی بوبود. ⁷ اون صدایِ بلندِ اَمرَه فریاد زَئه:«خدا جَه بترسید و اونَ جلال بدید، چون زمانِ داوری برسه دَأره. پس اونَ کی آسمان و زمین و دریا و چشمه یانَ خلق بوکوده ستایش بوکونید.» ⁸ بازن ایتَه فرشته دیگرَ بیدم کی اونِ پوشت سر بأمو و فریاد بزَه:«سقوط بوکود، بابِلِ عظیمْ کی همۀ ملتانَ جی خودشِ شرابِ شهوت و زِناکاری فَأدَه یه تا بوخورد، سقوط بوکود.» ⁹ بازن فرشتۀ سومی بأمو و صدایِ بلندِ اَمرَه فریاد بزَه و بوگوفت:«کسانی کی اون وحشْ و یا اونِ مجسمه یَ پرستش بوکوند، و اونِ علامتِ مخصوصَ خوشَأنِ دس یا خوشَأنِ پیشانی رو بند، ¹⁰ خدا غضبِ شرابَ کی پورمایه و خالصه و اونِ خشمِ پیاله دورون دوکوده بوبُسته یَ خورد، و بره حضور و فرشته یانِ مقدسِ برابرْ آتشِ شعله یان میَأن و گوگردِ دورون عذاب دیند. ¹¹ اون آتشی دود کی اوشَأنَ عذاب دِهه تا اَبدالآباد بوجُر شِه، پس هر کسی کی وحشْ و اونِ مجسمه یَ پرستش بوکونه و هر کی اونِ نامِ نشانَ قبول بوکونه، شب و روز آرامی نَئره.» ¹² اَنْ مُقدسینِ صبرَ طلب کونه کی خدا احکامَ و ایمان به عیسی یَ حفظ کوند. ¹³ و آوازی جی آسمان بیشتَأوستم کی گوفته:«بینیویس، خوش به حال اوشَأنی کی جی اَن پس خداوندِ دورون میرد» و خداوندِ روح گویه:«بله، اوشَأنْ خوشَأنِ دردِ جَه راحتَ بود، و اوشَأنِ اَعمال اوشَأنِ دونبال سر اَیه.» ¹⁴ اونموقع فَأندرستم بیدم ایتَه اَبرِ سفید ظاهرَ بوست و اونِ رو، کسی انسانِ پسرِ مَأنستَأن نیشته بو و تاجی جی طلا خو سرِ رو دَأشته و ایتَه تیزه داس خو دس بیگیفته بو. ¹⁵ اونموقع ایتَه فرشتۀ دیگر معبدِ جَه بیرون بأمو و صدایِ بلندِ مرَه اون کسی کی اَبرِ رو نیشته بویَ بوگوفت:«تی داسَ اوسَأن و دِرو بوکون، چون دِرو فصل برسه دَأره و زمینِ محصول کاملاً آماده یه.» ¹⁶ پس اونی کی اَبرِ رو نیشته بو خو داسَ بکار بیگیفت و زمینِ محصولْ دِرو بوبُست. ¹⁷ بازن فرشته ایی دیگر معبدِ جَه کی آسمانِ میَأن نَهَه بیرون بأمو و اونم ایتَه داس خو دس دَأشته. ¹⁸ و هَ موقع ایتَه فرشتۀ دیگر کی آتشِ اختیارَ دَأشته مذبحِ جَه بیرون بأمو و اون فرشته ایی کی داس بدس دَأشته یَ بوگوفت:«تی تیزِ داسَ بکار بیگیر و اَ جهانِ تاکستانِ خوشه یانَ اوچین، چون اوشَأنِ اَنگوران فأرسه دَأره.» ¹⁹ پس اون فرشته خو داسِ مرَه زمینَ دِرو بوکود و اوچه بوبُسته اَنگورانَ دوکود خدا غضبِ پیلدانه ظرفِ دورون. ²⁰ اَنگورانَ اون ظرفِ دورون کی شهرِ بیرون نَهه بو اَقدر فشار بدد تا سیلابی جی خون براه دکفت و خون تا به درازایِ سیصد کیلومتر تا اَسبانِ اَفسار بوجُر بأمو.