¹ بأئید خداوندِ رِه کی اَمی پوشتیبان و نجات دهنده یه شادی اَمرَه سرود بخَأنیم. ² شُکرگزاری اَمرَه بأئیم اونِ حضور، و سرودهایِ شادِ اَمرَه اونَ ستایش بوکونیم. ³ چره کی یَهوَه خدایِ عظیمه. ⁴ و پیلدانه پادشاه همۀ خدایانِ رِه. زمینِ پستی و کوهانِ بلندی همه اونِ شینه. ⁵ دریائان اونِ شیند، اون دریائانَ بوجود بأورد، اونِ دس خوشکی یانَ چَأکود. ⁶ بأئید عبادت و سجده بوکونیم و اَمی خداوندِ حضور، اَمی خالقِ رِه زانو بزنیم. ⁷ چون اون اَمی خدایه، و اَمَأن اونِ چراگاه قؤم و اونِ دستِ گله ئیم. کاش ایمروز اونِ آوازَ بیشتَأوسته بید کی گویه: ⁸ خودتَأنِ دیلَ شیمی اجدادِ دیلِ مَأنستَأن سختَ نوکونید، کی مِریبا، و مَسَّه بیابانِ میَأن نافرمان بوبُستد. ⁹ شیمی اَجداد در اویَ مرَه امتحان بوکودد، هر چند بارها می معجزه یان و می اعمال عجیبَ خوشَأنِ چومِ اَمرَه بیده بود، ولی بازم مرَه شک بوکودد. ¹⁰ چهل سال اون نسلِ جَه ناراحت بؤم و بوگوفتم: اَ قؤمِ دیلِ فکر ذاتاً گمراهه کی می راهانَ نشناسد. ¹¹ پس می غضبِ میَأن قسم بوخوردم کی اوشَأن هیچموقع می آسایشَ بودورون نوشود.