¹ هَلِلویاه، خداوندَ پرستش بوکونید، ای خداوندِ بنده یان اونَ ستایش بوکونید. ² ای کسانی کی خداوندِ خانه دورون ایسید، اَمی خدا خانه صحنِ دورون، ³ خداوندَ شُکر بوکونید، چره کی خداوند مهربانه. اونِ نامِ رِه سرود بخَأنید، چره کی اون نام دیلپسنده. ⁴ اون یعقوبَ انتخاب بوکود، اون بنی اسرائیلم انتخاب بوکود تا اونِ قؤمِ خاص بوبود. ⁵ دَأنم کی خداوند پیلدانه یه و همۀ خدایانِ جَه بوجُرتره. ⁶ اون هر کاری کی اِراده بوکونه یَ انجام دِهه، چی آسمانِ جَه، چی زمینِ رو، چی دریا میَأن و چی دریائانِ عمقِ میَأن. ⁷ اَبرانَ جی زمینِ اوطرف اَوره، رعدِ برق و باد و بارانَ بوجود اَوره و توفان راه تَأوَأده. ⁸ اون کسی ایسه کی همۀ مصریانِ پیله زَأکَأنَ بوکوشت، چی حیوانانِ شینَه و چی انسانانِ پیله زَأکأنَ. ⁹ نشانه یان و معجزه یانِ عظیمی فرعون و اونِ درباریانِ چومِ جولو انجام بدَه. ¹⁰ مملکتانِ زیادی یَ سِزا بدَه و پادشاهانِ قدرتمندیَ بوکوشت. ¹¹ «سیحون»، اَموریانِ شاهَ، «عوج»، باشانِ شاهَ، و همۀ کنعانِ پادشاهانَ جی میَأن بوبورد و، اوشَأنِ سرزمینانَ فَأدَه خو قؤم بنی اسرائیلَ. ¹² و اوشَأنِ زمینَ به عنوانِ میراث ببخشه، یعنی خو قؤم بنی اسرائیلَ میراث فَأدَه. ¹³ ای خداوند تی نام تا اَبد باقیه، و همۀ نسلان ترَه به یاد اَورد. ¹⁴ چره کی خداوند خو قؤمَ داوری کونه و، خو خادمانَ رَحم کونه. ¹⁵ قؤمایِ دیگرِ بُتان، جی طلا و نقره ید کی انسانِ دسِ اَمرَه چَأکوده بوبُسته. ¹⁶ دهن دَأرد ولی گب نزند، چوم دَأرد ولی نیدیند. ¹⁷ گوش دَأرد ولی نیشتَأود، حتی نِتَأند نفس بکشد. ¹⁸ کسانی هم کی اوشَأنَ چَأکوده دَأرد و اوشَأنَ توکل دَأرد، هوشَأنِ مَأنستَأند. ¹⁹ ای اسرائیلِ قؤم، خداوندَ ستایش بوکونید، ای هارونِ خاندان، خداوندَ پرستش بوکونید. ²⁰ ای لاوی طایفه، خداوندَ پرستش بوکونید، ای کسانی کی خداوندِ جَه ترسید، اونَ پرستش بوکونید. ²¹ مُتبارک بیبه خداوند جی صَهیون، اونی کی اورشلیمِ دورون ساکنه. هَلِلویاه