¹ هَلِلویاه، خداوندَ جی آسمان ستایش بوکونید، عرشِ برینِ جَه اونَ ستایش بوکونید. ² ای اونِ فرشته یان، ای آسمانِ لشکران کی اونِ شینید، اونَ ستایش بوکونید. ³ ای آفتاب و ای مهتاب، اونَ ستایش بوکونید، ای درخشانِ ستاره یان، اونَ ستایش بوکونید. ⁴ ای آسمانان، ای بخارایی کی اَبرانِ بوجُرید، اونَ ستایش بوکونید. ⁵ همۀ اَشَأن خداوندَ ستایش بوکوند، چره کی اون اَمر بوکود و اوشَأن خلق بوبُستد. ⁶ اون همۀ اوشَأنَ تا اَبد اُستوار بوکود و، اوشَأن هیچموقع تغییر نوکوند. ⁷ خداوندَ زمینِ جَه ستایش بوکونید، ای نَهنگأن و ای دریائانِ گؤدی. ⁸ ای آتش، ای تگرگ، ای برف، ای مِه و توفان کی اونِ فرمانَ بجا اَورید، اونَ ستایش بوکونید. ⁹ ای کوه هان، ای تپه یان، ای میوه داران، ای بلندِ سَروان، خداوندَ ستایش بوکونید. ¹⁰ ای حیوانانِ وحشی و اهلی، ای خزنده یان، ای پرنده یان، اونَ ستایش بوکونید. ¹¹ ای پادشاهان، ای مردم، ای شاهزاده یان و ای جهانِ حاکمان. ¹² ای پسرَأن و ای دخترَأن، ای پیران و ای زَأکأن، خداوندَ ستایش بوکونید.