¹ در اَنموقع ایتَه پیلدانه علامت آسمانِ میَأن ظاهرَ بوست، زنی یَ بیدم کی آفتابَ دوکوده بو، تاجی اونِ سر رو نَهه بو کی دوازدَه ستاره دَأشته و ماهْ اونِ پا جیر نَهه بو. ² اون حامله بو و زایمانِ دردِ جَه و اونِ عذابِ جَه فریاد کشه یه. ³ ایمرتبه ایتَه علامتِ دیگر آسمانِ میَأن ظاهرَ بوست، ایتَه پیلدانه اِژدها کی سُرخ بو و هفتَ سر دَأشته و دَه تَه شاخ، هر سرِ رو ایتَه تاج نَهَهبو. ⁴ اونْ خو دُمِ اَمرَه یک سومِ آسمانِ ستاره یانَ جارو بوکود و فوکودْ زمینِ رو. اِژدها اون زنِ جولو کی نزدیک بو بزَأیه بِئسَه، تا وختی اون زنِ زَأی بودونیا بأمو اونْ زَأیَ قورتَ دِه. ⁵ اون زنْ پسری بودونیا بأورد کی قرار بو آهنی عَصا مرَه همۀ زمینِ قؤمَأنِ رو حکومت بوکونه، وختی اون پسر بودونیا بأمو اونَ به خدا حضور و اونِ تختِ طرف بوجُر بوبوردد. ⁶ ولی او زأیِ مار فرار بوکود بوشو بیابان، خدا اویَ اونِ رِه جایی آماده کوده بو تا هیزار و دویست و شصت روز اونِ جَه مراقبت بوکوند. ⁷ ایمرتبه آسمانِ میَأن جنگی شروع بوبُست، میکائیلْ و اونِ فرشته یانْ اِژدها و اونِ فرشته یانِ مرَه جنگ بوکودد. ⁸ اِژدها و اونِ فرشته یان شکست بوخوردد و خوشَأنِ پایگاهَ آسمانِ میَأن جی دس بدَد. ⁹ پیلدانه اِژدهایَ آسمانِ جَه بیجیر تَأوَأدَد، یعنی اون قدیمی لانتی یَ کی اِبلیسْ و شیطان نام دَأره و همۀ جهانَ فریب دِهه، اونْ و همۀ اونِ فرشته یانْ به زمین تَأوَأدَه بوبُستد. ¹⁰ اونموقع صدایِ بلندی آسمانِ جَه بیشتَأوستم کی گوفته:«هَسَه اَمی خدا نجاتُ قوّتُ سلطنت، و اونِ مسیحِ قدرت ظاهرَ بوسته، و اون کسی کی ایماندارانِ مُدعی بو، و شب و روز اَمی خدا حضورْ اَمی برأرأنَ تُهمت زَئه، بیجیر تَأوَأدَه بوبُسته. ¹¹ اَ ایماندارانْ بره خونِ مرَه، و شهادتی وَسی کی به زبان بأوردد اونِ رو پیروز بوبُستد، چون خوشأنِ جانَ عزیز ندَأنستد، حتی حاضر بوبُستد اَ راه دورون بیمیرد. ¹² پس ای آسمانان و کسانی کی آسمانِ میَأن ساکنید، شادی بوکونید! ولی وای بر زمین و دریا، چون اِبلیس غیظِ زیادِ اَمرَه شیمی طرف بیجیر بأمو دَأره، چون دَأنه کی خیلی وخت نَئره. ¹³ اِژدها وختی بیده کی اونَ به زمین تَأوَأدَه دَأرد، بوشو اون زنی کی پسر بزَه بو دونبال و اونَ اذیت بوکود. ¹⁴ اون زنَ، دو تَه عقابِ بال فَأدَه بوبُست تا فرار بوکونه بیایانْ به هون جایی کی اونِ رِه آماده بوسته بو تا اویَ سه سال و نیم اونْ لانتی چومِ جَه دور بیبه. ¹⁵ ایمرتبه لانتی دَهنِ جَه آبی رودخانه مَأنستَأن بیرون بأمو تا اون زنَ سیلاب بوبوره. ¹⁶ ولی زمینْ بأمو زنِ یاری رِه و خو دَهَنَ بازَه کود و سِیلی کی لانتی خو دَهنِ جَه بیرون فوکوده بویَ بیجیر بوبورد. ¹⁷ هَنه وَسی اِژدها اون زنِ رِه غیظ بوکود و بوشو تا باقی اونِ زأکأنِ اَمرَه جنگ بوکونه، یعنی اوشَأنی مرَه کی خدا اَحکامَ دَأرد و عیسی رِه شهادت دِهد. اِژدها فَأرسه دریاکنارَ و اویَ بِئسَه. ¹⁸ اونموقع بیدم ایتَه وَحش دریا جَه بیرون بأمو کی دَه تَه شاخ دَأشته و هفتَ سر.