¹ ای خداوند، ترَه التماس کونم بیأ می یاری رِه، پس توندَ کون بیأ می ورجَه، وختی کمکِ وَسی ترَه دخَأنم می آوازَ بیشتَأو. ² می دوعا بوخورِ مَأنستَأن تی درگاهَ فَأرسه، وختی می دسانَ تی طرف بلندَ کونم، شامِ قربانی مَأنستَأن قبول بوکون. ³ ای خداوند، تو می گبانِ مراقب بوبون و می زبانَ بدَأر. ⁴ می دیلَ کارایِ بدِ رِه مایل نوکون، وَأنَأل شریرِ مردکانِ اَمرَه کارایِ زشت انجام بدم و، چیزایی دونبال بوشوم کی اوشَأن شُد و لذت بورد. ⁵ وختی آدمِ دوروست مرَه سرزنش کونه، مرِه افتخاره، در اصل مرَه محبت کودَأن دره، ولی مردمِ شرورِ احترامَ نخَأیم و، همیشه بر ضدِ اوشَأن دوعا کونم. ⁶ وختی اَ بدکارانِ رهبران جی صخره یانِ جُر بکفد بیجیر، اونموقع می گبانَ ایشتَأود کی راست گوفتَأن درم. ⁷ بازن گوید: چوطو کی کسی زمینَ شُخم بزنه و شیار بوکونه، اَمی استخوانان هوطو قبرانِ دهنه سر پراکندَه بوسته دَأره. ⁸ ولی ای خداوند، ای یَهوَه، می چومَأن ترَه فَأندرستَأن دره، من ترَه توکل دَأرم، مرَه بی پوشت و پناه ولَ نوکون. ⁹ مرَه جی دامی کی مرَه بنَه دَأرد نجات بدن، گوناهکارانِ تله جَه مرَه محافظت بوکون. ¹⁰ شریرانَ اوشَأنِ دامِ میَأن گرفتارَ کون و، وَأهَأل من جانِ سالم بدر بوبورم.