¹ اَمرَه نه ای خداوند، اَمرَه نه، بلکی خودتِ نامَ جلال بدن. چره کی تو پور جی وفاداری و محبتی. ² چره اُمتان وَأورسد؛ اوشَأنِ خدا کَ یَ ایسَه؟ ³ اَمی خدا آسمانِ میَأن ایسَه و اونچی یَ کی ایراده بوکونه، انجام دِهِه. ⁴ اوشَأنِ خدایان، جی طلا و نقره یه، کی انسانِ دسِ اَمرَه چَأکوده بوبُسته. ⁵ اوشَأن دهن دَأرد، ولی گب نزند، چوم دَأرد، ولی نیدیند. ⁶ گوش دَأرد، ولی نیشتَأود، دماغ دَأرد، ولی نتَأند بو بوکوند. ⁷ دس دَأرد، ولی نتَأند چیزی یَ لمس بوکوند، پا دَأرد، ولی نتَأند راه بوشود، اوشَأنِ گولی جَه صدایی بیرون نَأیه. ⁸ کسانی کی اوشَأنَ چَأکوده دَأرد و کسانی کی اوشَأنَ پرستش کوند، هون بُتانِ مَأنستَأن بود. ⁹ ای بنی اسرائیل، خداوندَ توکل بوکونید، چره کی اون شیمی یاور و شیمی نگهبانه. ¹⁰ ای هارونِ خاندان، خداوندَ توکل بوکونید، چره کی اون شیمی یاور و شیمی نگهبانه. ¹¹ ای خداترسان، خداوندَ توکل بوکونید، چره کی اون شیمی یاور و شیمی نگهبانه. ¹² خداوند اَمرَه به یاد اَوره و برکت دِهه. اون بنی اسرائیل و هارونِ خاندانَ برکت دِهه. ¹³ اون خداترسانَ برکت دِهه، پیلدانه و کوچی دانه یَ. ¹⁴ خداوند شمرَه و شیمی نسلَ برکت دِهه.