¹ هَلِلویاه، ای خداوند خادمان، ستایش بوکونید، خداوندِ نامَ ستایش بوکونید. ² خداوندِ نام مُتبارکه، جی هَسَه تا اَبدالآباد. ³ جی طلوعِ آفتاب تا مغربِ رِه خداوندِ نامَ ستایش بوکونید. ⁴ خداوند همۀ قؤمانِ رو حکومت کونه، و اونِ عظمت جی آسمانان هم بوجُرتره. ⁵ اَمی خدا یَهوَه مَأنستَأن کیسه، کی آسمانانِ میَأن بوجُرترین جایگاه جَه نیشته؟ ⁶ اون خمَه بوسته و جی آسمان زمینَ فَأندره. ⁷ فقیرَ خاکِ جَه ویریزَأنه و نیازمندَ ذلتِ جَه خلاصَ کونه ⁸ تا اوشَأنَ پیله کسانِ مرَه بینیشَأنه، یعنی خودشِ قؤمِ پیله کسانِ اَمرَه. ⁹ نازا زنَأکَ خانواده دار کونه و، تبدیل به ماری کی زَأیِ زیاد دَأشتنِ جَه شادی کونه. هَلِلویاه.