³ خوش به حال اوشَأنی کی انصاف دَأرد و همیشه اونچی کی دروسته یَ انجام دهد. ⁴ ای خداوند، وختی خودتِ قؤمَ یاری کونی مرَه هم یاد بأور، وختی اوشَأنَ نجات دهی مرَه هم نجات بدن. ⁵ تا تی انتخاب بوبُسته یانِ سعادتَ بیدینم و، تی قؤمِ شادی جَه منم خوشحالَ بوم، و تی میراثِ اَمرَه منم افتخار بوکونم. ⁶ اَمَأنم اَمی پئرانِ مَأنستَأن گوناه بوکوده ایم، اَمَأنم خطا بوکودیم و شرور بوئیم. ⁷ اَمی پئران مصرِ جَه تی معجزه یانَ درک نوکودد و تی محبت و رحمتَ جی خاطر بوبوردد، اوشَأن دریایِ سرخِ ورجَه فتنه به پا بوکودد. ⁸ ولی تو هوطویی کی وعده بدَه بی، خودتِ نامِ وَسی اوشَأنَ نجات بدَأیی و اَطو تی قدرتِ عظیمَ آشکارَ کودی. ⁹ تو دریایِ سرخَ اَمر بوکودی و اون خوشکَ بوست. و تی قؤمَ دریا کفِ جَه کی بیابانِ مَأنستَأن خوشکَ بوسته بو هدایت بوکودی. ¹⁰ تی قؤمَ اوشَأنِ دوشمنانِ دسِ جَه نجات بدَه ایی و آزادَ کودی. ¹¹ و آب فووُست اوشَأنِ دوشمنانِ رو، جوری کی ایتَه جی اوشَأن هم زنده نمَأنستد. ¹² اونموقع اوشَأن خدا کلامَ ایمان بأوردد و سرود خَأدِنِ اَمرَه اونَ شُکر بوکودد. ¹³ ولی زود اونِ معجزه یانَ جی خاطر بوبورد و اونِ مشورت و نصیحتِ رأفأ نِئسَد. ¹⁴ بلکی بیابانِ میَأن خوشَأنِ نَفسِ خواهشِ جَه پیروی بوکودد، و صحرا میَأن خدایَ امتحان بوکودد. ¹⁵ خدا هم اونچی کی بخَأسته بودَه اوشَأنَ فَأدَه، ولی اوشَأنَ مرضأیِ سختی یَ دوچارَه کود. ¹⁶ پس یَهوَه، مقدسِ خادمانِ اَمرَه، یعنی موسی و هارون مرَه حسودی بوکودد. ¹⁷ پس زمینم دهن بازَه کود و «داتان» و «اَبیرام» و اونِ خاندانَ بیجیر بوبورد. ¹⁸ و جی آسمان اوشَأنِ طرفدارانِ سر آتش بوارست و آتشِ شعله، همۀ اون شریرانَ بوسوزَأنی. ¹⁹ اوشَأن کوهِ سینا دامنه جیر، جی طلا ایتَه گوساله بتراشتد و اون بُتَ پرستش بوکودد. ²⁰ اوشَأن ایتَه گاوی کی علف خوره مجسمه یَ، خدای پور جلالِ جا پرستش بوکودد. ²¹ و خدایی کی اوشَأنَ نجات بدَه بویَ جی خاطر بوبوردد، اونی کی مصرِ جَه اوشَأنِ وَسی معجزه یانِ زیادی اَنجام بدَه بو. ²² اون کارایی کی حامِ سرزمینِ جَه بوکوده بو، و کارایِ عجیبی کی دریایِ سرخِ میَأن انجام بدَه بو. ²³ بازن خداوند بخَأست کی اوشَأنَ هلاکَ کونه، ولی اونِ انتخاب بوکوده خادم یعنی موسی، اونِ حضور بِئسَه و اوشَأنِ رِه شفاعت بوکود و اونِ غضبَ وَأگردَنه. ²⁴ اوشَأن اون مرغوبِ سرزمینَ خوار بدَأنستد و، خداوند وعده یَ ایمان نَئشتد. ²⁵ اوشَأن خوشَأنِ خیمه یانِ دورون بینیشتد و همش غُرغُر کودد و خداوندِ دستورانَ گوش ندَأده. ²⁶ هَنه وَسی خداوندم اوشَأنَ غضب بوکود، و خو دسَ راستَ کود کی اوشَأنَ بیابانِ میَأن هلاکَ کونه. ²⁷ و اوشَأنِ زَأکأنَ اُمتایِ دیگرِ میَأن پراکنده و آوارَه کونه. ²⁸ بنی اسرائیل «فِغورِ» میَأن بُتِ «بَعَلَ» پرستش بوکودد و جی گوشتِ قربانی یانی بوخوردد کی اون بُتَ تقدیم بوبُسته بو. ²⁹ اوشَأن خوشَأنِ کارانِ مرَه خداوندَ به خشم بأوردد، و هَنه وَسی وَبایَ دوچارَه بوستد. ³⁰ اونموقع «فینِحاس» ویریشت و مقصرانَ مجازات بوکود و وبا اوسَأده بوبُست. ³¹ اونِ اَ کار خدایَ خوش بأمو و اونِ پیشگاه جَه قبول بوبُست، و هَنه وَسی همۀ نسلان تا اَبد اونِ جَه به خوبی یاد کوند. ³² بنی اسرائیل «مِریبَه» چشمه ورجَه خدایَ عصبانی بوکودد، جوری کی اوشَأنِ کارِ وَسی موسی هم ضرر بوکود. ³³ چون جوری اونَ کلافَه کودد کی، اونم عصبانی بوبُست و ناسزا بوگوفت. ³⁴ اوشَأن، قؤمایی کی خداوند اوشَأنَ اَمر بوکوده بو هلاکَ کوندَه، نوکوشتد. ³⁵ بلکی اوشَأنِ اَمرَه ازدواج بوکودد و اوشَأنِ کارانَ یاد بیگیفتد ³⁶ و اوشَأنِ بُتانَ پرستش بوکودد، تا اَنکی هو کار اوشَأنِ رِه دامی بوبُست.