¹ خداوندا، داود و همۀ اونِ زحمتانَ به یاد بأور. ² به یاد بأور کی چوطو خداوندِ رِه قسم بوخورد و قادرِ مطلق، یعنی یعقوبِ خدا رِه نذر بوکود و بوگوفت: ³ خودمِ خانه و خیمه یَ بودورون نوشوم و خودمِ رختخوابِ دورون نوخوسم. ⁴ نه می چومَأنَ خواب دهم و نه می مژه یانَ استراحت. ⁵ تا موقعی کی ایتَه جا خداوندِ رِه پیدا کونم و، یعقوبِ قادرِ مطلقِ رِه ایتَه خانه. ⁶ اِفراتَه میَأن صندوقِ عهدِ جَه خبردارَ بوستیم و یَعاریمِ صحرا دورون اونَ پیدا کودیم. ⁷ بائید بیشیم خداوندِ خانه و اونِ تختِ ورجَه اونَ پرستش بوکونیم. ⁸ ای خداوند، ویریز و صندوقِ عهدِ اَمرَه کی تی قدرتِ نشانه یه، بیا پیلدانه معبدِ دورون و همیشه رِه اویَ ساکن بوبون. ⁹ تی کاهنان عدالتِ رختَ دوکوند و تی مؤمنین شادی اَمرَه ترِه سرود خَأند. ¹⁰ تی بنده داودِ وَسی تی خودتِ رویَ تی مسیحِ جَه وَأنگردَأن. ¹¹ خداوند راستی اَمرَه داودِ رِه قسم بوخورد و خو وعده جَه وَأنگرده، اون بوگوفت: ایتَه جی تی زَأکأنَ پادشاه کونم، و اون بعدِ تو سلطنت کونه. ¹² اگر تی پسران می عهدَ بدَأرد و احکامی کی اوشَأنَ یاد دهمَ ایطاعت بوکوند، اوشأنِ زَأکأنَ، تا اَبد نسل در نسل سلطنتِ تختِ رو نیشَأنم. ¹³ خداوند صَهیونَ انتخاب بوکود تا اونِ میَأن ساکن بیبه. ¹⁴ اون بفرماست؛ اَیَ تا اَبدالآباد می آرامگاهه، هَ یَ ساکن بوم، چره کی اَطو اِراده بوکودم.